Habacuc 2
2
1Rikachakuna törrichö marka cuidaq runa alcäbu kanqannömi noqapis shuyaraykä mañakunqäta Tayta Dios wiyamänanta.
Habacuc yapay mañakunqanta Tayta Dios wiyanqan
2Tsaymi Tayta Dios nimarqan:
<<Pipis mana pantaypa liyinanpä taksha tablachö revelanqäta shumaq qellqanki.
3Tsay revelanqäqa tiempun chämuptinrämi cumplinqa.
Mana ras cumpliptinpis pacienciakur shuyay.
Imay karpis cumplinqam.
Höran chämuptinqa llapanpis ninqänöllam kanqa.#Heb. 10.37; 2Ped. 3.8-10.
4<<Tsay runakunaqa orgullösu karmi kallpankunallaman yärakuyan.
Paykunaqa mana allikunatam rurayan.
Munanqänö kawaq runaqa noqaman yärakamurmi kawanqa>>.#Rom. 1.17; Gál. 3.11; Heb. 10.38.
Mana alli runakunata Tayta Dios ushakätsinanpä ninqan
5Orgullösu runakunaqa rïcuyayta munarmi#2.5 Wakin hebreo copiakunachöqa alläpa vïnuta upyar niyanmi. jamaytapis tariyantsu.
Rïcuyarpis alli kawayta manam tariyantsu.
Munayyuq kayta munarmi ayakunata sepultüra chaskiypa chaskinqannö runakunata ushaypa ushayan.
Tsaymi juk markata juk markata atacar vinciyan.
6Tsay vinciyanqan runakunam vinciqninkunata manakaqman churar niyanqa:
<<¡Allaw qamkuna! ¡Runakunapa imaykankunatapis qechurmi pasaypa rïcuyaykäyanki!
¡Imayyaqrä suwakuyllawan rïcuyäyanki!
7Ñakatsiyanqayki runakuna wanutsiyäshunaykipä illaqpita chäyämuptinmi mantsakar pasaypa tsuktsukyäyanki.
Llapan imaykaykikunatapis apayaptinmi qallapächulla quëdayanki.
8Atska markakunapa imaykantapis apayanqaykipitam tsaytsika soldädukuna shamur qamkunapatapis imaykaykikunata apayanqa.
Tsaynö rurayäshunki nacionnïman shamur may markachöpis wanutsiyanqaykipita y mana allikunata rurayanqaykipitam.
9<<¡Allaw qamkuna! Rïcuyäyänaykipämi runapa imaykantapis suwapäyanki.
Tsaynö rïcuyarmi yarpäyanki imapis mana päsayäshunaykipä kanqanta.
10Tsaynö kayanqaykipitam qamkuna y castaykikuna penqakuychö kayanki.
Atska markakunata ushakätsiyanqaykipitam kikikikunatapis ushakätsiyäshunki.
11Llutanta rurayanqaykitam wayipa pirqankunachö rumikunapis y vïgakunapis shimpiyäshunki.
12<<¡Allaw qamkuna! Runakunata wanutsir imaykantapis apayanqallaykiwanmi markaykikunata shäritsiyarquyki.#Miq. 3.10.
13Tsaynö kayanqaykipitam llapanta mandaq Tayta Dios llapan shäritsiyanqaykita ninawan ushakätsinqa.
Ushakätsiptinmi llapan aruyanqaykipis wallälla kanqa.
14Lamarchö yaku junta kanqannömi Tayta Diosta reqiqkunapis kay patsachö junta kayanqa.#Isa. 11.9.
15<<¡Allaw qamkuna! Vecïnuyki markakunata vinciskirmi pasaypa penqakatsiyanki.
Qallapächu kaykaqta rikananpä runa mayinta machätsiqnömi kaykäyanki.
16Tsaynö rurayanqaykipitam respitashqa kayänaykipa trokin penqakuychö kayanki.
Tayta Diospa castïgun wiñaraq cöpapita upuyaptikim kikikikunatapis qarapachayäshunki.
Kanan munayyuq karpis waray warantinqa kuyapaypämi kayanki.#Jer. 25.15-29; Eze. 23.32-34.
17Líbanuman aywar jachakunata ushar tsaychö täraq ashmakunata wanutsiyanqaykipitam kikikikunatapis Tayta Dios mana kuyapaypa wanutsiyäshunki.
Runakunata may markachöpis wanutsiyanqaykipitam pasaypa ñakayanki.
18<<Qeruta llaqllaykur rurayanqan ïdulukuna ¿imapärä välin?
Runakunata engañanallanpä kaykaptinqa ¿imapärä välin metalkunata fundiykur ïdulukunata rurayanqan?
Shimin kaptinpis manam parlayantsu.
¡Imanöparä kikin ruraqpis tsayman yärakunman!
19<<¡Allaw qamkuna! Qerupita rurayanqan ïdulutam <rikchay> niyanki.
Tsaynöllam rumipita rurayanqan ïduluta <shäriy> niyanki.
Tsay ïdulukunaqa manam imatapis musyatsiyäshunkitsu.
Qoriwan y qellaywan enchapashqalla karmi kawayantsu.
20 Tayta Diosqa sagrädu templunchömi kaykan.
Paypa puntanchö llapan runakuna maytsaychöpis upällakuyätsun>>.#Sal. 11.4; Sof. 1.7.
Currently Selected:
Habacuc 2: qxo
Highlight
Copy
Compare
Share
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.
