Hoseya 2
2
Litshigu nya gutsetselelane
1Aholu va na Israyeli, tengo wawe wu nga na gu simama gu andra nga fungu wa phwani wu si kodzwigo gu pimwa ambari gu sayedwa. Aholu, avbo gu nga bani gu ganedwa gupwani: “Enu mu dirisi vathu vangu.” Va na embedwa pwani: “Enu mu vathu va Nungungulu a vbanyago.” 2Va na Israyeli ni va na Judha, va na tshangana gumogo, va dzi hathela muthangeli moyo basi, va na duga tigoni, kholu litshigu la Jezireyeli li na bani na liri likhongolo ngudzu. 3Ranani vandriyanu nya vama, khenu: “Vathu vangu” ni vandriyanu nya vanyamayi, khenu: “Sigodwa sangu.”
Tsayiso ni guwusedzwa ga Israyeli
4Kawukani mayi wanu,
mu kawukeni,
kholu uye khandri mwangadzi wangu,
eni neni kha nyiri nyi mwama waye.
Mu layeni a duse wuphuphulu khovbeni gwaye,
ni gu hambana ni wubhayi maveleni gwaye.
5Kholu a gumba si diga eni nyi na mu tshulela dzitshalu,
nyi mu tshiya kha nga litshigu a velegidwego khilo,
a fanana ni giwula,
a vbindrugedza a khala mafu nya gihala,
nyi mu songa khu lidora.
6Sanana saye kha nyi na si sayisa khu lihaladzo,
kholu sanana sa wubhayini gwaye.
7Kholu mayi wawe bhayide,
uye a nga va velegago, giride silo nya dzitshoni,
kholu a di khuye:
“Nyi na landrela sibhayi sangu,
si nyi hodzisago ni gu nyi sedza mati,
va nyi ninga myendra nya gufurumele,
myendra nya seda, mafura nya guhodze ni mati.
8Khu guralo, nyi na tshika ndzila yaye
khu miba;
nyi na yi bhiya khu laba gasi
a si dzi mani dzindzila dzaye nya guvbindre khumo.
9A na landrisela sibhayi saye,
aholu kha na si mana;
a na si vbweta, aholu kha na si mana.
Khavbo avbo, a na ganela, khuye:
Nyi na bwelela ga mwama wangu nya guhegule,
kholu nyi diri tshukhwana
guvbindra edzi nyi guromo khidzo olu.
10Uye kha dziti
gukhuye kheni
nyi mu ningidego tirigu,
vhinya ni mafura,
nyi mu engedzede ndralama ni parata,
a nga si thumisago guphasela khiso Bhahali.
11Khu guralo, khu gikhati nya guvbwere,
nyi na mu dzegela tirigu yangu,
ni vhinya yangu khu gikhati nyi gi emisedego,
Nyi na mu wandrela myendra nya gufurumele neyi nya seda,
a nga bani na gufenengedza khiso wumbwiri waye.
12Nyi na mu thela dzitshoni
mbeli ga sibhayi saye;
mwalo a na gu mu vbulugisa mandzani gwangu.
13Nyi na fuvisa gutsaka gwaye gwatshavbo,
ni mibuzo yaye, nya Gumege nya Ngima,
nya dzisabhadho, ni yatshavbo mibuzo yaye.
14Nyi na pilelela misimbo yaye yatshavbo nya vhinya,
ni mikandzu yaye,
a gu iyo a gukhuye: Owu khu tshatshazelo wangu
nyi nga ningwa khu sibhayi sangu;
aholu eni nyi na mi gira misimbo nya likhabi,
yi hodzwa khu sirengo nya likhabi.
15Nyi na mu tsayisa khu kotani nya olu uye
a nga girago matshigu nya khuwo
nya guvbisele libani Vabhahali
a dzi mburisela khu dziphera ni wulungu,
a landrisela sibhayi saye
aholu a divaledwa khu eni,
a ngu ganela Pfhumu Nungungulu.
16Khu guralo, mu woneni nyi na mu kotola,
nyi mu dzega nyi mu yisa giwulani,
nyi ya ganela naye khu lihaladzo .
17Nyi naya mu bweledzela marembwe yaye nya miuvya,
nyi vbindrugedza kova wa Akori,
wu khala nyangwa nya gitumbo.
A naya embelela kha nga matshiguni nya wumbiri waye,
ni litshigu a nga dugago khilo khu tigoni ga Egipito.
18 Pfhumu Nungungulu a ngu ganela, khuye:
“Khu litshigu lolo, u na nyi rana khuwe mwama wangu;
khu na nga nyi rana gambe, khuwe: Bhahali wangu.
19Nyi na dusa kanani gwago
malina ya Vabhahali,
malina yawe khu na ma dundruga gambe.
20Khu litshigu lolo, nyi na gira khu avo
gidzumeledzwano
ni sirengo nya likhabi,
ni sinyoni sa damboni,
ni esi nya gukhwirire khu lididi mafuni,
nyi na fuvisa tigoni dzinyimbi, wulaho ni matshari,
va na lala ligovbe nya gutenge!
21Nyi na gu dzega u khala mwangadzi wangu kala gupindruga;
nyi na dzegana nago khu lisine ni gululama,
khu lihaladzo ni gutsetselelana.
22Nyi na gu dzega u khala mwangadzi wangu
khu gutumbega,
gambe u na muti Pfhumu Nungungulu
23 # Wona gambe: Rom 9:25; 1 Ped 2:10. Khu litshigu lolo, Pfhumu Nungungulu a ngu ganela, khuye:
Eni nyi na ninga phindrulo Ndzadzini,
ni Ndzadzini, gu na ninga phindrulo mafuni.
24Mafu ma na ganela ni tirigu,
vhinya ni mafura,
iso niso si na ninga phindrulo Jezireyeli.
25Eni mune kamwe, nyi na dzi yalela
vathu vangu tigoni
nyi na pwela gisiro wule nyi nga mu rana kheni
Nyamba-godwa, (khu Gihebheru, gutshamuswago pwani: Lo-Ruwama);
Wule nyi mu ranago kheni khandri vathu vangu, (Lo-Ami) nyi na mu embela, kheni:
Uwe u vathu vangu! Ni uye a na ganela, khuye:
Uwe u Nungungulu wangu!
Gitonga DC Bible © Bible Society in Mozambique, 2014.