1 Corintios 2
2
Jesucristo cruzchö wanunqanta Pablo willakunqan
1Wawqikuna y panikuna, qamkuna kaqman shamur manam yachaq runakuna parlayanqannötsu ni paykuna yarpäyanqannötsu Tayta Diospa willakuyninta yachatsirqü. 2Tsaynö yachatsinäpa rantinqa Jesucristo noqantsik raykur cruzchö wanunqantam yachatsirqü.
3Qamkunaman shamur mana tantiyatsinäpä kanqanta yarparmi pasaypa llakikurqü. 4Yachaq runakuna parlayanqannö y yarpäyanqannö yachatsinäpa rantinqa Espíritu Santupa poderninwanmi yachatsirqü. 5Tayta Diospa poderninwan yachatsiptï manam runakuna yachaq kayanqanmantsu yärakuykäyanki, sinöqa Tayta Diosmanmi.
Tayta Dios yarpanqankunata Espíritu Santu tantiyatsinqan
6Yachaq runakuna yarpäyanqannö mana yachatsirpis Tayta Diospa willakuyninta shumaq tantiyarmi payman criyikuqkunata yachatsï. Tayta Diospa willakuyninqa manam yachaq runakuna ni poderyuq runakuna yarpäyanqannötsu. Tsay runakunaqa ushakaqllam kayan. 7Diospa yachayninta yachatsiyanqäqa runakuna mana musyayanqanmi. Tsay yachaynintam imapis manarä kaptin Tayta Dios churarqan gloriachö kushishqa kawanantsikpä. 8Kay patsachö mandakuqkunaqa manam mayqanpis tsayta tantiyayarqantsu. Tantiyarqa manam poderyuq Señor Jesucristuta cruzchö wanutsiyanmantsu karqan. 9Mana tantiyayanqantam Tayta Diospa palabranpis nin:
<<Pipis mana rikanqanta,
mana wiyanqanta
y mana yarpanqantam
kuyaqninkunapä Tayta Dios alistashqa>>.#Isa. 64.4.
10Tsay alistanqantaqa Espíritu Santuwanmi Tayta Dios musyatsimarquntsik. Espíritu Santu llapanta musyarmi Tayta Dios yarpanqankunatapis musyan. 11Runa imata yarpanqantapis shonqun musyanqannömi Espíritu Santupis Tayta Dios imata yarpanqantapis musyan. 12Noqantsikqa manam kay mundupa espïrituntatsu chaskirquntsik#2.12 Tsaynö nirmi Pablo nirqan: Manam Diosman mana criyikuq runakuna yarpäyanqannötsu yarpantsik ni paykuna kawayanqannötsu kawantsik., sinöqa Tayta Dios mandamunqan Espíritu Santutam. Tsaynöpam Tayta Dios salvamanqantsikta musyantsik.
13Qamkunataqa manam runakunapita yachakunqätatsu willaykä, sinöqa Espíritu Santu tantiyatsimanqantam. Tsaymi Espíritu Santuta chaskikushqa kayaptiki paypa yarpayninkunata tantiyaykätsï. 14Espíritu Santuta mana chaskiqkunaqa paypa yarpayninkunata manam chaskiyantsu. Paykunapäqa llutan yarpayllam. Espíritu Santu mana tantiyatsiptinmi tantiyayta puëdiyantsu. 15Peru Espíritu Santuta chaskiqkunam sïqa yachatsinqankuna alli kanqanta tantiyar chaskiyan. Imanir chaskiyanqantapis wakinkunaqa manam tantiyayantsu. 16Tayta Diospa palabranmi nin:#2.16 Kay textuta yarpätsirmi Pablo nirqan: Tayta Diosta runakuna juzgayta mana puëdiyanqannömi pay munanqannö kawaq runakunatapis juzgayta puëdiyantsu. Tsaynöllam Jesucristupa willakuyninta willakunqäpita pipis juzgamanmantsu.
<<Tayta Dios yarpanqankunata ¿pillaqa musyantsurä?
Yachaq kananpä ¿pillaqa payta yachatsintsurä?>>#Isa. 40.13; Rom. 11.34.
Peru noqantsikmi sïqa Jesucristo yarpanqannö yarpantsik.
Currently Selected:
1 Corintios 2: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.