Colosenses 1
1
Apóstol Pablo saludakunqan
1-2Colosas markachö salvashqa kaqkuna:
Noqa Pablo, Jesucristupa apostolnin kanäpä Tayta Dios churamashqa kaptinmi wawqintsik Timoteuwan cartakayämü. Qamkuna Tayta Diospana karmi pay munanqannö kawaykäyanki. Papänintsik Tayta Dios [y Señor Jesucristo] kuyapäyäshurniki alli kawayänaykipä yanapaykuyälläshuy.
Tayta Diosta Pablo mañakunqan
3Qamkunapä mañakur Señornintsik Jesucristupa Papänin Tayta Diostam imaypis agradëcikuyä. 4Jesucristuman shumaq yärakuyanqaykita y criyikuq mayintsikkunawan kuyanakuyanqaykitam musyayarqü. 5Tayta Dioswan gloriachö imayyaqpis kawayänaykipä kanqanta musyarmi tsaynö kawaykäyanki. Jesucristupa willakuyninta chaskiyanqayki junaqpitam gloriachö kawayänaykipä musyayarquyki.
6Jesucristupa alli willakuynin qamkunaman chämunqannömi maytsaymanpis chaykan. Tsay alli willakuyta chaskirmi Tayta Dios munanqannöna kawaykäyan. Qamkunapis Jesucristupa alli willakuyninta chaskiyanqaykipitam Tayta Dios kuyakuq kanqanta tantiyar pay munanqannöna kawaykäyanki.
7Tsay willakuyninta chaskiyänaykipäqa willakuq mayï kuyay Epafrasmi#Col. 4.12; Film. 23. willayäshurquyki. Paypis Jesucristupa sirviqnin karmi shumaq tantiyatsiyäshurquyki. 8Epafrasmi willayämashqa Espíritu Santu yanapayäshuptiki kuyanakur shumaq kawayanqaykita.
9Tsaynö kawayanqaykita musyayanqä junaqpitam imaypis Tayta Diosta mañakuykäyä Espíritu Santu yachayta qarayäshuptiki Tayta Dios imata munanqanta shumaq musyayänaykipä. 10Tsaynöpam pay munanqannö kawar y imaypis allillata rurar qoyay qoyay payta reqiyanki.
11Tsaynöllam mañakuykäyä poderninwan yanapayäshuptiki ima ñakaychö karpis mana ajayaypa payman yärakuyänaykipä 12y imaypis kushishqa agradëcikuyänaykipä. Paymi salvamarquntsik llapan salvanqan kaqkunawan herenciantsikta chaskir gloriachö kawanantsikpä.
13 Satanáspa poderninchö kanqantsikpitam Tayta Dios jipimarquntsik#Efe. 6.12. kuyay Tsurin Jesucristupa mandakuyninchöna kawanantsikpä. 14Jesucristo [yawarninta jichar] rantimarnintsikmi jutsantsikpita perdonamarquntsik.#Efe. 1.7.
Jesucristo llapanpitapis mas poderösu kanqan
15Tayta Diosta mana rikarpis Jesucristuchömi pay imanö kanqantapis tantiyantsik.
Payqa llapan kamanqankunapä punta yuriqmi kaykan.#1.15 Llapan kamanqankunapä punta yuriqmi kaykan ninanqa imapis manarä kaptinmi Jesucristuqa mayna kaykarqan ninan y Jesucristo llapanpäpis mandaqmi kaykan ninanmi (Sal. 89.27).
16Paywanmi Tayta Dios kamarqan llapan imaykatapis:
ciëluchö kaqkunata, kay patsachö kaqkunata,
rikanqantsikta, mana rikanqantsikta
y ciëluchö llapan poderyuqkunatapis.#Efe. 6.12.
Llapantapis kamarqan Jesucristuwanmi y paypa poderninchö kayänanpämi.
17Manarä imapis kaptinmi Jesucristo kaykarqanna.
Llapan imaykatapis poderninchömi katsin.#Juan 1.1-3, 18; Heb. 1.2-3.
18Jesucristum umantsik.
Noqantsiknam iglesian kar cuerpun kaykantsik.#Efe. 1.22-23; 4.15.
Llapanpita mas puntata Jesucristo kawamurmi pïmaypitapis mas poderösu kaykan.#Hech. 26.23; Apoc. 1.5.
19Tsaynö poderösu kananpämi Jesucristuchö Tayta Dios kaykan.
20Jesucristo raykurmi kay patsachö kaqkunawan y ciëluchö kaqkunawanpis Tayta Dios amishtarqan.#Efe. 2.16.
21Ñöpataqa noqantsikpis llutankunata yarparmi Tayta Diospa contran karqantsik. Jutsantsikkunam paypita rakimarquntsik. 22Tsaynö kawashqam cruzchö Jesucristo wanunqanpita Tayta Dios perdonamarquntsik. Tsaymi paypa puntanchö jutsaynaq santuna kashun.
23Puntanman chänantsikpäqa Jesucristuman imaypis yärakushun. Alli willakuyninchö nimanqantsikta imaypis wiyakushun. Tsay willakuytaqa maytsaychöpis willakuykäyanmi. Tsaynöllam noqapis willakuykä willakuqnin kanäpä Tayta Dios akramashqa kaptin.
Ñakarpis Pablo willakunqan
24Mana Israel runakunata willanqäpita ñakatsiyämaptinmi Jesucristo iglesianpä ñakanqankunata cumplï. Paypa iglesianqa cuerpunmi kaykan.#Efe. 1.23. Tsaymi llakikunäpa rantin kushikü. 25Iglesianta sirvinäpä Tayta Dios churamashqa kaptinmi#Efe. 3.2. qamkunatapis llapan willakuyninta musyaykätsï.
26Tsay willakuyninta unay runakuna mana musyashqa kayaptinpis kananmi sïqa Tayta Dios musyatsimarquntsik. 27Tsaymi musyantsik mana Israel runakunapäpis tsay willakuy pasaypa kushikuypä kanqanta. Tsay willakuymi nin: Jesucristo qamkunachömi kaykan. Payman criyirmi Tayta Diospa puntanman chäyanki.
28Tsaymi Tayta Dios yachayta qarayämanqanman Jesucristupa willakuyninta llapan runakunata willar shumaq tantiyatsiyä. Tsaynö willakuyä Jesucristuman pïmaypis criyikur Tayta Diospa puntanman jutsaynaqna chäyänanpämi. 29Tsaynö kananpä Jesucristo poderninwan yanapamaptinmi imanö ñakarpis willakur puriykä.
Currently Selected:
Colosenses 1: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.