1 Makabhewu 14
14
Gufa ga Dhemetriyo nya wuvili (II)
1Khu mwaga nya lizana ni livbandre na mavili magumi na mivili (172), mufumeli Dhemetriyo a di tombanisa masotshwa yaye yatshavbo a gu bela tigoni ga Medhiya, gasi guya dongisela masotshwa nya guengedzele aya yaye gasi guya dwana litunga ni Trifoni. 2Aholu Arisase, mufumeli wa Perisiya ni Medhiya, avbo a dzitidego nya gukhuye Dhemetriyo bede tigoni gwaye, a di rumela muthangeli waye nya dzinyimbi gasi guya mu mola a wuya naye na gu vbanya. 3Uye a di ta dhumela dzinyimbi dza Dhemetriyo a dzi pala, a gu mola Dhemetriyo a mu yisa ga Arisase, uye aya mu khothela pasoni.
Simoni a ngu zundzwa
4Gu manegide gurula tigoni ga Judha
matshigu yatshavbo nya guvbanye ga Simoni;
uye a di vbweta gukhadzisega ga vathu vaye,
mafumelo yaye ma tsakiside vatshavbo, ni
ndruma yaye yi di pwala ngudzu.
5Ga mithumo yaye yatshavbo nya wuzundzo,
engedzede khu owu nya guwandre Dzope
a gu gira lisiwo, a tula kharato dzindzila
nya guye sidwani sa phwani.
6A di engedzela gu andrisa mivbingano nya litigo laye,
a di vbohisa mufumo waye ga vathu vatshavbo,
7ni gu dzegisa sibotshwa nya singi, wandride Gezeri ni Bheti-Suri
ni likhokhola, a ma agisela guvivba gwawe gwatshavbo,
mwalo na moyo a nga mu tiyelago.
8Muthu ni muthu a di lima petoni gwaye na rude,
mafu ma di ninga dzimbewu dzaye, ni misimbo ya mahangeni
yi di ninga mihandro yaye.
9Vagulu nya vathu va di khala vbavbatshi mitendrelani,
va gu ganela khu gudandra nya litigo;
vathu vaphya va di ambala dzingandzu nya wufumu
ni gipani nya wusotshwa.
10A di resa guhodza madhoropani, a gu ma ninga
malungelo nya gu dzi vhikele.
Ndruma yaye yi pwade kala mahegiso nya mafu.
11Vbahide gurula tigoni gwaye,
Israyeli a di kulungela khu gunengela.
12Muthu ni muthu a di hefemula mutsani nya kandzu
mwendro nguhu waye,
nyamba garadzwa khu muthu.
13Valala va tigoni gwaye va di fuviswa,
ni vafumeli va gikhati gile va di padwa.
14Emede va nya gusolega va tigoni gwaye,
a gu khatalela gu sayisa nayo gikhati gyatshavbo,
a di mbembisa vathu vatshavbo nya guvivbedwe khu monyo.
15Wuside gungangamela nya Nyumba ya Nungungulu
a gu engedzela thomba ya Wulangani nya Guage.
Guwusedzwa nya pwanano ni Roma ni Esparita
16Mahungu nya gufe ga Jonatane ma di vbiredza gu vboha Roma, kala ni Esparita, ma gu wusa wusiwana nya wukhongolo. 17Aholu, avbo va dzitidego gukhavo ndriyaye tshikedzide wulanga waye kha nga khongolo nya vaphasi nya mhamba ni gukhavo a ngu fumela litigo madhoropani gwatshavbo, 18va di mu lovela avbo nya gikete nya sugu, gasi gu wusedza pwanano nya gidzumeledzwano va nga girago khu gale, va nga hungago ni vandriyaye Judha ni Jonatane.
19Malangalila yaya, ma di hevbudwa ndrani nya tshangano nya huwo wa Jerusalema. 20Mahungu nya eli li nga rumedwago khu Vaesparita, khaya:
“Vafumeli ni lidhoropa la Esparita ga Simoni, Khongolo nya Vaphasi nya mhamba, ga madhota, ni vaphasi nya mahamba ni litigo la Judheya, a gu vandriyathu, hi ngu mi losani khethu: Gurula ni womi! 21Myango mu yi rumedego tigoni gwathu, yi dzude yi ta hi embeledzela mahungu nya wuzundzo ni wudhumo wanu, ni ethu hi di nengela ngudzu khu gu vboha gwawe. 22Hi lovide mabhukuni nya mufumo, mawonelo va nga ta hi ningago gasi gu hevbudwa khu tshangano. Numeniyo, mwamana wa Antiyoko, ni Antipatiro, mwamana wa Jasane, va dzude eno gwathu na va gu rumedwa khu Vajudha, gasi guta wusedza pwanano nya wundruye va gu nawo khu gale ni ethu. 23Tshangano wu dzumede gu hakha khu wuzundzo sirumwa si residego mahungu, ni gu vega lidangalila nya magana yawe mabhukuni nya mufumo, gasi ma khale na ma gu dundrugwa khu vathu va Esparita. Khu mahungu yaya, hi ngu rumela lidangalila limwedo ga Simoni, Khongolo nya Vaphasi nya mhamba.” 24Hwane nya satshavbo sesi, Simoni a di rumela Numeniyo Roma, ni gitshangu nya gikhongolo nya ndralama, nya gulemele na giri ni likhumi mazana (1.000) dzimina, gasi guya wusedza pwanano ni Varoma.
Simoni a ngu tidwa kha nga muthangeli nya vathu
25Na va pwide silo sesi, vathu va di khavo: “Giwonegiso muni u na ningago Simoni ni sanana saye nya gu va bonge. 26Uye ambari ni vandriyaye gumogo ni ndranga ya vavelegi vaye, va dzi wonegiside vari dzingwazi, khu gu pala valala va Israyeli ni gu tiyisa gutshulega gwawe.” Va di betha milowo avbo nya gikete nya sugu, va ya gi vega vbakari nya siwindri nya gialakanyiso gi vegiswago gigomoni gya Siyoni. 27Aya khu mahungu nya milowo yoyo: Khu litshigu nya likhumi na livbandre na mararu, nya ngima nya Eluli, nya mwaga nya lizana ni livbandre na mavili magumi na mivili (172), mwaga nya wuraru nya thumo wa Simoni tigoni ga Asarami kha nga Khongolo nya vaphasi nya mhamba, 28tshanganoni nya wukhongolo nya vaphasi nya mhamba, ni vathu, ni vathangeli nya litigo ni madhota, gu di vegwa mahungu yaya: 29Na gu manegide dzinyimbi nya gusimamise tigoni gwathu, Simoni, mwamana wa Matatiya, gitugulwana gya Joyaribi, gumogo ni vandriyaye, va di dzi ningela dzimhangoni va tsaramisana ni valala va lihundzu lawe va fela guvbanyisa Nyumba ya Nungungulu ni nayo, va gu khusedza kharato vathu vawe, va gu va ninga wudhumo nya wukhongolo ngudzu. 30Jonatane tshanganiside vathu vatshavbo a gu khala khongolo nya vaphasi nya mhamba, olu hongode aya patana ni vababe vaye. 31Valala va dzinide gu dhumela litigo va fela gu li sasela ni gu nyenyezisa malanga nya guage, 32aholu, a di dugelela Simoni, a di dwana litunga a dwanela vathu vaye, vbedzide gipandre nya gikhongolo nya thomba yaye gasi gu ninga matshari vadwani nya nyimbi, ni gu va livba. 33Tiyiside madhoropa ya Judheya ni Bheti-Suri, li khalago vbinganoni, gale li nga bani liri likhokhola nya matshari ya valala; a di vega avbo tsawa nya masotshwa nya Vajudha va li vhikela. 34Khu magirelo ya mamowo, a tiyiside Dzope, lidhoropa li khalago bambe ni yiphwa, ni Gezeri, vbinganoni ni Asidhodhi, gale gu nga bani gu vbanya umo valala, a di vega umo tsawa nya masotshwa nya Vajudha gasi gu li vhikela, a gu yisa umo satshavbo si vbwetegago gasi gu li vhikela.
35Vathu na va wone gutumbega ga Simoni ni wudhumo a dzinidego gu ninga litigo, va di mu hatha gu khala muthangeli ni khongolo nya vaphasi nya mhamba, khu kotani nya satshavbo a giridego, ni gululama, ni gutumbega gwaye ga litigo laye, ni olu a nga zama khu maphuvbo yatshavbo gu khusedza vathu vaye. 36Matshiguni nya guvbanye gwaye, khu tshivba nya libogo laye, fuviside va nya mayigo, tigoni gwaye, a bhobha avo va nga bani va gundrela Didhoropa la Dhavhidhe Jerusalema, wulanga va nga bani va vbahide avbo likhokhola lawe, avbo va nga bani na va khuga khavbo gasi guya nyenyezisa dzinyangwa nya Nyumba ya Nungungulu, ni gu gandredzela vbavbatshi guaga gwaye gwatshavbo. 37Simoni a di vega mule masotshwa nya Vajudha gasi gu li vhikela, a li tiyisa gasi gu vhikela litigo ni lidhoropa, a di khusedza mabhiyo ya Jerusalema.
38Mufumeli Dhemetriyo, a di tiyisa Simoni thumoni nya muphasi nya khongolo nya mhamba, 39a mu vega tengoni nya dzipari dzaye nya gutumbege, ni gu mu ninga githawo nya gikhongolo. 40A di pima khu lisine nya gukhuye Varoma va di rana Vajudha khavo vandriyawe, dzipari dzawe ni vangana vawe nya gidzumeledzwano, ni gukhuye va hakhide khu wuzundzo vale va nga rumedwago khu Simoni. 41A di dziti gambe gukhuye, Vajudha ni vaphasi vawe nya mhamba, va dzumede gukhavo Simoni a khale muthangeli wawe ni khongolo nya vaphasi nya mhamba gikhati gyatshavbo, kala gu vboha Muprofeti nya gutumbege, 42a nata pharago ndronga nya guthangele dzinyimbi, a na gu sayisago wuphasi nya mhamba, a gu vegedzela vathangeli nya mithumo yatshavbo, nya sipandrengulu nya litigo, ni vawoneleli nya matshari ni makhokhola; 43a nata gimbidzisago wuphasi nya mhamba, a na ta yingedwago khu vatshavbo, oyu sigiro satshavbo nya mufumo si na lowago khu lina laye, a na gimbilago na ambade mwendra nya giwunguwungu ni dziphera nya ndralama. 44Khu guhegisa, kha gu na dzumedziswa muthu vbakari nya litigo, mwendro vbakari nya vaphasi nya mhamba, guganedza esi a nga hungago uye, mwendro gu yeyisa milayo yaye, mwendro gu ramba vathu tigoni nyamba phela khu gudzumedziswa khuye, mwendro gu ambala mwendra nya giwunguwungu ni lisindra nya ndralama. 45Ni wevbini muthu a yeyisago mwendro gu ndraga milayo yaye, a na ningwa nandru. 46Vathu va di gola khu gudzina gwawe gu ninga tshivba yatshavbo yeyi ga Simoni, gasi a fumele gukhedza khu milayo yeyi. 47Simoni a di dzumela na gu bonga, gu gimbidzisa thumo nya wuphasi nya khongolo nya mhamba, ni gu thangela dzinyimbi, ni gu fumela Vajudha ni vaphasi nya mhamba, ni gu andrisa mufumo waye ga vathu vatshavbo.
48Va di pwanana gukhavo mahungu yaya yatshavbo ma lovetedwa bwelo khavbo ma khandrwa vbagiketetunu nya sugu, ma vegwe wulanga nya guwonwe khu vatshavbo, ndrani nya Nyumba ya Nungungulu. 49Gu diga nya isoso, va pwanana gambe gukhavo gimbe gikete nya milowo ya yimweyo, gi ya vegwa wulanga nya kwama nya thomba, gi lumba Simoni ni sanana saye.
Currently Selected:
1 Makabhewu 14: BGG2014
Highlight
Share
Copy
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.