Dhewuteronome 14
14
Sirengo si agidego niso nya gunyenyeze
(Levhi 11:1-47)
1 # Wona gambe: Levh 19:21; 21:5. Enu mu sanana sa Pfhumu Nungungulu wanu. Khu guralo, mu nga hatshedwi dzindrova milini gwanu, ambari guvbaludwa ndzudzu hungoni gwanu khu kotani nya gufe muthu nya gukari. 2#Wona gambe: Eks 19:5-6; Dhet 7:6; Tit 2:14; 1 Ped 2:9. Kholu mu vathu va agidego mahoni ga Pfhumu Nungungulu wanu, gambe Pfhumu Nungungulu a mi hathide vbakari nya mayigo yatshavbo ya mafuni, gasi mu khale vathu Vaye.
3Mu nga hodzini gilo nya gunyenyeze. 4Sirengo mu yelago gu hodza, khesi: Mombe, nvuta, phongo, 5mbavala, mbalapala, mangulwe, yisya, sangu, nyari ni gipene. 6Mu na hodzani sirengo satshavbo si gu ni sitsendro nya gupandrwe, si khala sitsendro sivili, na si gu tsagudzela si midza si bhisela si si wuyisa si ta tsagudza gambe nyawuvili. 7Gambe, vbakari nya esi si tsagudzago si bhisela si tsagudzela nyawuvili, na siri ni sitsendro nya gupandrwe, mu si yeligo gu hodza khu esi: Ngameriya, gihulo nya likhabi ni gihulo nya gufuywe, kholu sa gu tsagudzela si bhisela si tsagudzela nyawuvili aholu sitsendro sawe kha sa pandrwa, isoso si nyenyezide gwanu. 8Mu nga hodzini khumba, ambari yi gu ni sitsendro nya gupandrwe, aholu kha yi tsagudzeli nyawuvili, yi nyenyezide gwanu. Esi mu nga hodzi nyama yawe, ambari gu kuha girumbi gyawe.
9Mu na hodzani satshavbo si guromo matini, a gu esi: Satshavbo si gu na ni dziphesa ni magwaru. 10Aholu satshavbo si gu mwalo dziphesa ni magwaru mu nga si hodzi; si nyenyezide avbo gwanu.
11Hodzani sinyoni satshavbo si agidego. 12Aholu, iso mu si yeligo gu hodza, khesi: Lighama, nyamatate, likotane, ligodza, 13vamakoti nya mafumbu yatshavbo, pfhokwane, vamariyane gukhedza khu mafumbu yawe; 14vamahigonganye nya mafumbu yatshavbo, 15limbowa, ndrewulewu, ligwilili gukhwdza khu mafumbu yawe, 16gisungurukhuru, lipfuhule, gigurwani, nyamangondrongondrwane, sivaga gukhedza khu mafumbu yawe; 17litembe, ligumba ni lisekwa, 18mafumbu yatshavbo nya dzikalahoni, ngulukulu ni likoha nyamanganane, ni mafumbu yaye.
19Ni sirengwanana satshavbo si vbuvbago si nyenyezide gwanu. Mu nga si hodzini. 20Sinyoni satshavbo si agidego hodzani.
21Mu nga hodzini ni girengo gimwegyo nya gufe gyabune.#14:21 Girengo nya gufe gyabune: Gu thudwa girengo gi ngafa nyamba khu gu sindzwa; sirengo nya gusongwe khu gu khokhotwa. Adiri masongelo nya sirengo nya miphaso nya vathu Vakhanani. Nungungulu a ngu himbedzela gu hodza nyama nya sirengo nya gufe nyamba khu gu sindzwa. Mu ngu dzi kodzani gu gi ningela ga muluveli, a vbanyago dhoropani gwago, gasi a gi hodza, mwendro gu gi rengisa ga muthuyo, kholu mu vathu mu agidego mahoni ga Pfhumu Nungungulu wanu. U nga phuli phongo khu mahwe ya mayi waye.#14:21 Mu nga phuli giphongwana khu mahwe ya mayi waye: Adiri magirelo nya miphaso ya vakhanani nya gulombe gunonisa mafu ma ninga mihandro nya gutale. Nungungulu a ngu himbedzela va na Israyeli gu yeyedzedzela miphaso yeyi.Wona gambe: Eks 23:19; 34:26.
Miningelo nya gipandre nya likhumi gasi gu thumela Pfhumu Nungungulu
(Levhi 27:30-33; Mitengo 18:20-32)
22Guvbwetega u ningela gipandre nya likhumi nya mihandro yatshavbo nya dzimbewu dzago, eyi u vbwerago thembweni gwago khu mwaga ni mwaga. 23Mbeli ga Pfhumu Nungungulu wago, ga wulanga a wu hathidego gasi gu vega avbo Lina laye, u na hodza gipandre nya likhumi nya tirigu yago, nya vbinyu yago, mafura yago ni matiwula nya dzimombe dzago ni dzinvuta dzago; gasi u hevbule gu ninga githawo matshigu yatshavbo Pfhumu Nungungulu wago. 24Gikhati Pfhumu Nungungulu wago, a gu kategisago, ndzila ya gulapha ngudzu, nyamba dzi kodza gu dzega hwengo wago, khu gu nu gu vbanya hwindzo ni wulanga wule Pfhumu Nungungulu wago, a wu hathidego gasi gu vega avbo Lina laye, 25avbovbo u na si rengisa, u dzega mandzani gwago dzitsapawu dzakone, u hongola wulanga wule Pfhumu Nungungulu wago, a wu hathago. 26Dzitsapawu dzodzo, u na renga khidzo satshavbo u na si golago khu monyo wago: dzimombe mwendro dzinvuta, vbinyu mwendro wadwa nya tshivba, mwendro ni gevbini gilo gi na godwago khu monyo wago; u na gi hodza nuri vbafuvbi ni Pfhumu Nungungulu wago, gambe u na nengela, uwe gumogo ni ndranga yago; 27Khu guralo, u nga digi gu sayisa mulevhi a vbanyago dhoropani gwago, kholu mwalo gipandre mwendro thomba vbakari gwanu.
28Guvbelani nya mwaga ni mwaga nya wuraru, u na dusa sipandre satshavbo nya likhumi nya handro nya mwaga nya wuraru, u si yisa dhoropani gwago. 29#Wona gambe: Levh 27:30-33; Mit 18:21. Khavbo avbo, a nata mulevhi (a gu mwalo gipandre ambari thomba vbakari gwago), muluveli, khulungu ni noni; va guromo dhoropani gwago, va na hodza va khura, gasi Pfhumu Nungungulu wago, a gu kategise ga yatshavbo mithumo ya mandza yago.
Currently Selected:
Dhewuteronome 14: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
