MATIUS 3
3
Nasen Yohanes Mananaṛṛani
(Mrk. 1:1-8; Luk. 3:1-18; Yoh. 1:19-28)
1Su tempo udde nirumantate i Yohanes Mananaṛṛani su wadda'u Yudea wuṛṛu nanattakke mannase. 2“Awal᷊ute wuassu manga rosanu,” wisarane, “ana waugu Ruata tate mal᷊annu lai mamarenta ere sangkatou Ratu!” 3Ete i Yohanes udde taumata apan pappandumannu Nabi Yesaya sulal᷊ummu manga wisarane indi,
“Pia taumata u'al᷊iata su wadda'a,
‘Saddiaite lal᷊annu Mawu;
rataṛṛa'e lal᷊anni Tou.’ ”
4I Yohanes ual᷊uṛṛen laubba wuassu wambul᷊un unta. Papeṛṛenne wuassu pisim binatangnga wuṛṛu anni tou saṛṛapalanna wuṛṛu pul᷊an ahuranganna. 5Manambo taumata wuassu Yerusalem, wuassu al᷊awo'u wanua Yudea wuṛṛu wuassu wageangngu leta'u Sal᷊ukku Yordan, nirumanta ringanni Yohanes. 6I mangitou nanga'u manga rosa mangitou, see i Yohanes nanaṛṛanite si mangitou su Sal᷊ukku Yordan.
7Manambo lai taumatan Farisi wuṛṛu Saduki nirumanta ringanni Yohanes maisaṛṛani. Arawe su tempo i tou naasilo si mangitou nirumanta, i tou nabbisara si mangitou, “I yamiu taumata lal᷊eo! Isai suete nabbal᷊o manungku i yamiu mal᷊iudda wuassu ṛuumannu Ruata apan sarun rumanta? 8Pasiloa'e ringannu pallal᷊agunu, manungku i yamiu nawal᷊ute wuassu manga rosanu. 9Arie massunna manungku i yamiu mal᷊iu wuassu ṛuumanna ringannu mabbisara manungku i Abraham uddewe iupungngu al᷊amonang kamiu. Naunge, wuassu manga watu indi lai, Ruata wotongnge ma'ola'a papapulunni Abraham! 10Bal᷊iungnga nasaddiate ipanuwangnga alu, ma'oman sara manga ṛamunne. Al᷊awo'u alu apan tawe mabbua apan mapia sarun tuwanganna wuṛṛu iramme sulal᷊ummu putungnga. 11I ya'u mannaṛṛani si yamiu ringannu ua'e, udde mappaal᷊iatta'a manungku i yamiu nawal᷊ute wuassu paddarosang kamiu, arawe apan sarun dumanta sal᷊immurine wuassia'u, sarun manaṛṛani si yamiu ringannu Ghaṛṛahon Duata wuṛṛu putungnga. I Tou maggewal᷊anna wuassia'u saran mangapiddu sapatune lai Ya'u tawe su ṛinone. 12Su limane pia niṛṛu ipattappa al᷊awo'u ammene ma'oman sara mawaresi. Amme sarun iammulla sulal᷊ummu wal᷊ingkakke, arawe anambon wal᷊aane sarun tutunganna su putungnga apan tawe mappadumma.”
Mawu Yesus nissaṛṛani
(Mrk. 1:9-11; Luk. 3:21-22)
13Su tempo udde Mawu Yesus inaite wuassu Galilea watukku Sal᷊ukku Yordan. Poiaroddi i Tou nirumanta ringanni i Yohanes wuṛṛu naddorongnga maisaṛṛani. 14Arawe Yohanes ma'annamma mannol᷊a'u darorongngi Tou udde. I Yohanes nabbisara, “I ya'u indi ṛinone saṛṛanianni Iamangnga. Orassa indi'e Iamangnga nirumanta ringangku maisaṛṛani si ya'u.”
15Arawe Mawu Yesus nisumimbakka, “Wala'e aroddi su orassa indi. Ana waugu ringannu aroddi i ite ma'ola'a al᷊awo'u apa apan ipaapulun Ruata.” Nariaddi Yohanes nanaṛṛanite Mawu Yesus.
16Napawe suete nissaṛṛani, Mawu Yesus mal᷊iha-l᷊ihakka sinumapputta wuassu ua'en sal᷊ukka udde. Inaṛṛombanganne langitta nawu'a wuṛṛu Mawu Yesus naasilo Ghaṛṛahon Ruata niumonto'a ere manu'a merpati niumarunna si Tou. 17Wua'udde niaringikka tingikku Ruata nabbisara, “Ete indi Ana'u apan arangnguanna, i Tou ma'al᷊uassa naung-Ku.”
Currently Selected:
MATIUS 3: LAITLD
Highlight
Share
Copy
Want to have your highlights saved across all your devices? Sign up or sign in