Isaya 39
39
Sirumwa sa Bhabhiloni
(2 Dzipfhumu 20:12-19; 2 Dzikoronika 32:23-31)
1Khu gikhati gile, mufumeli wa Bhabhiloni, Merodhaki-Bhaladhani, mwamana wa Bhaladhani, mufumeli wa Bhabhiloni, a di rumela ga Ezekhiya vathu na vari ni malangalila ni sagwati, kholu a di pwide gupwani a di gu dwala, aholu hawulugide.
2Ezekhiya a di nengela ngudzu khu silo sile, avbo a nga va dzegago a hongola navo aya va yeyedza nyumba nya thomba yaye, gumogo ni parata ni ndralama, mafura nya gutole ni mafura nya gunungele, nyumbani gwaye nya guvege matshari, ni satshavbo si nga bani si romo dzinyumbani gwaye nya guvegedzele dzithomba dzaye; gimwalo ni gimwegyo gya ndrangani gwaye ni gya tigoni gwaye, Ezekhiya a ngamba va yeyedza. 3Khavbo avbo, muprofeti Isaya a dita ga mufumeli Ezekhiya, a ta mu wudzisa, khuye: “Gasi vama vale va di khavo ginani ni gu va guta khu hayi?” Ezekhiya a di hakha, khuye: “Va guta khu ga litigo la hwindzo tigoni ga Bhabhiloni.”
4Muprofeti Isaya, a di mu wudzisa, khuye: “Ginani va gi wonidego gya nyumbani gwago?” Ezekhiya a mu hakha, khuye: “Va wonide satshavbo si guromo nyumbani gwangu, gimwalo ni gimwegyo nya thomba yangu gi nga tshala nyi ngamba va yeyedza.”
5Khavbo avbo, Isaya a di embela Ezekhiya, khuye: Nga yingisa iso si ganedwago khu Pfhumu Nungungulu nya Tshivba Yatshavbo, wari, khuye:
6Wona nya gukhuwe ma nguta matshigu gu na gu satshavbo si guromo nyumbani gwago, ni satshavbo esi nya thomba u nga tshiyedwago khu vavelegi vago si guromo kala muhuno, si na rwadwa si yiswa Bhabhiloni; gimwalo ni gimwegyo gi na tshalago, a ngu ganela Pfhumu Nungungulu.
7 # Wona gambe: Dhan 1:1-7; 2 Dzipf 24:10-16; 2 Dzik 36:10. Va na dzega sanana sago u na si velegago, si yiswa si ya khala mithenwa ya nyumbani nya wufumu ya mufumeli wa Bhabhiloni.
8 # Wona gambe: Dhan 1:1-7; 2 Dzipf 24:10-16; 2 Dzik 36:10. Khavbo avbo, Ezekhiya a di embela Isaya, khuye: “Magana ya Pfhumu Nungungulu u nyi embedego khyadi.” A engedza gambe khuye, eni nyi di gu pimisa gukheni gu na manega gurula ni gukhadzisega matshiguni nya guvbanye gwangu.
Currently Selected:
Isaya 39: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
