2 Samuweli 2
2
Dhavhidhe a ngu emiswa gu khala mufumeli wa Judha
(1 Samuweli 16:1-13)
1Khu hwane nya esi, Dhavhidhe a di wudzisa ga Pfhumu Nungungulu, khuye: “Ina nyi na gwela ga lidhoropa nya gukari la Judha, gani?” Pfhumu Nungungulu a di mu hakha, khuye: “Indra.” Dhavhidhe, khuye: “Nyiya hayi?” A di phindrudwa gupwani: “Hebroni.” 2#Wona gambe: 1 Sam 25:42-43. Dhavhidhe a di phara ndzila a hongola Hebroni, gumogo ni vagadzi vaye va vavili, Ayinowami wa Jezereyeli, ni Abhigayili, noni ya Nabhali, wa Karimelo. 3Dhavhidhe a di dzega gambe vama vaye nya masotshwa, gumogo ni mapango yawe, ma ya vbaha madhoropani ya Hebroni. 4#Wona gambe: 1 Sam 31:11-13. Khavbo avbo, vama va na Judha, va di hongola iyoyo vaya todza Dhavhidhe, gu khala mufumeli wa Judha. Khu guralo, va di embela Dhavhidhe gukhavo vathu va Jabhesi-Gileyadhi khavo va nga dzingago Sawule. 5Khavbo avbo, Dhavhidhe a di rumela myango ga vathu va Jabhesi-Gileyadhi, a va embela, khuye: “Pfhumu Nungungulu, a na mi kategise kholu mu giridego wuwadi ga mune wanu Sawule, kholu mu mu dzingidego! 6Khu guralo, Pfhumu Nungungulu, a na tumbege ni gu mi girelani wuhindzi; eni neni nyi na mi girelani wuwadi wowo, kholu mu giride silo nya sadi. 7Gasi olu mandza yanu ma na mane tshivba, mu khale vama nya dzindrena, kholu, Sawule mune wanu, songidwe, aholu va nyumbani ga Judha, va nyi todzide gu khala mufumeli vbatshani gwawe.”
Abhineri a ngu wumbela Isobhoseti gu khala mufumeli wa Israyeli
8Aholu Abhineri, mwamana wa Neri, muthangeli nya nyimbi ya Sawule, a di dzega Isobhoseti, mwamana wa Sawule, a mu yisa Mahanayimi, 9a mu wumbela gu khala mufumeli wa Gileyadhi, ni Asuri, ni Jezereyeli, ni Efrayimi, ni Bhejami ni Israyeli gwatshavbo. 10Isobhoseti, mwamana wa Sawule, a diri ni tanga nya magumana myaga gikhati a phedego gu fumela Israyeli, fumide myaga mivili; aholu vathu nya linyumba la Judha va di landrela Dhavhidhe. 11Matshigu Dhavhidhe a fumidego, a nga fumago linyumba la Judha dhoropani ga Hebroni, ma diri livbandre na mivili myaga ni livbandre na moyo migima.
Dhavhidhe a ngu pala Isobhoseti
12Abhineri, mwamana wa Neri, ni valandreli va Isobhoseti, mwamana wa Sawule, va di khuga khu Mahanayimi va hongola Gibheyoni. 13Jowabhi, mwamana wa Zeruwa, ni valandreli va Dhavhidhe, va di duga va va khinga vaya tshangana navo vbafuvbi ni lidhamo la Gibheyoni, ava kheno, vambe khisikheyi nya lidhamo la Gibheyoni. 14Abhineri a di embela Jowabhi, khuye: “Ma na khuge madzaha ma dwana mbeli gwathu.” Jowabhi a di hakha, khuye: “Ma na khuge.” 15Khavbo avbo, ma di khuga ma hidzimelelana khu tengo nya guningane likhumi na vavili, nari va na Bhejami a gu gipandre gya Isobhoseti, mwamana wa Sawule, ni likhumi na vavili, khu ga valandreli va Dhavhidhe. 16Muthu ni muthu a di phara khu hungo nala waye, va payana dzimbambo khu matshari yawe, va thega gumogo vbavbatshi; va di rana wulanga wule khavo Helikati-Azurumi,#2:16 Helikati-Azurumi; gu tshamusela gupwani wulanga nya gudwane khu matshari mwendro migala. wu khadego vbafuvbi ni Gibheyoni. 17Khu litshigu lolo gu di manega nyimbi nya guthise ngudzu; aholu Abhineri, ni vathu vaye, va di sasedwa khu vathu va Dhavhidhe.
Abhineri a ngu songa Asayeli
18Vbale gu diromo sanana siraru sa Zeruwa, a gu Abhisayi, Jowabhi ni Asayeli; Asayeli a diri ni migondro nya guvbevbuge kha nga yisya ya khabini. 19Asayeli a di lundra Abhineri, huye ghwe khu hwane gwaye nyamba khedza nyamudye ambari nyambade. 20Abhineri na khedzide hwane, a di khuye: “Khuwe Asayeli, gani?” Asayeli a hakha, khuye: “Ina kheni.” 21Khavbo avbo, Abhineri a di mu embela, khuye: “Ndreya uya phuvbo ga nyamudye mwendro ga nyambade u mola moyo nya madzaha u wandra matshari yawe.” Aholu Asayeli kha nga dzumela gu hambana naye. 22Khavbo avbo, Abhineri a di engedza a embela Asayeli, khuye: “Ndreya khu hwane gwangu; wa gu vbweta gukhuwe, nyi gu paya u thega vbavbatshi, gani? Nyi na hapfhula kharini maho yangu nyi khedzana ni ndriyago Jowabhi?” 23Ambari khu guralo, Asayeli a di bomba gu ndreya; khavbo avbo, Abhineri a di mu paya khu tshokha nya litshari khu vbambambotunu, litshari li di vbondza khu hwane gwaye a thega afela avbovbo. Vatshavbo avo va nga bani va gu vbindra khu wulanga wule a nga thegela avbo Asayeli afa, va diya ema. 24Aholu Jowabhi ni Abhisayi, va di simama gu lundra Abhineri; avbo li nga pfolago lidambo, va di vboha gigomoni gya Ama, gi nga khedzana ni Giya, khu ndzila nya giwula gya Gibheyoni. 25Va na Bhejami va di tombana va landra Abhineri, vaya wumba tsawa moyo, vaya ema khu gigomotunu. 26Khavbo avbo, a di laledza a embela Jowabhi, khuye: “Ina matshari ma na simama ma vbedza vathu, gani? Uwe khu dziti gukhuwe, guhegisani gu na manega tshanisa, gani? Kala lini u na digago gu embela vathu va landrelela vandriyawe?” 27Jowabhi a di hakha, khuye: “Nyi ngu sambanya khu Pfhumu Nungungulu a vbanyago, kheni! Naripwani khwa nga ganela isoso, vathu vava va sa diga gu lundra vandriyawe kala dzimindru dza mindru.” 28Khavbo avbo, Jowabhi a di womba pundru, vathu vatshavbo va ema, va si lundri gambe va na Israyeli; gima kha va nga dwanisana gambe. 29Abhineri ni vathu vaye va di gimbila wutshiguwule watshavbo panini; va tshatuga tsongo wa Joridhani, va tsemakanya litigo latshavbo la Bhitoroni, va vboha Mahanayimi. 30Jowabhi nuye a di bwelela khiyo nya gulundre Abhineri, aya tombanisa vathu vaye vatshavbo, gu kenegela likhumi na livbandre na vana vama va Dhavhidhe, nyamba saywa Asayeli. 31Gani olu, vathu va Dhavhidhe, va di songide mazana mararu ni livbandre na limwedo magumi (360) va na Bhejami ni va na Abhineri. 32Va di dzega Asayeli, vaya mu dzinga thowoni ga babe waye li nga bani liri Bhetlehema; Jowabhi ni vathu vaye vatshavbo va di gimbila wutshigu watshavbo wule, gu yagya na vari Hebroni.
Gitonga DC Bible © Bible Society in Mozambique, 2014.