Juan 19
19
1Tsaynö niyaptinmi Jesústa Pilato castigatsirqan. 2Soldädukunanam kashapita corönata awaskir Jesúspa umanman jatitsiyarqan. Tsaynöllam granäti cäpata aqshutsiyarqan.#19.2 Granäti cäpataqa reykunallam jatikuyaq. 3Tsaypitanam Jesústa laqyar niyarqan: <<¡Alabashqa katsun Israel runakunapa mandaqnin rey!>>
4Tsaypitanam despächunpita yapay yarqaskamur Pilato nirqan: <<Tantiyakuyay. Apayämunqayki runapa ima jutsantapis manam tarïtsu. Tsaymi jutsaynaq kanqanta tantiyakuyänaykipä jipimushä>>.
5Tsaynö nirmi Jesústa jipimurqan kasha corönan jatishqata y granäti cäpan jatishqata. Tsaymi Pilato nirqan: <<¡Kay runata rikayay!>>
6Jesústa rikaykurmi mandaq sacerdötikunawan templu cuidaq wardiakunapis jinchipa niyarqan: <<¡Crucificay! ¡Crucificay!>>
Tsaynö niyaptinmi Pilato nirqan: <<Kikikikuna crucificayay. Noqa manam ima jutsantapis tarïtsu>>.
7Tsaynö niptinmi niyarqan: <<Diospa Tsurin kanqanta niqkuna wanutsishqa kananpämi leynïkunachö nin. ¡Tsaynö kaptinqa tsay runa wanutsishqa katsun!>>
8Tsaynö niyaptinmi Pilato pasaypa mantsarirqan. 9Tsaymi despächunman kutiykur Jesústa yapay tapurqan: <<¿Qam maypitatä kanki?>>
Tsaynö tapuptin Jesús manam imatapis parlakurqantsu. 10Pilatunam nirqan: <<¿Manaku imatapis contestamanki? Crucificatsinäpä o dëjanäpäpis poderyuq kanqäta ¿manaku musyanki?>>
11Jesúsnam nirqan: <<Qampa podernikiman Tayta Dios mana churamaptinqa imata ruramänaykipäpis poderniki manam kanmantsu. Tsaymi podernikiman entregamaq runa qampita mas jutsayuq kaykan>>.
12Tsaynö niptinmi Pilato dëjayta munarqan. Peru Israel runakunapa autoridäninkuna masrämi qayaräyarqan: <<¡Kay runaqa rey tukurmi mandaq Césarpa contran kaykan! ¡Payta dëjarqa qampis Césarpa contranmi kanki!>>
13Tsaynö niyaptinmi Jesústa waqtaman jipiskatsimur Gábata ninqan punkuman aywaykur Pilato jamarqan. (Hebreo idiömachöqa Gábata ninqanqa <<läja rumikunawan rurashqa>> ninanmi.) 14Tsay höraqa pullan junaqnömi karqan. Tsay tardim Pascua fiestachö jamay junaq qallaykunanpäna karqan.#19.14 Israel runakunapäqa mushuq junaq las seis de la tardim qallaykurqan. Tsaychömi Pilato nirqan: <<¡Mandakuqniki reyta rikayay!>>
15Paykunanam jinchipa niyarqan: <<¡Wanutsun! ¡Wanutsun! ¡Crucificay!>>
Pilatunam nirqan: <<¿Reynikitaku crucificatsishä?>>
Mandaq sacerdötikunanam niyarqan: <<¡Noqakunapa mandakuqnï reyqa Césarllam! ¡Paypita mas juk reyqa manam kantsu!>>
16Tsaynö niyaptinmi munayanqannö Jesústa crucificayänanpä soldädukunata Pilato mandarqan. Tsaymi Jesústa apayarqan.
Jesústa crucificayanqan
Mateo 27.32-44; Marcos 15.21-32; Lucas 23.26-43
17Cruzta umrurkatsirmi Calavëra niyanqan sitiuman Jesústa apayarqan. Hebreo idiömachöqa Calavëra ninqantam Gólgota niyan. 18Tsayman chaykatsirnam Jesústa crucificayarqan. Tsaynöllam ishkay runakunatapis Jesúspa ishkan lädunman crucificayarqan.
19Tsaypitanam juk letrëruta qellqarkur cruzpa puntanman Pilato clävatsirqan. Tsay letrëruchömi nirqan: <<Nazaretpita Jesús, Israel runakunapa mandaqnin rey>>.
20Jerusalénpa cercallanchö crucificashqa kaptinmi tsay letrëruta Israel runakuna atskaq liyiyarqan. Tsay letrëruqa hebreo, latín y griego idiömakunachömi qellqashqa karqan. 21Tsaymi mandaq sacerdötikuna Pilatuta niyarqan: << <Israel runakunapa mandaqnin rey> nirqa ama qellqaytsu. Tsaypa rantinqa <Israel runakunapa mandaqnin rey kanqantam kay runaqa nirqan> nir qellqay>>.
22Pilatunam nirqan: <<Qellqanqäqa qellqashqanam>>.
23Crucificaskirnam Jesúspa röpankunata chuskuq soldädukuna rakipänakuyarqan. Rurin kaq röpan costüraynaq kaptinmi 24niyarqan: <<Kaytaqa ama rachishuntsu. Tsaypa rantinqa mayqantsikpis apakunapä suertiyashun>>.
Tsaynöpam Tayta Diospa palabran cumplirqan. Tsaychömi nin: <<Röpätapis rakipänakuyashqam. Mayqanpis apakunanpämi suertiyayashqa>>.#Sal. 22.18. Tsay ninqannöllam soldädukuna rurayarqan.
25Crucificaraykanqan kaqchömi kaykäyarqan Jesúspa maman, mamanpa ñañan, Cleofaspa warmin María y María Magdalenapis. 26Mamanta y kuyanqan discïpulun puntanchö kaykaqta rikaykurmi Jesús nirqan: <<Mamay, paynam wamrayki kanqa>>.
27Tsaypitanam kuyanqan discïpuluntana nirqan: <<Kananpitaqa mamaykitanö cuidaykullanki>>.
Tsaynö ninqanpitam wayinman pushaykur mamantanö cuidarqan.
Jesús wanunqan
Mateo 27.45-56; Marcos 15.33-41; Lucas 23.44-49
28Llapanpis cumplishqana kanqanta musyarmi Tayta Diospa palabranta cumplinanpä Jesús nirqan: <<¡Yakunämi!>>#Sal. 69.21.
29Tsaychömi witsi junta pochquq vïnu kaykarqan. Tsaymi hisöpu jachaman esponjata watarkur tsay pochquq vïnuman tullpurkur Jesúspa shiminman wititsiyarqan. 30Tsay vïnuta yawarkurnam Jesús nirqan: <<Llapantanam cumplirqü>>.
Tsaynö niskirnam wanuskirqan.
Jesústa tuksinqan
31 Pascuachö jamay junaq qallaykunanpäna kaptinmi#19.31a Pascuaqa las seis de la tardim qallaykurqan. Israel runakunapa autoridäninkuna pipis crucificaraykar quëdananta munayarqantsu. (Pascuachö jamay junaqqa pasaypa sagrädum karqan.) Tsaymi Pilatuta rugayarqan cruzchö clävaraykaqkunapa chankankunata pakiskir cruzpita jipiyänanpä.#19.31b Cruzchö clävaraykaqkunapa chankankunatam pakiyaq ras wanunanpä. Pakiskiyaptinnam shütananpä ichiyta mana puëdir wanuyaq. 32Rugayanqanta awniptinmi soldädukuna aywaykur Jesúswan crucificaraykaq runakunapa chankankunata pakiyarqan. 33Jesús wanushqana kaykaqta rikaykurmi paypa chankankunataqa pakiyarqannatsu. 34Tsaypa rantinmi juk soldädu lanzawan costädunpa tuksirqan. Tuksiskiptinmi yawarwan yaku jinan höra yarqaskamurqan.
35Llapan tsaykunatam rikarqä. Tsaymi imanö kanqantapis qellqä salvamaqnintsik Cristo kanqanta qamkunapis criyiyänaykipä. Llapan qellqanqäkunaqa rasun kaqmi. 36Tayta Diospa palabranmi nin: <<Manam ni juk tullullantapis pakinqatsu>>.#Éxo. 12.46; Núm. 9.12; Sal. 34.20.
Llapan tsaykunam päsarqan Tayta Diospa palabran cumplinanpä. 37Tsaynöllam Tayta Diospa palabran nin: <<Tuksiyanqantam rikayanqa>>.#Zac. 12.10.
Jesústa pampayanqan
Mateo 27.57-61; Marcos 15.42-47; Lucas 23.50-56
38Tsaypitanam Arimatea markapita José jutiyuq runa Pilatuta rugakur nirqan: <<Jesúspa ayanta pampanäpä dëjapaykamay>>.
Josépis Jesúspa discïpulunmi karqan. Peru Israel autoridäkunapita mantsapakurmi musyatsikurqantsu. Mañakunqanta Pilato awniptinmi Jesúspa ayanta pampaq aparqan. 39Tsaymanmi Nicodemupis aywarqan kimsa arröbanö mïrra y áloe takushqata#19.39 Mïrra karqan jachapa weqinmi. Áloepis juk jacham karqan. Tsaykunatam Israel runakuna tsakiskatsir ñuchqu aqayaq. Tsaytam ayaman wiñayaq mana asyänanpä. apakurkur. Ñöpatam Nicodemo tsakayllapa Jesúswan parlaq aywarqan.#Juan 3.1-2. 40Israel runakunapa costumbrinkunamannömi Joséwan Nicodemo tsay apayanqankunata säbanasman wiñarkur Jesúspa ayanta pituyarqan.
41Jesústa crucificayanqan lädunchömi juk huerta karqan. Tsaychömi pitapis manarä pampayanqan mushuq sepultüra karqan.#Mat. 27.60. 42Jamay junaq qallaykunanpäna kaptinmi tsay sepultürallamanna Jesústa pampayarqan.
Currently Selected:
Juan 19: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.