Zacarías 3

Josuépa röpanta llushtitsiqta revelacionchö rikanqan

1Tsaypitam Tayta Dios rikatsimarqan mandaq sacerdöti Josuéta.#Esd. 5.2. Paymi Tayta Diospa angelninpa lädunchö ichiraykarqan. Josuépa derëcha kaq lädunchömi Josuéta acusarnin Satanás kaykarqan.#1Crón. 21.1; Job 1.6; Apoc. 12.10. 2Acusaptinmi Tayta Diospa angelnin nirqan: <<¡Tayta Diosmi upälla kanaykipä nikäshunki, Satanás!#1Juan 2.1; Jud. 9. ¡Jerusalénta akraq Tayta Diosmi upälla kanaykipä nikäshunki! Kay runaqa ¿manaku lunyaykaq ninapita jipishqa shansha carbonnö kaykan?>>

3Josuéqa pasaypa qanra röpan jatishqam angelpa lädunchö ichiraykarqan. 4Tsaymi yanapaqninkunata ángel nirqan: <<Jatiraykanqan qanra röpanta lloqtitsiyay>>.#3.4 Kay textuchö qanra röpanqa jutsankunam kaykan. Lloqtitsinqanqa perdonanqanmi kaykan.

Tsaypitam Josuéta nirqan: <<Llapan jutsa ruranqaykitam perdonarqü. Kananqa kuyayllapä röpata jatitsiyäshunaykipämi nishä>>.#Apoc. 19.8.

5Tsaypitanam nirqan: <<Mandaq sacerdöti jatikunan limpiu görrata Josuéta jatitsiyay>>.

Tsaymi limpiu görrata jatitsiyarqan. Tsaynöllam kuyayllapä röpatapis jatitsiyarqan. Tsaynö jatitsiyaptinmi Tayta Diospa angelnin puntanchö ichiraykarqan.

6Jatiskatsiyaptinnam Josuéta Tayta Diospa angelnin nirqan: 7<<Llapanta mandaq Tayta Diosmi nin: <Llapan ninqäta cäsuptikiqa templüta y patiunta cuidatsinaykipämi churashayki. Tsaynöllam churashayki sirvimaq angelnïkunanö kanaykipä.

8<< <Mandaq sacerdöti Josué, qampis y sacerdöti mayikikunapis shumaq wiyayämay. Qamkunaqa señalnömi kaykäyanki.#3.8 Qamkunaqa señalnömi kaykäyanki ninanqa qamkuna sirviyämaptikim runakuna tantiyayanqa yanapaykanqäta ninanmi. Tsaymi sirvimaptiki Renuevo ninqan sirvimaqnï runata#Jer. 23.5-6; 33.15-16; Zac. 6.12. mandamushä.

9<< <Ñöpaykiman churanqä rumita rikay. Tsay rumiqa qanchis ñawiyuqmi kaykan. Tsay rumimanqa kikïmi qellqashä. Tsaymi juk junaqllachö runakunapa jutsankunata perdonashä. Noqa llapanta mandaq Tayta Diosmi tsaynö nï. 10Tsay junaqmi cada ünuykikuna üva muntiki chakinchö y hïgus muntiki chakinchö vecïnuykikunawan kushishqa jamakuyanki.#Miq. 4.4. Noqa llapanta mandaq Tayta Diosmi tsaynö nï> >>.

Currently Selected:

Zacarías 3: qxo

Highlight

Compare

Copy