Isaya 7

II. LIBHUKU NYA GITANGADZISO MWENDRO LA EMANUWELI

Giprofeto mayelano khu Israyeli ni Siriya

1 # Wona gambe: 2 Dzipf 16:5; 2 Dzik 28:5-6. Khu matshiguni ya Akazi, mwamana wa Jotamo, mwamana wa Uziya, mufumeli wa Judha. Rezimi, mufumeli wa Siriya, ni Peka, mwamana wa Remaliya, mufumeli wa Israyeli, va di gwela Jerusalema guya li dhumela. Aholu va diya tandrega gu li wandra.

2Khu guralo, ndranga ya Dhavhidhe yi di tiviswa gupwani: “Siriya hungide pwanano ni va na Efrayimi.” Khavbo avbo, monyo wa Akazi, wu di ndrendremela gumogo ni vathu vaye, gu fanana ni misimbo ya khabini ya gu bani yi kutsungwa khu phuvbo.

3 Pfhumu Nungungulu a di embela Isaya, khuye: “Olu duga gumogo ni mwanago Seyari-Yasube u khinga Akazi, u naya mu mana mahegiso nya sele nya litsiva li guromo Ndzilani nya lithembwe la Muhandzi, 4u naya mu embela, khuwe: Dzi wonele, rula! U nga thavi ambari gu vbela tshivba khu kotani nya sihalyana sivili si tuvigago wutshi; khu kotani nya likhulo la Rezimi gumogo ni la Siriya, ni la mwamana wa Remaliya.

5Kholu Siriya gumogo ni Efrayimi ni mwamana wa Remaliya, va hungide gikungo nya guvivbe nya gu gusasele, khavo:

6Hongoleni hi ya wugela Judha, hi mu thusedzela, hi mu wandrela litigo, hi emisa mwamana wa Tabhiyali a fuma vbakari gwawe.

7 Pfhumu Nungungulu a ngu ganela kharati, khuye:

Isoso gima kha si na girega, gambe gima kha si na dugelela.

8Kholu tsindza wa Siriya khu Dhamasiko,

Ni mufumeli wa Dhamasiko, khu Rezimi;

ndrani nya livbandre na limwedo magumi ni livbandre myaga,

Efrayimi, a na mbembiswa muphelo, a si khali gambe litigo!

9Samariya tsindza wa Efrayimi,

mufumeli wa Samariya, khu mwamana wa Remaliya,

aholu mwa gumba khodwa, khu lisine, kha mu na simama mu vbanya, gima kha mu na tiya.”

Gitumbiso khu Emanuweli

10 Pfhumu Nungungulu a di engedza a ganela ga Akazi, khuye:

11“Lomba giyeyedzo gimwegyo nya gisamadziso ga

Pfhumu Nungungulu wago,

gani khya vbavbatshi, gya guetani, mwendro gya vbatshani

damboni.”

12Akazi a di phindrula, khuye:

“Kha nyi na gira isoso,

gambe, kha nyi na linga Pfhumu Nungungulu.”

13Khavbo avbo, muprofeti Isaya, a di ganela, khuye:

Olu yingisani gwadi, enu lihundzu la Dhavhidhe;

Ina kha mu garali khu gu hodzisa mbukuta vathu, gani?

Mwa guvbweta gambe gu hodzisa mbukuta Nungungulu wangu, gani?

14 # Wona gambe: Mat 1:23. Khu guralo, Pfhumu kamwe a na gu ninga giwonegiso gimwegyo a gu egi: “Nyamahegyane nya likendzi a na khura mimba a velega gyanana nya gikhwathana, a na gi riyago lina nya gupwani Emanuweli.”

15 # Wona gambe: Dhet 32:13-14. Gi na hodza wusa ni wulombe kala gi gu vbohisa tanga nya gukodze gu nyenya esi nya guvivbe ni gu hatha esi nya sadi.

16Aholu, gyanana gegi, na gi si gu kodzi gu nyenya guvivba ni gu hatha wuwadi, mayigo ya vafumeli va vavili va gu thusedzelago ma na bani ma vbindrugedzide ma khala giwula.

Tshanisa ya Jerusalema

17Aholu Pfhumu Nungungulu a na resa gwago, vbakari ga vathu vago, gumogo ni dzindranga dza babe wago, khiyo ga mufumeli wa Asiriya, matshigu nya gu gima ma si gu manegi, gukhugela litshigu Efrayimi a nga dzi pambulago ga Judha.

18Kholu, gu na vboha litshigu Pfhumu Nungungulu a na wombago ndrodzi, a rana mabhawa ma guromo mivbinganoni nya mitsongo ya Egipito, ni dzinyosi dzi guromo tigoni ga Asiriya.

19Idzo dzi nata mbaka mikovani nya guete ni dziphagoni nya siwindri, mibani gwatshavbo, ni wuhaviseloni gwatshavbo.

20Ga litshigu lolo, Pfhumu, a na va vbalula hungoni khu gisingwana gi lombidwego, gi guromo khu khisikheyi nya tsongo, a gu uye mufumeli wa Asiriya, a na vbalulago hungo, giledzu ni mafefeleti nya mawundru yanu.

21Ga litshigu lolo, moyo ni moyo a na fuya mombe mweyo nya ngadzi ni dzinvuta dzimbili,

22iso si na dusa mahwe nya mangi, vatshavbo va na tshalago tigoni, va na hodza mahwe ni wulombe.

23Khu litshigu lile gambe, lithembwe ni lithembwe nya miuvha li gu na ni likhumi mazana (1.000) misimbo, li ninganago likhumi mazana (1.000) singerengere nya parata, li na vbindrugedza li buga miba ni sirangalabwa.

24Umomo, gu na bedwa basi khu vale va gu ni malaho ni siholoma, kholu tigoni gwatshavbo gu na bani gu khumide khu sirangalabwa ni miba.

25Ni musigomoni gwatshavbo umo gu nga bani gu limwa, u na thava ni gu gu bela khu kotani nya sirangalabwa ni miba; gu na khala basi wuhaviselo nya dzimombe ni gu gandredzedwa khu dzinvuta.

Currently Selected:

Isaya 7: BGG2014

Highlight

Copy