Juan 21
21
Qanchis discïpulunkunata Jesús yuripunqan
1Tsaypitanam Tiberias#21.1 Tiberias niyanqan qochaqa Galilea qocham kaykan. qocha kuchunchö discïpulunkunata Jesús yapay yuripurqan. 2Tsaychömi kaykäyarqan Simón Pedro, Millish ninqan Tomás y Natanael. Natanaelqa Galileachö kaykaq Caná markapitam karqan. Tsaynöllam Zebedeupa ishkan tsurinkuna y mas ishkay discïpulukunapis kaykäyarqan. 3Paykunatam Simón Pedro nirqan: <<Pescädu tsariqmi aywaykä>>.
Tsaynö niptinmi niyarqan: <<Aku noqakunawanpis aywashun>>.
Tsaynö nirmi büquiman yarkurkur llapan aywayarqan. Tsay paqas warat pescaykarpis manam ni jukllayllatapis tsariyarqantsu.#Luc. 5.5. 4Patsa waraykaptinnam qocha kuchunchö juk runa kaykaqta rikayarqan. Peru Jesús kanqanta manam musyayarqantsu. 5Paymi qayakur nirqan: <<Amïgukuna, ¿pescäduta tsariyarquykiku?>>
Paykunanam niyarqan: <<Taytay, manam ni jukllayllatapis tsariyärätsu>>.
6Tsaynö niyaptinmi nirqan: <<Büquipa derëcha kaq lädunman mällaykita mashtayay. Tsaychömi pescäduta tsariyämunki>>.
Ninqannö mällata mashtarnam sutaytapis mana puëdiyanqanyaq tsaytsika pescäduta tsariyarqan.#Luc. 5.6. 7Tsaymi Jesús kuyanqan kaq discïpulunqa Pedruta nirqan: <<¡Payqa Señornintsikmi!>>
Tsaynö niptinmi Simón Pedruqa röpanta tseqllanman wachakakurkur juklla Jesús kaqman nädaypa aywarqan. 8Wakin discïpulukunanam mällachö tsaytsika pescäduta qarachashqa büquiwan aywayarqan. Qocha kuchunman chäyänanpäqa pachak (100) metrunöllam faltarqan. 9Büquipita yarqurirnam rikayarqan tantata y shansha jananchö pescädu kankashqa kaykaqta.
10Jesúsnam nirqan: <<Tsariyämunqayki pescäduta juk ishkayta apayämuy>>.
11Tsaynö niptinmi Simón Pedro büquiman yarkurkur mällata qarachämurqan pescädukunata apayänanpä. Tsay mällachömi pachak pitsqa chunka kimsa (153) jatusaq pescädukuna karqan. Tsaytsika pescäduwanpis mälla manam rachirqantsu. 12Jesúsnam nirqan: <<Mikuq shayämuy>>.
Señor Jesús kanqanta musyarmi mayqan discïpulunpis pï kanqantapis tapuyarqantsu. 13Paykuna kaqman witiykurnam tantatawan pescäduta Jesús qararqan.
14Tsaychö yuripunqanwanqa kawamunqanpita kimsa kutinam discïpulunkunata Jesús yuripurqan.
Simón Pedruwan Jesús parlanqan
15Mikuyta ushaskirnam Simón Pedruta Jesús tapurqan: <<Jonáspa tsurin Pedro, wakin discïpulükunapita ¿masku kuyamanki?>>
Pedrunam nirqan: <<Taytay, qam musyankim kuyanqäta>>.
Jesúsnam nirqan: <<Malta üshäkunata shumaq cuidanki>>.
16Jesús yapay tapurmi nirqan: <<Jonáspa tsurin Simón, ¿kuyamankiku?>>
Pedrunam nirqan: <<Taytay, qam musyankim kuyanqäta>>.
Niptinmi nirqan: <<Üshäkunata shumaq mitsinki>>.
17Tsaypita yapaymi Jesús tapurqan: <<Jonáspa tsurin Simón, ¿rasunpaku kuyamanki?>>
Tsaynölla kimsa kuti tapuptinmi Pedro llakishqa nirqan: <<Taytay, qamqa llapantam musyanki. Kuyanqätapis musyankim>>.
Jesúsnam nirqan: <<Üshäkunata shumaq cuidanki. 18Rasunpam nï: Jövinllarä karqa röpaykikunata jatikurkurmi munanqaykipa aywarqayki. Peru rukuyarnam sïqa rikraykita kichaptiki jukna jatitsishunki.#21.18 Jukna jatitsishunki nirqa Jesucristo manam röpanta jatitsiyänanpätsu nirqan, sinöqa crucificayänanpä kanqantam. Tsaynöllam aywayta mana munanqaykipa apayäshunki>>.
19Tsaynö nirmi Pedruta Jesús tantiyatsirqan Tayta Dios munanqannö kawar imanö wanunanpä kanqanta. Tsaypitanam Pedruta nirqan: <<Qatimay>>.
Libru ushanan
20Tsaypitanam tikraykur Jesús kuyanqan kaq discïpuluta Pedro rikarqan. Tsay discïpulum Pascua cënachö Jesúspa lädunchö tapurqan mayqan discïpulun contran shärinanpä kanqantapis.#Juan 13.25. 21Payta rikaykurmi Jesústa Pedro tapurqan: <<Taytay, paytaqa ¿imatä päsanqa?>>
22Jesúsnam nirqan: <<Noqa munaptïqa kutimunqäyaqpis kawanqam. ¿Imanirtä paypä tapumanki? Qamqa qatirämay>>.
23Jesús tsaynö ninqanta musyaykurmi maytsaychöpis wawqikuna y panikuna yarpäyarqan tsay discïpulun imaypis mana wanunanpä kanqanta. Peru tsaynö yarpäyaptinpis Jesús manam mana wanunanpä kanqantatsu nirqan, sinöqa nirqan: <<Noqa munaptïqa kutimunqäyaqpis kawanqam. ¿Imanirtä paypä tapumanki?>>
24Jesús kuyanqan discïpulum kay libruta qellqashqa. Llapan qellqanqankunaqa rasun kaqmi. 25Jesús ruranqankuna mas atskarämi kaykan. Llapanta qellqaptinqa entëru kay patsachö papelpis manam aypanmantsu. [Amén.]
Currently Selected:
Juan 21: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.