Zacarías 2

Cordelnin aptashqa jövinta revelacionchö rikanqan

1 1 (5) Tsaypitanam cordelnin aptashqa juk jövin kaykaqta revelacionchö rikarqä. 2 2 (6) Paytam tapurqä: <<¿Maypatä aywaykanki?>>

Tsaymi nimarqan: <<Jerusalén markapa largun y anchun ayka kanqantapis musyanäpämi midiq aywaykä>>.#Eze. 40.3-4; Apoc. 11.1; 21.15-17.

3 3 (7) Tsaypitanam noqawan parlaq ángel aywaykaptin juk ángel tinkuparqan. 4 4 (8) Paymi nirqan: <<Cörrilla aywar midimuq jövinta niy: <Jerusalénchöqa atskaq runakunam täyanqa. Ashmankunapis atskam kanqa. Runakuna atskaq kayaptinmi marka murällapis kanqanatsu. 5 5 (9) Tayta Diosmi nin: <<Jerusalénta cuidanäpäqa noqam kashä entëru kuchunpa nina tsariykaq murällanö. Kikïmi Jerusalénchö täraqkunawan kaykäshä>> > >>.#Isa. 4.5; Eze. 43.4-5; Apoc. 21.3, 23.

6 6 (10) Israel runakunatam Tayta Dios nin: <<Noqam kay patsapa chuskun lädunman qamkunata qarqurqü. ¡Kananqa norti lädun nacionpa qarqushqa kaqkuna, Jerusalénman qeshpiyämuy! 7 7 (11) ¡Babiloniachö täraq Sión runakuna, Jerusalénman qeshpiyämuy!>>

8 8 (12) Llapanta mandaq Tayta Diosmi mandamashqa imaykitapis apaq nacionkunata willar ninäpä: <<Kuyanqä runakunata pipis ñakatsirqa ñawi ñïñüta toquqnömi kaykäyan. 9 9 (13) Kikïmi paykunata castigashä. Castigarmi tantiyatsishä kikinpa sirviqninkuna paykunata asaltayänanpä>>.

Tsay ninqannölla päsaptinmi musyayanki llapanta mandaq Tayta Dios mandamanqanta.

10 10 (14) Mastam Tayta Dios nin: <<Sión runakuna, qamkunawanmi imaypis kaykäshä. Tsaynö kaykaptinqa kushikur cantayay. 11 11 (15) Tsay witsanmi atska nación runakuna sirviyämanqa. Kuyanqä runakuna kaptinmi noqaqa paykunawan imaypis kaykäshä>>.

Tsay ninqannölla päsaptinmi musyayanki llapanta mandaq Tayta Dios qamkunaman mandamanqanta.

12 12 (16) Sagrädu nacionchö herencian kananpämi Judá runakunata Tayta Dios qorinqa. Jerusalén markatapis yapaymi akranqa kikinpa kananpä. 13 13 (17) Maytsaychö täraq runakuna, Tayta Diospa puntanchö upälla kayay.#Hab. 2.20; Sof. 1.7. Payqa ciëlupitam shamuykan.

Currently Selected:

Zacarías 2: qxo

Highlight

Compare

Copy