Juan 20
20
Jesús kawamunqan
Mateo 28.1-10; Marcos 16.1-8; Lucas 24.1-12
1Semäna qallaykunan wäraynam#20.1 Tsay junaq domingum karqan. María Magdalena tsaka tsakalla Jesús pamparanqan kaqman aywarqan. Chaykurmi sepultüra tsaparaq rumi wititsishqa kaykaqta tarirqan. 2Tsayta rikaykurmi cörrilla kutirqan Simón Pedruta y Jesús kuyanqan discïpuluta willananpä. Chaykurmi willarqan: <<¡Jesúspa ayantam apayashqa! ¡Manam musyayätsu maypa apayanqantapis!>>
3Tsaynam Jesús kuyanqan discïpulu y Pedro Jesústa pampayanqan kaqman aywayarqan. 4Cörrilla aywarmi jukaq discïpulun Pedruta llalliskir puntata charqan. 5Sepultüra punkullapita qawaykurmi säbanasllana qoturaykaqta rikarqan. 6Qepanta Simón Pedro chaykurnam ruriman yaykuskir säbanasllatana paypis tarirqan. 7Jesúspa umanta watayanqan tëlatapis shumaq doblashqatam uman kanqan läduchö churaraykaqta tarirqan. 8Tsaypitarämi puntata chaq discïpulupis ruriman yaykurqan. Paypis tsaykunata rikaykurmi criyirqan. 9Tsaynö kaykaptinpis manam tantiyayarqanrätsu kawamunanpä Tayta Diospa palabran ninqanta. 10Tsaypitanam patsaräyanqan wayiman kutikuyarqan.
María Magdalenata Jesús yuripunqan
Marcos 16.9-11
11Maríanam pamparanqan kaqman kutiykur punkuchö waqar quëdarqan. Waqaykanqanchö sepultürata qawaykurmi 12rikarqan ishkay angelkuna yuraq röpashqa kaykaqta. Jukaq Jesúspa uman kanqan kaqchö jamaraykarqan y jukaqnam chakin kanqan kaqchö jamaraykarqan. 13Tsay angelkunam Maríata tapuyarqan: <<¿Imanirtä waqaykanki?>>
Tsaynö tapuyaptinmi nirqan: <<Señornïpa ayantam apayashqa. Manam musyätsu mayman churayanqantapis>>.
14Tsaynö nir tikraykunqanchömi Jesústa rikarqan. Peru manam pay kanqanta tantiyarqantsu. 15Jesúsnam tapurqan: <<¿Imanirtä waqaykanki? ¿Pitatä ashiykanki?>>
Tsaynö tapuptinmi huertachö aruq runa kanqanta yarpar María nirqan: <<Taytay, maymanpis Jesúspa ayanta apashqa karqa qorikamunäpä willaykallämay>>.
16Jesúsnam nirqan: <<¡María!>>
Tsaynö niptinmi María tikraykur nirqan: <<¡Raboni!>>
Hebreo idiömachö raboni ninanqa yachatsikuq ninanmi.
17Jesúsnam nirqan: <<Ama tsarimaytsu. Papänï kaqman manarämi aywarqürätsu. Kananqa discïpulükunata willay Papänïman kutikunäpäna kanqanta. Noqapa Papänïqa qamkunapapis Papänikim y Diosnïqa qamkunapapis Diosnikim>>.
18Tsaynö niptinmi María Magdalena ras aywarqan Jesús yuripunqanta y imata ninqankunatapis discïpulunkunata willananpä.
Discïpulunkunata Jesús yuripunqan
Mateo 28.16-20; Marcos 16.14-18; Lucas 24.36-49
19Tsay paqasmi discïpulunkuna juk wayichö qorikashqa kaykäyarqan. Israel runakunapa autoridäninkunata mantsarmi punkuta trancapakushqa kaykäyarqan. Tsaychö kaykäyaptinmi Jesús yuriskir nirqan: <<Alli kaway qamkunachö kaykullätsun>>.
20Tsaynö nirmi makinta y costädunta rikatsirqan. Jesústa rikaykurmi discïpulunkuna pasaypa kushikuyarqan. 21Jesúsnam yapay nirqan: <<Alli kaway qamkunachö kaykullätsun. Papänï mandamanqannöllam noqapis qamkunata mandaykä>>.
22Tsaynö nir paykuna kaqman pükaykurmi nirqan: <<Espíritu Santuta chaskiyay. 23Pitapis jutsankunapita perdonayaptikim Tayta Dios perdonanqa. Peru mana perdonayaptikim sïqa Tayta Dios perdonanqatsu>>.#20.23 Kay versïculum nin: Qamkuna poderyuqmi kayanki criyimaqkunata Tayta Dios perdonanqanta willayänaykipä y mana criyimaqkunata Tayta Dios mana perdonanqanta willayänaykipä.#Mat. 16.19; 18.18.
Jesúswan Tomás tinkunqan
24Discïpulunkuna juntaraykäyanqanman Jesús chänan höra Millish niyanqan Tomás manam karqantsu. Payqa Jesúspa apostolninmi karqan. 25Tomáswan tinkurnam discïpulu mayinkuna willayarqan: <<¡Señor Jesucristum yuripayämashqa!>>
Tomásnam nirqan: <<Clävu uchkunqan makinta manarä rikarqa, tsayman dëdüta manarä jatirqa y tuksiyanqan costädunman makïta manarä jatirqa manam criyishätsu>>.
26Tsaypita juk semäna päsaskiptinnam discïpulunkuna yapay juk wayiman qorikäyarqan. Tsaychömi Tomáspis kaykarqan. Punkuta trancapakushqa kaykäyaptinmi Jesús paykunapa puntanchö illaqpita yuriskir saludar nirqan: <<¡Alli kaway qamkunachö kaykullätsun!>>
27Tomástanam nirqan: <<Tomás, makïta rikay. Clävu uchkunqanman dëduykita jatiy. Tuksiyämanqan costädümanpis makikita jatiy. ¿Imanirtä criyinkitsu?>>
28Tomásnam nirqan: <<¡Señorllä y Diosllä!>>
29Jesúsnam nirqan: <<¿Rikaykamarräku criyinki? ¡Mana rikamarpis criyiqkunaqa kushishqam kayanqa!>>
Kay libruta imapä qellqanqanpis
30Discïpulunkuna rikaykaptin atska milagrukunatam Jesús rurarqan. Tsaykuna manam llapantsu kay libruchö qellqashqa kaykan. 31Kay libruchö qellqashqa kaykaqkunaqa Jesús salvamaqnintsik Cristo kanqanta y Diospa Tsurin kanqanta criyiyänaykipä y criyir mana ushakaq kawayta tariyänaykipämi.
Currently Selected:
Juan 20: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.