O ZEFANYA 3
3
O Yerusalem ya hukumu deʼ ihihalamati
1O Yerusalem yalolai, o kota makalakuanga itotorou yoigo iwilawani ma Jou deʼ yätuku manyawa mahirete! 2Ibodito o kota iö olu-oluku yatarima ma Jou Ai hitiari deʼ yolegaikauaö hagala Ai hidaaere, ihilapahiua manga wowango ma Jouika, deʼ yogahokua o roriwo Unangika!
3O kota manyawa yolago-agomo gënanga hokä o singa ipöa-pöaka. Hagala ai hakimi hokä hagala o kaho o honganika yahahini; önanga duru yohorodo hiädono moi o kobongo makoiwa yamal̄aika mangale iyarehino. 4Ai nabi-nabi koiwa toönanga yatagongo mabobaluhu deʼ hakunua hängaku; hagala o imam yapeseke okia ihitö tinga-tingakoka mangale ma Jou deʼ yatakaidulu ma Jou Madutu Ai tita mangale toönanga manga utumu mahirete. 5Mä ma Jou kanagahi o kotaka gënanga; Unanga salalu wadiai itotiai deʼ komaiwahi i howono. O ngorumino magetongo maraioka Unanga wohidöaka o adili Ai umatika. Mä, o nyawa yanako-nakoua o adili o kotaka gënanga kahirahi yodiai itotorou yanakoua yämal̄eke.
6Ma Jou wotemo, ”Ngohi tahohihangoka o hoana deʼ o berera mangöe; hagala toönanga manga kota Tawedere, deʼ hagala o bebeno o mehele ikali toönanga manga menara-menara Tohidadi kama gogilianga. Hagala toönanga manga kota kai rïdika koiwa o nyawa yogogere deʼ hagala manga ngekomo koirameua. 7Tapikiri, ’O öraha nënanga maraioka Ahi umati ihi horomati deʼ yolegaika hagala Ahi dodaaere. Maraioka önanga yohininga o dodotoko Tahi döa-döaka önangika.’ Mä inyata, önanga iholoioli yamagawe yodiai o dorou ngaro deʼ mahira.
8Mä nimahidodiai! Niodama dika mawange Ngohi Tomomiki hokä tini kokalaki. Hababu Taputuhoka mangale tatoomu o höana deʼ o berera ma ago-agomo dedehagala o pareta mangale tahita pal̄u Ahi muruka onanguku. O dunia yamode-modekika aha yamata Ahi gangamo mauku yaol̄omo.
9Mä ipaha Ngohi aha tangali o hoana deʼ o berera ma ago-agomo gënanga manga hininga, hiädono önanga imä niata Ngohino dika, deʼ hagala o gikiri mahomoaikaua. Hagala o hoana deʼ o berera ma ago-agomo gënanga mata-mata aha ihihingounu Ngohi. 10I goungu o Sudanino magogurutika, Ahi umati imahi kokabarihika gënanga aha yoböa deʼ ihihuba o huhuba Ngohino. 11O öraha gënanga, hei Ahi umati, ngini iparaluua niamao inïmal̄ekoli karana nima lawanoka Ngohino. Ngohi aha tä duhu moi-moi o nyawa ima ö ede-edenge deʼ manga hininga ikökurutil̄e, deʼ ngini aha nima lawanokauaoli Ngohino Ahi doporono itebi-tebinoka. 12Dokengoka aha Tä mal̄aika yogogere moi o hoana de o berera manga hininga itotipokouku, yongano-nganono Ahi roriwo. Onanga yakunu yogogere dokengoka. 13#Him. 14:5 O Israeloka manyawa mahou-houohi, aha yodiaiokauaoli o dorou o nagonaika ö; önanga aha yoelukokauaoli deʼ yotipuokauaoli. Onanga aha mata-mata kadema enanga deʼ idame-dame, deʼ yamaookaua o modongo o nagonaika ö dika.”
O morene manyanyi
14Hei Israel, nimä ulili deʼ ninyanyi!
Hei Yerusalem, nimorene deʼ niahininga magahumu!
15Hababu ma Jou womatogumu winïhukumu ngini;
Unanga wäduhuoka hagala niahaturu.
Ngini winï hohongino o Israeloka manga koano nia Jou mahirete.
O öraha nënanga ngini iparaluua niamao nihawanoli.
16Aha iboa maöraha hagala o nyawa damä aha yotemo,
”Hei Yerusalem, uha nohawana deʼ ani hininga i akere.
17Ngini winihohongino ma Jou nia Jou Madutu wopoputurungu.
Ngini niutumu karana Ai kuaha.
Ma Jou womorene deʼ womagarago karana ngini,
Ai dora magoronaka Winihi döaka ngini o ngango mahungi.
18Karana ngini, ünanga wonyanyi womorene
hokä o nyawa magogiria yorameanga.”
Ma Jou wato,
”Obodito initotapalu ngini Tahohihangoka.
Okia-kiaua ini daene Taeheoka.
19Maöraha aha iböa initö tuku-tuku Täwedere,
deʼ o nyawa yosega-sega Tahihalamati;
mata-mata yototabuanga Tatuda tähigilio.
Okia-kiaua yadaene önanga Tangali idadi manga horomati;
kiaka dika, ikali o dunia yamode-modekika,
önanga aha ihi himulia de ihipuji.
20Maöraha aha iböa,
ani nyawa imahi kokabarihika Tätuda tähigilio.
Ngini Tinidiai kainihi gogiriri o dunia mal̄okuoka yamode-modekika,
de mata-mata nia hasili iwöe aha Tohi gilio hokä ihira-hiraoli.”
Ma Jou wo temooka.
Currently Selected:
O ZEFANYA 3: TLB
Highlight
Copy
Compare
Share
Want to have your highlights saved across all your devices? Sign up or sign in
