Valamuli 5
5
Ndzimo ya Dhebhora
(Ekisodha 15:1-18)
1Khu litshigu lolo, Dhebhora ni Bharaki, mwamana wa Abhinowamu, va di embelela ndzimo yeyi, khavo:
2“Kha nga olu vathangeli va thangedego Israyeli,
vathu navo va dzi ningede wurumba wawe khavbo gu vbeledego.
Bongani Pfhumu Nungungulu!
3Enu vafumeli yingisani!
Upwani enu vamwamangulu!
Nyi na dhumisa Pfhumu Nungungulu khu gu embelela,
nyi na embelela ga Pfhumu Nungungulu wa Israyeli.
4Uwe Pfhumu Nungungulu, avbo u na khugago khu Seyiri,
avbo u nga gimbilago
gukhugela mahangeni ga Edhomi,
mafu ma di tsekatseka;
khu ndzadzini gu dota mati,
mapfhi ma wisa ndzadzi.
5 # Wona gambe: Gen 19:18. Sigomo si di nyiviliga
mbeli ga Pfhumu Nungungulu wa gigomoni
gya Sinayi, mbeli ga Pfhumu Nungungulu wa Israyeli.
6Matshiguni ya Sangari, mwamana wa Anati,
ni matshiguni ya Jayeli,
dzindzila nya gugimbile khidzo dzi di fuva;
vasundzi
va di gimbila khu dzindzila nya gudzuwulugele.
7Mitalala ya na Israyeli, yi di fuva
kala eni Dhebhora, nyi dugelela
nyi khala mayi wa Israyeli.
8Avbo va na Israyeli, va nga bani va vbweta vambe vanungungulu,
nyimbi yi di bela dzinyangwani gwawe,
gu di si manegi gitshangu mwendro litshari,
vbakari nya magumana magumi mazana (40. 000) ya Israyeli.
9Monyo wangu wa gu tsakela
vathangeli nya dzinyimbi va Israyeli,
ni ga vathu va nga dzi ningelago khu gugola gwawe.
Rungudzani Pfhumu Nungungulu.
10Enu mu khiledego dziburu nya guage,
enu mu khalago vbamalawutunu nya wumburi,
ni enu mu gimbilago dzindzilani,
phalalegisani mahungu yaya.
11Iyo gu pwalago ligwaha nya sighalala,
malangani gu regwago mati,
pwadzani mithumo nya gululame ya Pfhumu Nungungulu,
mithumo nya gululame a giredego ga avo va vbanyago
mitalalani ya tigoni ga Israyeli.
Khavbo avbo, vathu va Pfhumu Nungungulu
va di vboha kala dzinyangwani nya lidhoropa.
12Khendzuga, Dhebhora, khendzuga!
Kheni khendzuga, khendzuga u embelela ndzimo!
Bharaki, Khuga u eme,
u thangela avo u va modego va khala sibotshwa,
uwe gumogo ni mwamana wa Abhinowamu.
13Khu gikhati gyogyo, avo va gu mitshaledwa ya tigoni,
va diya sasela vathu nya guthavisege,
Pfhumu Nungungulu a di nyi dwanela nyi pala dzindrena.
14Va dugede tigoni ga Efrayimi tumbunugo wawe wu dugelago gipandrengulo gya Amaleki,
khu hwane gwago, a di gu landra Bhejami vbakari nya vathu vago;
khu Makiri, gu di duga vathangeli,
khu Zebhuloni va duga avo va pharago ndronga nya wufumu.
15Manganagana ya Isakari,
ma diri gumogo ni Dhebhora;
Isakari gumogo ni Bharaki vomo panini,
va va landra khu migondro,
khu gitsongwanani gya Rubheni,
gu dugide makungo nya makhongolo nya monyo.
16Khu ginani u na gu tshalago mavbandroni
u yingisa dzindrodzi nya vahavisi nya mitshambi, na?
Khu mitsongoni ya Rubheni,
gu dugide maalakanyo nya mangi khu monyoni.
17Gileyadhi a di simama gu khala khu khisikheyi ga Joridhani,
gasi Dhani, khu ginani a nga khala mataroni?
Aseri, a di khala funguni nya yiphwa
a hefemula siwoni gwaye.
18Zebhuloni litigo nyamba thava gufa,
kha nga nuye Nafitali, musigomoni sa khabini.
19Gu dita vafumeli va ta dwana,
vafumeli Vakhanani va dita dwana Tahanaki,
vbafuvbi ni mati ya Megidho;
aholu kha mana phango nya parata.
20Khu ndzadzini dzi di dwana dzinyeledzi,
khu dzindzilani dzawe dza vbatshani
dzi wugela Sisera.
21Va di kukulutwa khu tsongo wa Kisomi,
tsongo wule wa gale,
tsongo nya mayunga.
Uwe hefemulo wangu, tiya uya mbeli.
22Gu di pwala sikingo nya sitsendro nya dzikavalo
na dzi gu tutumiswa khu
tshivba nya dzingwazi dzawe.
23Li na vadwe lidhoropa la Merozi,
gu ganela Ngilozi ya Pfhumu Nungungulu
valani ngudzu vavbanyi vaye,
kholu, kha vata phasedzela Pfhumu Nungungulu,
gu phasedzela Pfhumu Nungungulu gu dwana ni valala vaye nya tshivba.
24Ngadza Hebheri, Jayeli, Mukheni, a na katege vbakari ga vanyamayi;
a na katege vbakari ga vanyamayi va vbanyago mitshatshani.
25Sisera a di lomba mati, uye a mu ninga mahwe,
a di mu resela matega khu mbiyani nya wufumu.
26A di thawuludza mandza ya nyambade,
a rola simbo nya tshatsha,
khu mandza ya nyamudye, a rola gikhokhotho gya muthumi,
a songa Sisera, a mu pola hungo,
a mu pola hungo wu vbondza.
27Sisera, a di khidzima, a thega vbavbatshi huye navanava
migondroni gwaye, a fisa guralo idzo a thegidego khidzo.
28Mayi wa Sisera a di gu si wona khu vbagihogotunu,
a khevisela khu vbagihogotunu, a lila, khuye:
Khu ginani kareta yaye yi hwelago gu wuya?
Khu ginani gu hwelago gupwala sikingo nya kareta yaye.
29Sigengeli nya vagadzi vaye, va di mu phindrula,
gambe a di dzi phindrula abune, khuye:
30Ina kamwe khandri va gu kabanelana phango, gani?
Mwama ni mwama, a kabaniswa nyamahegyane moyo mwendro vavili.
Sisera a di ningwa phango nya myendra nya mavalavala nya mangi,
myendra nya mavalavala nya gulugwe,
phango nya mavalavala nya gulugwe maphuvbo mavili,
nya gumburise thamoni ga mupali.
31 Pfhumu Nungungulu,
valala vago va na fise guralo,
aholu, avo va gu golago va na khale nga lidambo,
avbo li dugago khu tshivba yaye yatshavbo.”
32Litigo li di khala gurulani gipimo nya magumana myaga.
Currently Selected:
Valamuli 5: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.