Esiteri B
B
Khwepa nya nayo nya gumbembise Vajudha
14 Lidangalila li di lovidwe kharati, pwani: «Asuwero, mufumeli nya khongolo, ga sandza sa mufumeli, ni ga vamwamangulu nya sipandrengulu satshavbo nya lizana ni magumavili na livbandre na sivili gukhugela Indiya kala Etiopiya, nyi ngu ruma esi si landrelago: 15 Ambari ulo nyi gu mufumeli nya talo nya mayigo, nyi khozisidego mafu yatshavbo, aholu kha nyi vbweti gu thumisa khu ndrwadza wugulu nya tshivba yangu. Nya gu vbweta gu fuma khu mapimo ni gu pwela wuhindzi, nyi hungide gukheni vathu va tigoni gwangu va vbanye mugutangalani gikhati gyatshavbo, ni gukheni tigoni gwangu gwatshavbo gu manege gurula ni gukhadzisega kala mivbinganoni, ni gukheni gurula gu vbwetwago khu vathu vatshavbo gu buge.
16 Nyi wudzisede madhota ni manganagana yangu yatshavbo gukheni nyi na dzi kodza kharini gu gira esi. Moyo wawe a ranwago pwani Hamani, a vbindrago vatshavbo khu guti ni gutumbega, uye a guromo wulanga nya guhegule hwane ga mufumeli, 17 a nyi tiviside gukhuye vomo vathu va gu nani mapimo nya guvivbe va swayegidego vbakari nya vathu nya mayigo yatshavbo, va nani tumbunugo nya mavbanyelo ni sihena si hambanago ni mambe mafumbu, gikhati gyatshavbo va gu yeyisa milayo ya mufumeli. Khu magirelo yoyo, va gu ghohetela pwanano hi wu vbahago mufumoni gwathu. 18 Nyi tivisidwe gambe gupwani vathu vovo va gu dzi kasa phuvbo va dzi hambanisa ni mafumbu yatshavbo nya vathu, ni gupwani khu tumbunugo nya milayo yawe, va na ni mavbanyelo nya guhambane, ma wugelago esi hi si golago ethu, va gu gira guvivba gwatshavbo, va wusa pfilupfilu tigoni nya mufumu wathu. 19 Khu kotani nya satshavbo sesi, nyi ngu ruma gukheni vatshavbo vale mu embedwago umo nya lidangalila la Hamani, mwama nyi mu thangisidego mbeli nya silo sangu satshavbo, hi mu wonago kha nga babe nya wuvili, vatshavbo va na fuviswe va vbela, gumogo ni vagadzi vawe ni sanana sawe khu litshari la valala wawe, nyamba pwedwa wuhindzi, khu litshigu nya likhumi na mana nya ngima nya wuvili, wu ranwago pwani Adhari, mwagani momu. 20 Khu magirelo yoyo, valala va vbanova ni va muhuno va na gurumedzwe gu relela gumogo, litshigu la limwedo, phalani nya vafi, gasi ga matshigu ma ngu gutago, mufumu wathu wu tiye, wu vbelela gu tangala.» 21 Wumbe khwepa nya nayo yoyu, wu di rumedwa ga sipandrengulu satshavbo ni ga mafumbu yatshavbo gasi va dzi dongisela ga litshigu lile. 22 Myango yi di rumedwa khu givbiredza khu nayo wa mufumeli, wu dugede likhokholani la Suza, gasi mufumeli ni Hamani va di khala vbavbatshi va sela; aholu dhoropani ga Suza gu diri ni pfilupfilu.
Currently Selected:
Esiteri B: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.