1 Corintios 3
3
Mana chikinakur kawayänanpä ninqan
1Wawqikuna y panikuna, tsaynö kaptinpis Espíritu Santu munanqannö mana kawayaptikim Jesucristuman mana criyikuq runakunatanö qamkunata yachatsirqü. Qamkunaqa pishi wamranöllarämi kayarquyki. 2Mikuyta manarä yachaq wamrata chuchullawan maman wätanqannömi noqapis qamkunata qallanan yachatsikuykunallatarä yachatsirqü. Kananyaqpis mana tantiyakuq karmi pishi wamranöllarä kaykäyanki.#Heb. 5.12-13. 3Chikinakur y rimanakur kawar ¿manaku Jesucristuman mana criyikuq runakunanö kawaykäyanki? 4Wakikish niyanki: <<Noqakuna Pablutam qatiräyä>>. Y wakikinash niyanki: <<Noqakunaqa Apolustam qatiräyä>>. Tsaynö nir ¿manaku Diosta mana cäsuq runakunanö kaykäyanki?#1Cor. 1.12.
5Tsaynö niyänaykipäqa ¿pitä Apolos? Y noqaqa ¿pitä kä? Noqakunaqa Tayta Diosta sirviq runakunallam kayä. Tayta Dios churayämanqannö sirviyaptïmi Jesucristuman criyikuyarquyki. 6Murukuq runanömi qamkunata willarqü Jesucristuman criyikuyänaykipä.#Hech. 18.4-11. Apolusnam murushqata qarpakuqnö Jesucristupa willakuyninta mas tantiyatsiyäshurquyki.#Hech. 18.24-28. Muruta wiñatsimuqnömi Tayta Dios qamkunata shumaq tantiyatsiyäshurquyki Jesucristuman criyikuyänaykipä. 7Manam muruq kaqtsu ni qarpakuq kaqtsu muruta wiñatsimun, sinöqa Tayta Diosmi.
8Muruq kaqpis qarpaq kaqpis chakra alli wayunanpämi arun. Tayta Diosnam muruq kaqtapis qarpaq kaqtapis según aruyanqanman päganqa. 9Noqapis Apoluspis Tayta Diospa aruqninkunallam kayä. Qamkunanam Tayta Dios arutsinqan chakranö kayanki.
Tsaynöllam Tayta Dios shäritsinqan wayinö kayanki. 10Tayta Dios kuyamar churamashqa kaptinmi alli yachaq albañil churanqan cimientunö arunqäkuna kaykan. Tsay cimientu jananman juk albañil pirqata shäritsiqnömi wakin runakunapis aruyan. Peru shumaq tantiyayätsun imanö aruyanqantapis. 11Manam pipis cimientu churashqana kaykaqta jitaskir juk cimientuta churanmantsu. Jesucristum cimientuqa kaykan.
12Wakin runakunaqa Tayta Dios munanqannö kawar tsay cimientu jananman qoriwan, qellaywan o kuyayllapä chipipiykaq rumikunawan wayita shäritsiqnömi kayan. Peru wakin runakunanam sïqa Tayta Diosta mana cäsur qeruwan, oqshawan o rämakunawanpis wayita shäritsiqnö kayan. 13Mayqanwan shäritsishqapis juiciu final junaqnam llapan arunqantsikpita Tayta Dios juzgamäshun. Tsay junaq juzgamarnintsikmi llapan ruranqantsikkunata ninawan probanqa. 14Cimientu jananchö shäritsinqantsikkunata nina mana ushaptinqa premiutam chaskishun. 15Peru cimientu jananchö shäritsinqantsikkunata nina ushaptinmi sïqa ima premiutapis chaskishuntsu. Tsaynö kaptinmi wayita nina rupaptin runa qeshpir salvakunqannö noqantsikpis salvakushun.
16¿Manaku musyayanki Tayta Diospa templun kayanqaykita? ¿Manaku musyayanki Espíritu Santu qamkunachö taykanqanta?#1Cor. 6.19; 2Cor. 6.16. 17Tayta Diospa templunta ushakätsiq kaqtaqa#3.17 Payman yärakuqkuna Diospa templun kayaptinmi payman yärakuqkunata chikinakatsir, jutsata ruratsir o llutanta criyitsir templunta ushakätsintsik. Tayta Diosmi ushakätsinqa. Qamkunaqa Tayta Diospa templun karmi santu kaykäyanki.
18Shumaq tantiyakuyay. Wakikim yarpäyanki Diosman mana criyikuq runakunanö yachaq kayanqaykita. Rasunpa yachaq kayta munarqa paykuna yarpäyanqannö ama yarpäyaytsu. 19Diosman mana criyikuq runakuna yachaq kayanqanqa Tayta Diospä manakaqllam kaykan. Palabranmi nin:
<<Yachaq kanqanta runa yarpaptinpis manam rasunpatsu yachaq kanqanta musyatsin>>.#Job 5.13.
20Tsaynöllam qellqashqa kaykan:
<<Tayta Diosmi musyan yachaq runakuna imata yarpäyanqantapis.
Payqa musyanmi mana allikunata yarpäyanqanta>>.#Sal. 94.11.
21Tsaynö nikaptinqa ama alabakur niyaytsu: <<Noqaqa Apoluspa o Pablupa qatiraqninmi kä>>. Llapanpis qamkunapana kanqanta tantiyakuyay. 22Tsaymi noqapis, Apoluspis, Cefaspis, kay patsapis, kawaypis, wanuypis, kanan tiempupis y shamunanpä kaq tiempupis qamkunapana llapan kaykan. 23Qamkunanam Jesucristupa kayanki. Jesucristunam Tayta Diospa kaykan.
Currently Selected:
1 Corintios 3: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.