Mateo 26

Jesústa wanutsiyänanpä willanakuyanqan

Marcos 14.1-2; Lucas 22.1-2; Juan 11.45-53

1Tsaynö yachatsir ushaskirmi discïpulunkunata Jesús nirqan: 2<<Musyayanqaykinöpis Pascua fiesta#Éxo. 12.1-27; Deut. 16.1-8. qallananpä ishkay junaqllanam faltan. Tsaychömi prësu tsariskir Runapa Tsurinta crucificayanqa>>.

3Tsaypitanam mandaq sacerdötikuna, [ley yachatsikuqkuna] y Israel mayor runakuna mas mandaq sacerdöti Caifáspa wayinman qorikäyarqan. 4Tsaychömi willanakuyarqan runakunata mana musyatsiyllapa Jesústa tsariskir wanutsiyänanpä. 5Tsaymi niyarqan: <<Fiestachöqa ama tsarishuntsu. Tsaychö tsarishqaqa contrantsikmi runakuna shäriyanqa>>.

Jesúspa umanman perfümita wiñanqan

Marcos 14.3-9; Juan 12.1-8

6Betania markachö leprösu niyanqan Simónpa wayinchö Jesús kaykaptinmi 7juk warmi charqan alabastro rumipita rurashqa pömuchö perfümin aptashqa. Tsay perfümiqa pasaypa chaniyuqmi karqan. Mësachö kaykaptinmi tsay warmiqa Jesúspa umanman perfümita wiñarqan.#Luc. 7.37-38. 8Tsayta rikarmi discïpulunkuna rabyar niyarqan: <<¿Imapätä tsay perfümita perditsishqa? 9Tsaytaqa chaninchö rantikuskirmi tsay qellaywan pobrikunata yanapashwan karqan>>.

10Tsaynö niyanqanta wiyaykurmi Jesús nirqan: <<¿Imanirtä kay warmita manakaqman churayanki? Payqa allitam rurashqa. 11Pobrikunaqa qamkunawanmi imaypis kaykäyanqa.#Deut. 15.11. Peru noqam sïqa qamkunawan kashänatsu. 12Pampashqa kanäpämi payqa perfümita wiñapämar alistaykäman. 13Rasunpam nï: Maytsaychöpis willakuynïta willakurmi kay warmi perfümita wiñapämanqanta willakuyanqa>>.

Jesústa rantikunanpä Judas Iscariote conträtuta ruranqan

Marcos 14.10-11; Lucas 22.3-6

14Jesúspa apostolnin Judas Iscariotim mandaq sacerdötikunaman aywaykur 15nirqan: <<Jesústa prësu tsariyänaykipä entregaptï ¿aykatatä pägayämankiman?>>

Tsaynö niptinmi kimsa chunka (30) qellayta pägayänanpä awniyarqan. 16Tsaypitanam Judas yarpachakurqan imay höra Jesústa entregananpäpis.

Pascua mikuyta discïpulunkunawan Jesús mikunqan

Marcos 14.12-21; Lucas 22.7-14, 21-23; Juan 13.21-30

17Levadüraynaq Tanta Mikuna fiesta qallaykunan junaqmi discïpulunkuna Jesústa tapuyarqan: <<Taytay, Pascua mikuyta mikunantsikpä ¿maychötä alistayämushä?>>

18Jesúsnam nirqan: <<Jerusalénman aywayay. Juk runapa wayinman chaykur niyanki: <Jesúsmi mandayämashqa. Höranshi chaykämunna. Wayikichöshi Pascua mikuyta discïpulunkunawan mikuyanqa> >>.

19Jesús yätsinqannölla aywarmi discïpulunkuna Pascua mikuyta alistayarqan.

20Patsa tsakaykaptinnam chunka ishkay discïpulunkunawan mësaman Jesús jamakuyarqan. 21Mikuykarnam Jesús nirqan: <<Rasunpam nï: Qamkunapita juknikim prësu tsariyämänanpä entregamanqa>>.

22Tsaynö niptinmi pasaypa llakikur juknin juknin tapur niyarqan: <<Taytay, ¿noqatsurä kä?>>

23Jesúsnam nirqan: <<Plätuchö noqawan tantata tullpuq kaqmi entregamanqa.#Sal. 41.9. 24Rasunpam Runapa Tsurin qellqashqa kanqannölla ñakar wanunqa. Peru payta entregaq runam sïqa pasaypa kuyapaypä kanqa. Tsay runaqa ama yurinmantsu karqan>>.

25Tsaynö niptinmi rantikunanpä kaq Judas nirqan: <<Rabí, ¿noqatsurä kä?>>

Jesúsnam nirqan: <<Kikikim nirquyki>>.

Mushuq pactupä Jesús yachatsinqan

Marcos 14.22-26; Lucas 22.14-20; 1 Corintios 11.23-25

26Tsaypitanam tantata aptarkur Tayta Diosta Jesús agradëcikurqan. Tantata pakiskirnam discïpulunkunata makyar nirqan: <<Kay tantata mikuyay. Kayqa cuerpümi>>.

27Tsaynöllam vïnuyuq väsuta aptarkur Tayta Diosta agradëcikurqan. Tsaypitanam discïpulunkunata makyar nirqan: <<Kaypita llapayki upuyay. 28Kay vïnuqa Tayta Dios [mushuq] pactuta rurananpä#Jer. 31.31-34. jichanqä yawarnïmi. Atskaq runakuna jutsankunapita perdonashqa kayänanpämi yawarnïta jichar wanushä.#Éxo. 24.8; Zac. 9.11. 29Noqam nï: Kananpitaqa vïnuta manam yapay upushänatsu hasta Papänïpa mandakuyninchö qamkunawan mushuq vïnuta upunqäyaq>>.

30Discïpulunkunawan salmukunata cantaskirnam Olivos jirkanman aywayarqan.

Pedro ñëgananpä kanqanta Jesús ninqan

Marcos 14.27-31; Lucas 22.31-34; Juan 13.36-38

31Tsaypitanam Jesús nirqan: <<Kanan paqasmi llapayki dëjaskamar aywakuyanki. Tayta Diospa palabranmi nin: <Üsha mitsiqta wanuskatsiptïmi üshankuna wakpa kaypa mashtakar aywakuyanqa>.#Zac. 13.7. 32Tsaynö kaptinpis wanunqäpita kawaskamurmi qamkunapita mas puntata Galileaman aywashä>>.#Mat. 28.16.

33Pedrunam nirqan: <<Wakin dëjayäshuptikipis noqaqa manam dëjashaykitsu>>.

34Jesúsnam nirqan: <<Rasunpam nï: Kanan paqas gällu manarä cantaptinmi kimsa kuti ñëgamanki>>.

35Pedrunam nirqan: <<Ishkantsikta wanutsimänantsik kaptinpis manam ñëgashaykitsu>>.

Tsaynöllam wakin discïpulunkunapis niyarqan.

Getsemaníchö Jesús mañakunqan

Marcos 14.32-42; Lucas 22.39-46

36Getsemaní niyanqanman discïpulunkunawan chaykurmi Jesús nirqan: <<Tayta Diosta mañakamunqäyaq kayllachö jamaykäyay>>.

37Tsaypitam Pedruta y Zebedeupa tsurinkunata mas washa läduman pusharqan. Tsaychömi pasaypa llakikur 38nirqan: <<Wanuypanörämi llakikuy tsarimashqa. Mana punukällar kaychö shuyaykäyämay>>.

39Tsaypita washaläninkunaman aywaykurmi patsaman lätaykur Tayta Diosta mañakur nirqan: <<Papä, cöpachö wiñaraykaq castïguykita ama upuykatsillämaytsu.#Sal. 75.8; Isa. 51.17; Jer. 25.15-29; Hab. 2.16. Peru noqa munanqänöqa ama katsuntsu, sinöqa qam munanqaykinö kaykullätsun>>.

40Tsaypita discïpulunkuna kaqman kutirmi punukashqata tarirqan. Tsaymi Pedruta nirqan: <<¿Manaku juk hörallapis rikchayta puëdiyanki? 41Rikchayay. Tayta Diosta mañakuyay Satanás mana tentayäshunaykipä. Cäsumayta munarpis kikillaykikunapitaqa manam puëdiyankitsu>>.

42Tsaynö niskirmi yapay aywar Tayta Diosta mañakur nirqan: <<Papä, kay cöpachö wiñaraykaq castïguykita upunäta munaptikiqa munanqaykinö kaykullätsun>>.

43Jesús yapay kutirmi discïpulunkuna punuykaqta tarirqan. Alläpa punuy vinciptinmi punukashqa kaykäyarqan. 44Tsaypita yapay aywarmi puntata mañakunqannölla Tayta Diosta mañakurqan. 45Discïpulunkunaman yapay kutiykurmi nirqan: <<¿Jinallaku punuykäyanki? Höra chämushqanam Runapa Tsurinta jutsasapa runakunaman entregananpä. 46¡Shäriyay, aywashunna! Entregamaq runa shamuykannam>>.

Jesústa prësu tsariyanqan

Marcos 14.43-50; Lucas 22.47-53; Juan 18.3-12

47Jesús tsaynö parlaykaptinmi espädankunawan y qerunkunawan atskaq runakunata pushashqa apostolnin Judas Iscariote charqan. Tsay runakunataqa mandaq sacerdötikuna y Israel mayor runakunam mandayarqan. 48Manarä charmi pushanqan runakunata yätsir Judas nirqan: <<Mayqantapis mutsar saludanqä kaqmi Jesús kanqa. Payta prësu tsariyanki>>.

49Chaykurnam <<rabí, ¡allillaku kaykanki!>> nir Jesústa mutsaskirqan.

50Jesúsnam nirqan: <<Amïgu, ruranaykipä kaqta juklla ruray>>.

Tsaynö niptinmi Jesústa prësu tsariyarqan.

51Tsariyaptinmi juk discïpulun espädanta jipiskir mas mandaq sacerdötipa sirviqninpa rinrinta roquskirqan. 52Tsaymi Jesús nirqan: <<¡Espädaykita kutitsiy! Pitapis espädawan wanutsiq kaqtaqa espädawanmi wanutsiyanqa. 53¿Manaku musyanki Papänïta mañakuptï washämänanpä chunka ishkay legión#26.53 Juk legión complëtuqa joqta waranqa (6,000) soldädukunam karqan. Tsaymi Jesús nirqan qanchis chunka ishkay waranqa (72,000) angelkunapita masta mandamunanpä kanqanta. angelkunapita masta mandamunanpä kanqanta? 54Tsaynö mañakuptïqa ¿imanöparä cumplinqa runakuna wanutsiyämänanpä Tayta Diospa palabran ninqanpis?>>

55Tsaypitanam runakunata Jesús nirqan: <<¿Imanirtä suwamannö espädaykikunawan y qeruykikunawan shayämurquyki? Qoyay qoyay templupa patiunchö [qamkunawan] kaykaptï#Luc. 19.47; 21.37. ¿imanirtä tsaychö prësu tsariyämarqaykitsu? 56Peru prësu tsariykäyämanki profëtakuna qellqayanqan cumplinanpämi>>.

Jesústa prësu tsariskiyaptinnam discïpulunkuna dëjaskir qeshpir aywakuyarqan.

Jesústa mas mandaq sacerdöti tapunqan

Marcos 14.53-65; Lucas 22.54-55, 63-71; Juan 18.13-14, 19-34

57Tsaypitanam mas mandaq sacerdöti Caifáspa wayinman Jesústa apayarqan. Tsaychömi ley yachatsikuqkuna y Israel mayor runakunapis qorikashqa kaykäyarqan. 58Karu qepallanta Pedro aywarmi sawan ruriyaq yaykurqan. Yaykuskirmi ima päsanqantapis rikananpä templu cuidaq wardiakunawan jamaykäyarqan.

59Tsaychömi mandaq sacerdötikuna, [Israel mayor runakuna] y llapan Sanedrín juezkuna Jesústa wanutsiyta munar testïgukunata ashiyarqan llullakur Jesúspa contran parlayänanpä. 60Manakaqkunata atskaq niyaptinpis wanutsishqa kananpäqa manam ima jutsantapis tariyarqantsu. Tsaypitanam ishkay llulla runakuna witiykur 61niyarqan: <<Kay runam templuta juchuskatsir kimsa junaqllata yapay shäritsinanpä nirqan>>.#Juan 2.19.

62Tsaymi mas mandaq sacerdöti sharkur Jesústa tapurqan: <<Tsaynö niyäshuptiki ¿manaku imatapis ninki? ¿Rasun kaqtaku niyan o manaku?>>

63Tsaynö tapuptinpis Jesúsqa manam imatapis nirqantsu. Tsaymi mas mandaq sacerdöti nirqan: <<Imayyaqpis kawaq Tayta Diospa jutinchömi tapü: ¿Rasunpaku Diospa Tsurin Cristo kanki o manaku?>>

64Jesúsnam nirqan: <<Ninqaykinöllam kä. Kananpitam Runapa Tsurinta rikayanki poderyuq Diospa derëcha kaq lädunchö jamaraykaqta y pukutay jananchö ciëlupita shamuykaqta>>.#Dan. 7.13.

65Tsaynö niptinmi mas mandaq sacerdöti pasaypa rabyarnin sotänantapis rachir nirqan: <<¡Kay runaqa Tayta Diospa contranmi parlaykan! ¿Imapänatä mas testïgutapis ashishun? Wiyayarquykinam llutanta parlanqanta. 66Kanan ¿imatatä niyanki?>>

Tsaynö niptinmi llapan niyarqan: <<¡Jutsayuqmi! ¡Wanutsishqa katsun!>>#Lev. 24.16.

67Tsaynö nirmi Jesúspa cäranchö toqapur kutayarqan. Wakinnam laqyar#Isa. 50.6. 68niyarqan: <<Rasunpa Cristo karqa pï maqashunqaykitapis mä niyämay>>.

Jesústa Pedro ñëganqan

Marcos 14.66-72; Lucas 22.56-62; Juan 18.15-18, 25-27

69Tsayyaqmi patiuchö Pedro jamaraykarqan. Payta rikaykurmi juk sirviq jipash nirqan: <<Qampis Galileapita Jesúswanmi purirquyki>>.

70Tsaynö niptinmi llapan runakuna wiyaykaptin Pedro nirqan: <<Manam musyätsu imapita parlaykanqaykitapis>>.

71Tsaynö niskirmi sawan punkumanna witikurqan. Tsaychöpis juk sirviq jipashmi payta rikaykur tsaychö kaykaqkunata nirqan: <<Kay runataqa Nazaretpita Jesúswan puriqtam rikarqü>>.

72Yapay ñëgarmi Pedro jurarnin nirqan: <<¡Tsay runata manam reqïtsu!>>

73Tsaypita rätuyllantanam tsaychö kaykaq wakin runakuna Pedruman witiykur niyarqan: <<Qamqa rasunpam paywan puriq kanki. Galilea runakunanömi parlankipis>>.

74Tsaynö niyaptinmi Pedro yapay jurar nirqan: <<¡Tsay runataqa manam reqïtsu!>>

Tsay höram gällu cantaskirqan. 75Tsaynö cantaskiptinmi Pedro yarpaskirqan Jesús ninqanta: <<Manarä gällu cantaptinmi kimsa kuti ñëgamanki>>.

Tsaymi waqtaman yarquskir pasaypa pësakurnin waqarqan.

Currently Selected:

Mateo 26: qxo

Highlight

Compare

Copy