Valamuli 1
1
Gusasedwa gwa Khanani
(Josuwa 10:1-43; 14:6-15; 15:13-19)
1Hwane nya gufe ga Josuwa, va na Israyeli va di wudzisa Pfhumu Nungungulu, khavo: “Khu mani vbakari gwathu a na gu phela khuye gu gwela aya dwana ni Vakhanani?” 2Pfhumu Nungungulu a di hakha, khuye: “A na gwela Judha, kholu nyi ningede litigo leli mandzani gwaye.” 3Khavbo avbo, Judha a di embela ndriyaye Simiyoni, khuye: “Delu, hongole hi gwele hatshavbo ga litigo nyi ningidwego, gasi hiya dwana ni Vakhanani, eni neni nyi na gwela nago ga litigo u ningidwego.” Khavbo avbo, Simiyoni a di hongola naye. 4Khu guralo, Judha a di gwela, Pfhumu Nungungulu a di ningela mandzani gwaye Vakhanani gumogo ni Vaperezi a di sasela likhumi magumi mazana (10.000) vama tigoni ga Bhezeki. 5Tigoni ga Bhezeki, va di ya mana Adhoni-Bhezeki, va dwana naye va sasela Vakhanani gumogo ni Vaperezi. 6Khavbo avbo, Adhoni-Bhezeki a di thava, aholu avo va di mu tutumisa kala va mu mola, va mu pila dzinyala nya vanyaghonwe va mandzani ni migondroni. 7Khavbo avbo, Adhoni-Bhezeki a di ganela, khuye: “Livbandre na mavili magumi vafumeli va nga pidwago dzinyala nya vanyaghonwe va mandzani ni migondroni, va di gu roledzela dzitsheta dzi nga bani dzi thega khu vbamezatunu gwangu; iso nyi nga girago ga vambe, Nungungulu a nyi bweledzede esi nyi giridego.” Va di mu dzega va hongola naye Jerusalema, aya fela iyoyo.
Guwandrwa ga Jerusalema gumogo ni Hebroni
8Khavbo avbo, sanana sa Judha si di dhumela Jerusalema va sasela vavbanyi vaye khu matshari, va vbisa lidhoropa khu nilo. 9Khu hwane, masotshwa ya Judha, ma di relela ma ya dwana ni Vakhanani va nga bani va vbanya sigomoni, Negebhi ni panini. 10#Wona gambe: Jos 15:13-14. Khavbovbo, Judha a di hongola aya dwana ni Vakhanani va nga bani va vbanyela dhoropani ga Hebroni, khu gale gu nga bani gu ranwa pwani Kiriyati-Aribha, a pala Sesayi, Ayimani ni Talimayi. 11Khu gulandrela, a di ya dwana ni vavbanyi va Dhebhiri, lina laye khu gale li nga bani li ranwa gupwani Kiriyati-Seferi. 12Khavbo avbo, Kalebi a di ganela, khuye: “Uye a na dzi kodzago gu dhumela Kiriyati-Seferi, bwelo khavbo a li wandra, nyi na mu ninga nyamahegyane wangu Akisa, a khala mwangadzi waye.” 13Khu guralo, Otiniyeli, mwamana wa Kenazi, nandra wa Kalebi, a di li wandra. Khavbo avbo, Kalebi a di mu ninga nyamahegyane waye Akisa a khala mwangadzi waye. 14Akisa, gikhati a vbohidego ga mwama waye, a diya mu kutsedzela gukhuye a mu dzumedzise gu lomba lithembwe ga babe waye. Na gu tshiga khu vbaburutunu, Kalebi a di mu wudzisa, khuye: “Wa gu vbweta ginani?” 15Akisa a di mu hakha, khuye: “Nyi ninge gihiwa; kha nga u nyi ningidego gipandre gimwegyo nya gubange, nyi ninge gambe gifefe nya mati.” Khavbo avbo, Kalebi a di mu ninga sifefe sa musigomoni ni sifefe sa releloni. 16Khu guralo, sanana sa Mukine, sade wa Mosi, va di gwela gumogo ni sanana sa Judha, guya Dhoropani nya Migindru, giwulani gya Judha, gi manegelago khu phuvbo ga Marandzi ga Aradhi, vaya vbanya gumogo ni vathu va iyoyo. 17Khu guralo, Judha a di simama ni ndzila yaye gumogo ni ndriyaye Simiyoni, va di ya dwana ni Vakhanani va nga bani va vbahide Zefate va va sasela ni gumbembisa muphelo lidhoropa, va li ninga lina nya gupwani Horima. 18Judha a di wandra gambe Gaza, Asikeloni, Ekoroni gumogo ni mayigwana yawe. 19Pfhumu Nungungulu a diri ni Judha, uye a di tutumisa vavbanyi va mugigomoni, aholu vavbanyi va panini, kha nga va tutumisa, kholu va diri ni dzikareta nya dzisimbi. 20#Wona gambe: Jos 15:13-14. Va di ningela Hebroni ga Kalebi, kha nga edzi a ganedego khidzo Mosi, Kalebi a di tutumisa mule sanana siraru sa Anaki. 21#Wona gambe: Jos 15:63; 2 Sam 5:6; 1 Kor 11:4. Khu guralo, sanana sa Bhejami kha sa tutumisa Vajebhuzi va nga bani va vbanya dhoropani ga Jerusalema; Vajebhuzi va nga gu vbanya gumogo ni sanana sa Bhejami kala na muhuno.
Gusasedwa gwa Bheteli
22Sanana sa Josefa si di gwela niso, si ya dhumela lidhoropa la Bheteli, aholu Pfhumu Nungungulu a diri gumogo navo. 23Ndranga ya Josefa, yi di rumela vama guya sola lidhoropa la Bheteli, lidhoropa gale li nga bani li ranwa pwani Wenengedzo. 24Avbo, vasoli va nga wona mwama moyo a nga bani na gu duga khu dhoropani, va di mu embela, khavo: “Hi yeyedze mwanya nya gubele dhoropani, ethu kha hi na gu girela guvivba.” 25Uye a di va yeyedza nyangwa nya lidhoropa, avo va di li sasela khu matshari; aholu mwama wule ni ngamo yaye yatshavbo va di va diga va vbanya. 26Khavbo avbo, mwama yoyu a di rura a hongola tigoni ga va Vahiti, aya vbaha iyoyo lidhoropa, a li ninga lina nya gukhuye Wenengedzo, lina li nga gu simamago kala na muhuno.
Mafumbu ma ngamba sasedwa khu va na Israyeli
(Josuwa 17:11-18; 19:10-51)
27 # Wona gambe: Jos 17:11-13. Lihundzu la Manasi kha la tutumisa vavbanyi va madhoropani ya Bheti-Seyani, ambari madhoropa yaye; ambari Tahanaki, ni madhoropa yaye, ambari Dhori, ni madhoropa yaye, ambari vavbanyi va Hibiliyani, ni madhoropa yawe, ambari vavbanyi va Megidhu, aholu Vakhanani va di simama guvbanya madhoropani momo. 28Khu guralo, gikhati va na Israyeli va nga manago tshivba, kha va nga tutumisa muphelo Vakhanani, aholu va di va rwega mithumo nya gulemele. 29#Wona gambe: Jos 16:10. Lihundzu la na Efrayimi kha la nga tutumisa Vakhanani va nga bani va khala tigoni ga Gezeri, ava, va di simama guvbanya mule, vbakari ga va na Efrayimi. 30Lihundzu la Zebhuloni kha la nga tutumisa vavbanyi va Kitironi, ambari va Nahaloli; khu guralo, Vakhanani va di simama guvbanya vbakari gwawe, va di rwegwa mithumo nya gulemele. 31Lihundzu la Aseri kha la nga tutumisa vavbanyi va madhoropani ya Ako, Sidhoni, Alabi, Akizibi, Helibha, Afeka ni Reyobhi. 32Khu guralo, va na Aseri va di vbanya vbakari ga Vakhanani, a gu vavbanyi va tigoni momo; khu kotani nya olu va ngamba va tutumisa. 33Lihundzu la Nafitali kha la nga tutumisa vavbanyi va Bheti-Semesi ni va Bheti-Anati; va di vbanya vbakari ga Vakhanani, vavbanyi va tigoni mule; aholu vavbanyi va Bheti-Semesi ni va Bheti-Anati, va di rwegwa mithumo nya gulemele. 34Vaamori va di lundra lihundzu la na Dhani va va gwedzisa musigomoni, va si va dzumedzisi gu relela kovani. 35Vaamori, va di vbaha sigomoni ga Heresi, Ayijaloni ni Sahalibhini, aholu, gikhati situgulwana sa Josefe si nga mana tshivba, va di va rwegwa mithumo nya gulemele. 36Vbingano nya litigo la Vaamori wu di khugela gigomoni ga Akarabhini ni sela wuya kala Wuronga.
Currently Selected:
Valamuli 1: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
