Dhewuteronome 11
11
Situmbiso ni sitsayiso
1U na gola Pfhumu Nungungulu wago, matshigu yatshavbo u vegedza milayo yaye, sileletelo ni sirumo saye. 2Dzitini muhuno gukhenu kha nyi ganeli ni sanana sanu, (avo va gumba siti, va ngamba si wona iso mu nga hevbudzwago khu Pfhumu Nungungulu wanu,) wugulu waye, mandza yaye nya tshivba ni libogo laye nya gukhugege; 3#Wona gambe: Eks 7:8-12,13. siwoniso saye, ni mithumo a giridego ga Vagipiti, ni ga Faro, mufumeli wa Egipito, ni tigoni gwaye gwatshavbo; 4#Wona gambe: Ezek 14:23. niso a giridego ga dzinyimbi dza Vagipiti, ga dzikavalu dzawe ni ga dzikareta dzawe, a nga va mbembisa matini nya Yiphwa nya Gufuvile, gikhati va nga bani va gu lundra va na Israyeli, Pfhumu Nungungulu a di va mbembisa kala litshigu la muhuno; 5niso a giridego giwulani kala muta vboha avba. 6#Wona gambe: Mit 16:31-32. Niso a nga girelago Dhatani ni Abhiramo, sanana sa Eliyabhi, nya lihundzu la Rubheni; idzo mafu ma nga hamago khidzo ma va midza gumogo ni mapango yawe, mitshatsha yawe ni vatshavbo va nga emago navo, vbakari ga va na Israyeli vatshavbo; 7maho yanu ma wonide thumo nya wukhongolo wu giridwego khu Pfhumu Nungungulu.
Mihandro nya guyingise
8Khu guralo, vegedzani milayo yatshavbo nyi mi leletelago muhuno, gasi mu mane tshivba nya gubeleni muya fumela litigo muyago ga ilo; 9gasi mu engedzedwa matshigu nya guvbanye ga litigo eli Pfhumu Nungungulu, a tumbisidego khu gusambanya gu ninga vababe vanu ni ga livelego lawe, litigo li gogago mahwe ni wulombe. 10Kholu litigo mu yago ga ilo kha li fanani ni litigo la Egipito, mu dugidego khumo, omu mu nga phaya mbewu yanu, mu yi theledzela mati khu migondro yanu, kha nga idzo va theledzelago khidzo lithembwe. 11Aholu litigo mu yago mu ya li fumela, litigo nya sigomo ni mikova; li naganiswago khu mati nya ndzadzi yi thegago khu ndzadzini; 12litigo li sayiswago khu Pfhumu Nungungulu wanu, maho ya Pfhumu Nungungulu wanu, momo avbovbo gikhati gyatshavbo, gukhugela guphelani kala guhegisani nya mwaga.
13Khu kharato, mwa gu yingisa khu lisine milayo yangu muhuno nyi mi leletelago, nya guhaladzeni Pfhumu Nungungulu wanu, ni gu mu thumela khu monyo wanu watshavbo ni hefemulo wanu watshavbo, 14nyi na wisa ndzadzi tigoni gwanu khu gikhati gi vbwetegago, ndzadzi nya maronga ni ndzadzi nya girame, mu kodze guvbwera tirigu yanu, gasi mu mane vbinyu nya yiphya ni mafura. 15Nyi na bugisa mwasi wuhaviseloni nya sifuyo sanu, gambe mu na hodza mu khura.
16Dzi woneleni myonyoni gwanu, gasi mu si phazamiswi mu thumela vambe vanungungulu, mu noga mbeli gwawe. 17#Wona gambe: Bambe Levh 26:3-5; Dhet 7:12-16; 28:1-14. Kholu Pfhumu Nungungulu a na mi gorogela, a sega ndzadzini yi siwi ndzadzi, mafu ma si ningi mihandro yaye, gasi mu mbemba khu guvbiredza ga litigo nya ladi eli Pfhumu Nungungulu a mi ningago.
Guvegedza gidzumeledzwano
(Dhewuteronome 27—28)
18Vegisani magana yaya yangu myonyoni gwanu ni hefemuloni gwanu; ma hungeni kha nga giyeyedzo mawogoni gwanu ni siwomboni gwanu. 19Hevbudzani sanana sanu, mu ganela khayo na mu khade vbavbatshi dzindrangani gwanu, mwa gu gimbila ndzilani, avbo mu lalago, ni avba mu wugago. 20#Wona gambe: Dhet 6:6-9. Ma loveni umo nya mihasimo nya dzinyumba dzanu, numo nya malimba yanu, 21gasi matshigu yanu ni matshigu ya sanana sanu, ma andriswe ga litigo eli Pfhumu Nungungulu, a tumbisidego khu gusambanya gu li ningela ga vababe vanu, gasi mu khale umo kala gupindruga.
22Kholu, mwa gu vegedzani milayo yeyi yatshavbo nyi mi leletelago gasi mu yi vegedza, mu haladza Pfhumu Nungungulu wanu, mu gimbila khu dzindzila dzaye dzatshavbo, na mu gu dzi ningedzela gwaye, 23Pfhumu Nungungulu a na lundra vathu vava vatshavbo, mu na pala mayigo nya makhongolo ma gu ni tshivba ngudzu guvbindra enu. 24Wulanga watshavbo mu na gandrago khu migondro yanu, wu na lumba enu, litigo lanu lina khugela giwulani kala Libhanoni, gukhugela tsongo wa Ewufrate, kala ga yiphwa ya Muhwadambo, wu na bani wuri vbingano wanu. 25#Wona gambe: Jos 1:3-5. Mwalo muthu a na tiyago mbeli gwanu; Pfhumu Nungungulu wanu, a na thela hwanga ni gundrendremela ga vathu va litigo mu na belago khu kotani gwanu, kha nga edzi a mi embedego khidzo.
Gikategiso ni givalo
26Wonani gukhenu, muhuno nyi na vega mbeli gwanu gikategiso ni givalo a gu esi: 27Mu na katega, mwa gu landrisani milayo ya Pfhumu Nungungulu wanu, nyi mi leletelago muhuno; 28givalo, mwa gumba landrisani milayo ya Pfhumu Nungungulu wanu, mu diga ndzila eyi muhuno nyi mi leletelago, mu landra vambe vanungungulu mu si vatigo. 29#Wona gambe: Dhet 27:11-14; Jos 8:33-35. Khu guralo, avbo Pfhumu Nungungulu wago a na gu vbohisago tigoni u na guya li fuma, avbovbo, u naya huwelela gikategiso vbatshani nya gigomo gya Gerizimi, gasi givalo u na ya gi huwelela vbatshani nya gigomo gya Ebhali. 30Sigomo sesi sa gu manegela tshatugo nya tsongo wa Joridhani, khu phuvbo ga Pfoladambo, tigoni ga Vakhanani, va vbanyago Arabha, mbeli ga Giligali, vbafuvbi ni miguhu ya More. 31Kholu, mu na tshatuga tsongo wa Joridhani gasi mu bela ga litigo Pfhumu Nungungulu wanu, a mi ningago. Mu na ya li dzega li khala lanu mu vbanyani umo. 32Khu guralo, khathalelani gu landrisa milayo ni sileletelo satshavbo muhuno nyi mi lovelago.
Currently Selected:
Dhewuteronome 11: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
