Mateo 24
24
Templuta juchutsiyänanpä kanqanta Jesús willanqan
Marcos 13.1-2; Lucas 21.5-6
1Templupita yarquskir Jesús aywaykaptinmi discïpulunkuna rikatsiyarqan templu kuyayllapä kanqanta.
2Tsaymi Jesús nirqan: <<Rasunpam nï: Kay llapan rikayanqaykita chipyaqmi juchutsiyanqa. Manam ni juk rumillapis pirqaraykar quëdanqatsu>>.
Manarä kutimuptin imanö kananpä Jesús ninqan
Marcos 13.3-13; Lucas 21.7-19
3Tsaypitam Olivos jirkanman aywaykur Jesús jamakurqan. Tsaychömi kikillankuna kaykar discïpulunkuna tapuyarqan: <<Taytay, willaykayämay. ¿Imaytä ninqaykinö kanqa? Kutimunaykipä y kay patsa ushakänanpä ¿ima señaltä kanqa?>>
4Jesúsnam nirqan: <<Cuidädutä pipis engañayäshunkiman. 5Atskaqmi jutïchö shamur niyanqa: <Noqam Cristo kä>. Tsaynö nirmi atskaq runakunata engañayanqa. 6Guërra kaptinpis y guërra kananpä kanqanta musyarpis ama mantsayaytsu. Puntataqa tsaykunarämi kanqa. Tsaynö kaptinpis kay patsaqa manarämi ushakanqarätsu. 7Juk nacionmi juk nacionwan guërrata rurayanqa y juk marka runakunam juk marka runakunawan wanutsinakuyanqa. Tsaynöllam [pestipis,] mallaqaypis, terremötupis maytsaychö kanqa. 8Tsay ñakaykunaqa qallaykunanllarämi kanqa.
9<<Tsay witsanmi ñakatsiyäshunki y wanutsiyäshunki. Noqa raykurmi pïmaypis chikiyäshunki.#Mat. 10.22. 10Tsaynö ñakarmi yärakuyanqanta atskaq jaqiyanqa. Paykunaqa yärakuqkunata chikirmi autoridäkunaman jukninta juknintapis apatsiyanqa. 11Llulla profëtakunapis atskaq yurimurmi llutanta yachatsir atskaq runakunata engañayanqa. 12Maytsaychöpis jutsata rurar kawarmi kuyanakuyanqanatsu. 13Peru wanuyanqanyaq yärakuqkunaqa salvashqam kayanqa.#Mat. 10.22. 14Tayta Diospa mandakuyninpa alli willakuyninta maytsay nacionkunachöpis willakuyaptinrämi kay patsa ushakanqa.
Ñakaykuna kananpä kanqanta Jesús tantiyatsinqan
Marcos 13.14-23; Lucas 21.20-24
15<<Profëta Daniel qellqanqannöllam Tayta Dios mana munanqanta sagrädu templuchö rikayanki.#Dan. 9.27; 11.31; 12.11. (Kay qellqanqäta liyiqkunaqa shumaq tantiyakuyätsun.)#24.15 Kay qellqanqäta liyiqkunaqa shumaq tantiyakuyätsun ninqanqa manam Jesucristo ninqantsu kaykan, sinöqa kay libruta qellqaq Mateo yapanqanmi. 16Tsaynö kaykaqta rikar Judea markakunachö täraqkuna jirkakunapa qeshpir aywakuyätsun. 17Wayi jananchö kaykaqkuna#24.17 Tsay witsanmi wayita qatananpa rantin terrädu jananman tsaqllaskir mituwan lashtayaq. Tsay jananchönam awakuyaq, aqakuyaq y trïgutapis akrayaq. imankunatapis mana jipir aywakuyätsun. 18Chakrachö kaykaqkunapis ni punchun jipiqpis ama kutiyätsuntsu.#Luc. 17.31.
19<<¡Ay imanörä ñakayanqa qeshyaq warmikuna y llullu wamrayuq warmikuna! 20Tayta Diosta mañakuyay qeshpiyanqayki junaq tamya killachö ni jamay junaqchö mana kananpä. 21Tsay witsanqa runakuna pasaypam ñakayanqa. Tayta Dios kay patsata kamanqanpita manam imaypis tsaynöqa ñakayashqatsu.#Dan. 12.1; Apoc. 7.14. Tsaynöllam yapayqa manana imaypis tsaynö ñakayanqanatsu. 22Akranqan runakunata kuyaparmi Tayta Dios tsay ñakay junaqkunata päsatsinqa. Mana päsatsiptinqa llapanpis wanurmi ushakäyanqa.
23<< <Tayta Dios mandamunqan Cristo kaychömi kaykan> niyäshuptikipis ama criyiyankitsu. <Washachömi kaykan> niyäshuptikipis ama cäsuyankitsu. 24Tsay witsanmi Cristo tukuqkuna y llulla profëtakunapis yuriyämunqa. Runakunata criyitsiyänan raykurmi espantaypä milagrukunatapis rurayanqa. Tsaynö rurarmi Tayta Dios akranqan runakunatapis engañayta munayanqa. 25Manarä tsaynö kaptinmi musyayänaykipä willaykä.
26<< <Tayta Dios mandamunqan Cristo desiertuchömi kaykan> niyäshuptikipis rikaq ama aywayankitsu. <Tsay wayichömi kaykan> niyäshuptikipis ama criyiyankitsu. 27Illaqukuptin ciëlupa juk kuchunpita jukaq kuchunyaq atsikyanqanta rikayanqannömi Runapa Tsurin kutimuptin llapanpis rikayanqa.#Luc. 17.23-24. 28Maychöpis wanushqakuna jitaräyanqanmanmi wiskurkuna qorikäyanqa>>.#24.28 Tsaynö nirmi Jesucristo tantiyatsirqan ninqankuna maytsaychöpis päsananpä kanqanta.#Luc. 17.37.
Jesús kay patsaman kutimunanpä kanqan
Marcos 13.24-37; Lucas 17.26-30, 34-36; 21.25-33
29<<Pasaypa ñakaykuna päsaskiptinnam rupaypis tsakaskinqa, killapis atsikyanqanatsu, qoyllurkunapis shushuyämunqa y ciëlupis siksikyanqa.#Isa. 13.10; 34.4; Eze. 32.7; Joel 2.10, 31; 3.15; Apoc. 6.12-13. 30Tsaypitanam Runapa Tsurin shamunanpä señal ciëluchö rikakämunqa. Runapa Tsurin shamuptinnam pukutay jananchö pasaypa chipipiykar poderyuq shamuykaqta maytsaychöpis runakuna rikayanqa. Tsaynö shamuykaqta rikarmi llapan nación runakuna mantsarir waqayanqa.#Dan. 7.13; Apoc. 1.7. 31Cornëtata jinchipa tukamuptinmi angelninkunata Runapa Tsurin mandamunqa akranqan kaqkunata maytsaypitapis qoriyämunanpä.
32<<Hïgus plantata rikar tantiyayay. Raprankuna tseqllimuptinmi usya tiempu qallananpäna kanqanta musyayanki. 33Tsaynöllam ninqänö päsanqanta rikar musyayanki Tayta Diospa mandakuynin cercachöna kanqanta. 34Rasunpam nï: Kanan tiempu runakuna manarä ushakaptinmi llapan ninqäkuna cumplinqa. 35Ciëlu y kay patsa ushakaptinpis noqa ninqäkunaqa manam ushakanqatsu.
36<<Runapa Tsurin imay junaq imay höra kutimunanpä kanqanta manam runapis ni angelpis [ni Diospa Tsurinpis] musyayantsu. Tsaytaqa Papänillämi musyan.
37<<Noé kawanqan witsan runakuna kawayanqannömi#Gén. 6.5-8. Runapa Tsurin shamunqan witsanpis kawayanqa. 38Diluviu manarä kaptin arcaman Noé yaykunqan junaqyaqmi runakuna mikur, upyar y casarar kayarqan. 39Tsaynö kaykäyaptinmi diluviu illaqpita shamuptin#Gén. 7.6-24. llapanpis shenqaypa wanur ushakäyarqan. Tsaynöllam mana musyayanqan höra Runapa Tsurinpis illaqpita shamunqa.
40<<Tsay höram ishkaq runakuna chakrachö aruykäyaptin jukaqta pushanqa y jukaqtana dëjanqa. 41Maraychö ishkaq warmikuna aqakuykäyaptinmi jukaqta pushanqa y jukaqtana dëjanqa. 42Tsaymi alistakushqallana kayänayki. Manam musyayankitsu imay junaq Señorniki kutimunanpä kanqantapis.
43<<Tantiyayay. Imay höra suwa shamunanpä kanqanta musyarqa mana punuypam wayinta pipis täpanman. 44Tsaynölla qamkunapis alistakushqalla kayay. Mana musyayanqayki höram illaqpita Runapa Tsurin shamunqa.#Luc. 12.39-40.
Sirviqman Jesús iwalatsinqan
Lucas 12.41-48
45<<Mas yärakunqan y yachaq sirviqnintam wayinman patronnin churan wakin sirviqkunatapis höranchö qarananpä. 46Patronnin kutimur yätsinqannö llapantapis ruraykaqta tariptinmi tsay sirviq pasaypa kushikunqa. 47Rasunpam nï: Tsay sirviqninpa poderninmanmi llapan imaykantapis patronnin churanqa. 48Peru mana confiakuypä sirviq karmi sïqa <patronnï manarämi kutimunqarätsu> nir 49sirviq mayinkunata maqan y upyaq mayinkunawan mikur upyar jitaräkun. 50Tsaynö kaykaptinmi mana yarpanqan höra illaqpita patronnin kutimur 51mana kuyapaypa allish tukuq runakunatawan juntu tsay sirviqninta castiganqa. Tsaychömi pasaypa waqar kiruntapis uchunqa>>.
Currently Selected:
Mateo 24: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.