Muhevbudzi 8
8
Mapimo nya wu wuthu
1Khu mani a fananago ni muthu nya guti,
a wutigo tshamuselo nya mahungu?
Muthu nya guti, khovbeni gwaye gu ngangamela,
gu vbindrugedza ni makhalelo yaye.
2Nyi ngu gu embela, kheni: Vegisa nayo wa mufumeli,
kha nga idzo u sambanyidego khidzo mbeli ga Nungungulu.
3U nga vbiredzeli gu khuga mbeli gwaye,
u nga kanyisi u simama gu gira ogu gu vivbidego,
kholu uye a ngu kodza gu gira iso a si golago.
4Lito la mufumeli li na ni tshivba; khu mani a yelago
gu mu kawuka, khuye: “Ginani u girago?”
5Uye a landrisago milayo, gima kha na wona guvivba;
muthu nya guti, a ngu giti gikhati ni magirelo.
6Silo satshavbo si na ni nango ni magirelo yaye,
aholu guvivba ga muthu gu ngu mu lemela.
7Kholu uye kha giti ginani gi na mu dugelelago.
Ni guti gukhuye khu mani a na gu mu tivisago edzi silo si na mu dugelelago khidzo.
8Mwalo muthu a gu ni tshivba nya gufumele womi waye,
mwendro a kodzago gu emisa litshigu nya gufe gwaye,
mwalo a na gu vbulugago ga nyimbi yoyo,
ni gighohi kha gi na vbuluga khu sighoho saye.
9Satshavbo sesi nyi si wone gikhati nyi nga pimisa
khu mithumo yatshavbo yi girwago mafuni momu,
muthu nya tshivba a gu fumela mumbe muthu
gasi gu mu tshanisa.
Silo si garadzago gu si pima
10Nyi wonide gambe sighohi na si gu dzingwa gwadi
si mana gu hefemula,
aholu va nya gululama, vale va nga bani va bela
ni gu duga wulangani nya guage,
va divadwa dhoropani mule va giridego umo mithumo ya yadi. Isoso niso gu dzi pfhadza.
11Kholu gulamudwa ga va nya guvivba
kha gu vbiredzi gu vboha,
khu kharalo, myonyo ya vathu ya gu dogorela silo
nyamba sadi.
12Gighohi gya gu ghoha lizana dzinyondro,
ambari gya gu vbanya matshigu nya gutale mafuni,
eni nyi ngu dziti khu lisine gukheni avo va thavago
Nungungulu va na dugelela,
kholu va ngu mu thumela.
13Gasi gighohi gima kha gi na katega,
ambari gu mana matshigu nya gulaphe;
gi na mwalalega nga mwedzi, kholu kha gya thava Nungungulu.
14Gyomo gambe gimbe gilo gi gumba phasa gilo tigoni momu,
a gu egi:
Vomo va lulamidego va manago tshatshazelo nya sighohi,
ni sighohi si manago tshatshazelo
wa va nya gululama.
Nyi ngu ganela gukheni esi niso gu dzi pfhadza.
15Khu guralo, eni nyi ngukheni, gutshambide
vathu va gu mana gutsaka mafuni momu,
kholu gi mwalo gimbe gilo gi gu gyadi ga muthu guvbindra gu hodza,
u sela, u nengela.
Isoso si fanede gu mu bangaladza thumoni gwaye matshiguni
yaye a ningidwego
guvbanya khu Nungungulu mafuni momu.
Mahegiso nya muthu
16Nyi dzi garadzide khu tshivba yangu yatshavbo khu
gu vbweta guti,
ni gu pima ni gu khevisela satshavbo esi vathu va girago,
mafuni momu;
kholu vomo va si manigo ligovbe wutshigu ni mihani.
17Khu guralo, nyi di wona thumo watshavbo
wu giridwego khu Nungungulu mafuni momu
gukheni vathu kha va kodzi gu wu pima
ambari muthu a dzi garadzago khu gu wu vbwetedzela,
kha dzi kodzi gu wu mana, ambari vale va gukhavo
va gengede kha va wu mani.
Currently Selected:
Muhevbudzi 8: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
