Mateo 20

Peonkunaman iwalatsiypa Jesús yachatsinqan

1<<Kananmi Tayta Diospa mandakuynin imanö kanqantapis tantiyatsishayki. Juk runash üva chakranchö arutsinanpä wäraylla peonkuna ashiq aywanä. 2Peonta tariykurshi juk jornalta pägananpä parlaskir üva chakranman aruq mandanä.

3<<Tsaypita wäray jamay höranö pläzapa yapay aywarshi runakuna aruyniynaq kaykaqta tarinä. 4Paykunatash ninä: <Qamkunapis üva chakrächö aruyänaykipä aywayay. Aruyanqaykipitaqa pägayäshaykim>. Tsaynö niptinshi paykunapis aywayänä.

5<<Pullan junaqpis y tardi jamay hörapis yapayshi peón ashiq aywanä. Tariykurshi wakin kaqtanölla chakranman mandanä.

6<<Tsaypita peonkuna yarquyänanpä juk höranö faltaykaptinshi yapay aywar runakuna aruyniynaq kaykaqta tarinä. Tsayshi ninä: <¿Imanirtä qoyat imatapis mana rurar kaykäyanki?>

7<<Paykunanash niyänä: <Taytay, manam pipis minkayämashqatsu>.

<<Tsayshi ninä: <Qamkunapis chakräman aruq aywayay>.

8<<Tsakaykaptinnash capatazninta ninä: <Aruqkunata qayaskamur llapanta juk jornalta pägay.#Lev. 19.13; Deut. 24.15. Tardirä yaykuqkunata puntata päganki y wäraypita aruqkunataqa qepatarä päganki>. 9Ninqannöllash tardirä aruq yaykuqkunata juk jornal complëtuta päganä. 10Tsayta rikaykurshi wäraypita aruqkunaqa yarpäyänä mas atskata chaskiyänanpä kayanqanta. Tsaynö yarparpis juk jornalllatash paykunapis chaskiyänä. 11Tsayshi chakrayuqta reclamar 12niyänä: <Tardirä yaykamuqkuna juk höralla aruykäyaptinqa ¿imanirtä noqakunataqa pasaypa achaychö aruykäyaptï paykunatanölla pägaykäyämanki?>

13<<Chakrayuqnash ninä: <Amïgu, parlanqantsiknömi pägaykä. Manam engañaykätsu. 14Pägaykaptïnaqa upälla aywakuyay. Tardi yaykamuqkunatapis qamkunatanöllam pägaykä. 15Qamkunaqa aykata pägaptïpis ¿ima cuentayuqtä kayanki? ¿Alli runa kanqäpitaku ajanäyanki?> >>

16Tsaypitanam Jesús nirqan: <<Tsaynöllam qepa kaqkuna puntachö kayanqa. Punta kaqkunanam qepachö kayanqa.#20.16 Tsay yachatsinqanpämi Jesús nirqan: Tsay aruyman punta yaykuqwan qepa yaykuqpis iwal päguta chaskinqannömi Diospa willakuyninta puntata chaskikuqkuna y qepatarä chaskikuqkunapis ciëluman chäyanqa. [Atskaqta qayarpis wallkaqllatam Tayta Dios akranqa]>>.#Mat. 19.30; Mar. 10.31; Luc. 13.30.

Wanutsiyänanpä kanqanta Jesús yapay willakunqan

Marcos 10.32-34; Lucas 18.31-34

17Jerusalénman aywaykäyanqanchömi chunka ishkay discïpulunkunata jukläman qayaskir Jesús nirqan: 18<<Musyayankim Jerusalénman aywanqantsikta. Tsaychömi Runapa Tsurinta prësu tsariskir mandaq sacerdötikunaman y ley yachatsikuqkunaman apayanqa. Paykunam wanutsiyänanpä condenayanqa. 19Mana Israel autoridäkunaman entregayaptinmi asipäyanqa, castigayanqa y crucificayanqa. Peru kimsa junaqtaqa kawamunqam>>.

Santiagupa y Juanpa maman rugakunqan

Marcos 10.35-45

20Tsaypitanam Zebedeupa warmin wamrankunata pushakurkur Jesús kaqman charqan. Jesúspa puntanman qonquriykurmi nirqan: <<Taytay, rugakulläshayki>>.

21Jesúsnam nirqan: <<¿Imallatarä?>>

Tsay warminam nirqan: <<Taytay, mandakuynikichö kaykar kay ishkan wamräkunata churaykullanki yanapayäshunaykipä. Jukta jamaykatsinki derëchaykiman y jukaqtana itsuqnikiman>>.

22Jesúsnam nirqan: <<Manam imata mañakayämanqaykita musyayankitsu. ¿Noqa upunäpä kaq cöpata#20.22a Cöpapä parlarqa Tayta Dios rabyar jutsa ruraqkunata castigananpä kanqantam nirqan. Tsaypita masta musyanaykipä liyinki Sal. 75.8; Isa. 51.17; Jer. 25.15-29; Hab. 2.16. upuyankimantsurä? [¿Awantayankimantsurä bautizayämänanpä kanqannö bautizayäshuptiki?]>>#20.22b Bautizayämänanpä kanqannö bautizayäshuptiki nirqa wanutsiyämänanpä kanqannö wanutsiyäshuptiki nirqanmi.

Paykunanam niyarqan: <<Awmi, taytay>>.

23Jesúsnam nirqan: <<Rasunpam noqa upunäpä kaq cöpata upuyanki [y bautizayämänanpä kanqannömi bautizayäshunki]. Peru derëchäman ni itsuqnïman jamatsinäpä manam noqapitatsu. Tsaymanqa jamayanqa Papänï munanqan kaqkunallam>>.

24Tsay rugakuyanqanta wiyaykurmi wakin kaq discïpulunkuna Juanta y Santiaguta ajapäyarqan. 25Tsaymi discïpulunkunata qayaykur Jesús nirqan: <<Musyayanqaykinöpis nación mandaq runakunaqa runakunata munayanqantam ruratsiyan. 26Peru qamkunachöqa manam tsaynö kanmantsu.#Luc. 22.25-26. Mayqaykipis mandaq kayta munarqa sirviqnölla runa mayikikunata yanapayay. 27Alli rikashqa kayta munarqa esclävunölla runa mayikikunata yanapayay.#Mat. 23.11; Mar. 9.35; Luc. 22.26. 28Runapa Tsurinpis manam sirvishqa kananpätsu shamushqa, sinöqa sirvinanpä y runakuna raykur wanur atskaqta salvananpämi>>.#Luc. 22.27; Juan 13.12-15.

Ishkay qaprakunata Jesús allïtsinqan

Marcos 10.46-52; Lucas 18.35-43

29Jericó markapita discïpulunkunawan Jesús aywakuptinmi atskaq runakuna qepanta aywayarqan. 30Tsay nänichömi ishkay qaprakuna jamaykäyarqan. Paykunam Jesús päsaykanqanta musyaskir qayakuyarqan: <<¡Davidpa Tsurin Tayta Jesús, kuyapaykayällämay!>>

31Runakunanam upälla kayänanpä ollqutupäyarqan. Peru qaprakunaqa masrämi qayarar niyarqan: <<¡Davidpa Tsurin Jesús, kuyapaykayällämay!>>

32Jesúsnam tsay qaprakunata qayaykur tapurqan: <<¿Imachö yanapanätatä munayanki?>>

33Qaprakunanam niyarqan: <<Taytay, ñawïkuna rikanantam munayä>>.

34Tsaymi kuyapar ñawinkunata yataykuptin jinan höra alliskiyarqan. Alliskirnam Jesúspa qepanta aywayarqan.

Currently Selected:

Mateo 20: qxo

Highlight

Compare

Copy