Isaya 21
21
Giprofeto mayelano ni Bhabhiloni
1Aya khu mahungu nya giwula gya vbafuvbi ni yiphwa:
Kholu, kha nga phuvbo nya gingulu ni gipupwane
sitago khu Marandzi,
si vbiyelago satshavbo,
musaseli a nata khu giwulani,
litigo nya guthise.
2Gu dita gwangu giwoniso nya gusamadzise ngudzu gi ta nyi embela, khigyo:
“Mukanganyisi a ngu kanganyisa, ni muphangi a ngu phanga.
Enu va na Elamo indrani mu ya dwana,
enu Vamedhiyani, randrelani lidhoropa;
dzihuwa dzawe dzatshavbo nyi ngu dzi vbedza.
3Khu guralo, nyi di pwa wuvi ngudzu,
nyipwa guvbisa kha nga nyamayi a lumwago;
nyi ngu tshaniseka avbo nyi padwago ni gu yingisa,
nyi thusedzedwa,
avbo nyi si kodzigo ni gu wona gilo.
4Monyo wangu wu ngu ghavata
nyi ndrendremela khu guthava,
wutshigu nyi nga wu vbwetago,
wu vbindrugedzide avbo gwangu
wu khala gilo nya guthise.
5Va ngu dongisela meza, va ladza malawu va hodza, va sela.
Enu vathangeli nya dzinyimbi,
khugani mu eme, dongiselani sitshangu.”
6Kholu Pfhumu a nyi embede kharati, khuye:
“Indra, u ya vega muthu a ghadha,
gasi a kodza gu tivisa satshavbo esi a na si wonago.
7A gu wona vathu na va khilede dzikavalu na vari vavili vavili,
ni vama na va khilede siburwana mwendro dzingameriya,
a na va khedze gwadi a dzi wonela gwadi.”
8Khavbo avbo, muwoneleli a di huwata kha nga nghala, khuye:
“Pfhumu, nyi emide avba vbalangwetunu gwangu nya gukhedzisele mihani yatshavbo,
nyi khala nyi khedzisela wutshigu watshavbo.
9 # Wona gambe: Gutu 14:8; 18:2. Olu, wonani! Gu nguta gikwata nya vama, vakhileli nya dzikavalu khu vavili vavili.
Khavbo avbo, uye a di khusa lito a ganela, khuye:
Thegide! Thegide Bhabhiloni;
ni sifananiso saye satshavbo nya vanungungulu
nya guvatwe,
si pandregede si mbambamela mafuni.”
10Enu vathu vangu, mu vbudwego kha nga tirigu
vbagithalatunu!
Eni nyi ngu mi embela esi nyi embedwego khu Pfhumu Nungungulu nya Tshivba Yatshavbo,
Nungungulu wa Israyeli.
Giprofeto mayelano khu Edhomi
11Gitiviso ga litigo la Edhomi,
khu Seyiri womo a nyi ranago, khuye:
“Mukhedziseli, gikhati muni gi tshadego gasi guvbela wutshigu?
Mukhedziseli, gasi gikhati muni gi tshadego?”
12Mukhedziseli a di phindrula, khuye:
“Avbo gugyago, gwa guta gambe wutshigu;
mwa guvbweta gu wudzisa nyaluphye, mu ngu dzi kodza guta muta wudzisa.”
Giprofeto mayelano khu Arabhiya
13Egi khu gitiviso nya gusasedwe litigo la Arabhiya.
Enu vaendri va tigoni ga Dhedhani,
mu ya ghovago khabini ga Arabhiya,
14enu vavbanyi va Temani, khingani ni mati vale va thavidego,
va tshanganiseni mu va ninga guhodza.
15Kholu avo va gu thava matshari,
wulaho wu ghwimbidwego
ni nyimbi nya guthise.
16Kholu Pfhumu a nyi embede, khuye:
Ndrani nya mwaga moyo, wu fananago ni gikhati nya guningane ni egi muthumi a thodwego guthuma,
satshavbo esi vavbanyi va Kedhari va dzi zundzago khiso, si na mwalalega.
17Mitshaledwa nya dzindrena dza Kedhari va kodzago
gu dwana khu siholoma, va na vbungudwa ngudzu,
kholu eni Pfhumu Nungungulu wa Israyeli, nyi ganede kharato.
Currently Selected:
Isaya 21: BGG2014
Highlight
Share
Copy
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
