O ROMA 11
11
Ma Jou Madutu aihininga maoa-oa o Israel manyawaika
1 #
Plp. 3:5
Ngohi toleha: Boteka ma Jou Madutu wäumoka Ai umati mahirete? Marai kowali! Ngohi mahirete o Israel manyawa moi o Abraham aidifauku o Benyamin aiahalino. 2Kowali! Ma Jou Madutu wäumoua Ai umati kamahirahi de womangiri-ngirikoka. Roriadodoto nihiöriki okia yatulihi Ma Jou Ai Demo ma Buku magoronaka mangale o Elia, maöraha ünanga wohingahu o Israeloka manga hali ma Jou Madutuika. Ma Nabi Elia wotemo, 3#1Kok. 19:10, 14 ”Jou, o nyawa manga ngöe yätomäka aninabi-nabi deʼ yawede-wederuku mangöe o ngï ihihuba-huba o huba Ngonaika. Mahou ngohi tomatëngokahi deʼ önanga yomau ihitoma ngohi.” 4#1Kok. 19:18 Okia ma Jou Madutu aibobaluhu o Eliaika? Ma Jou Madutu wïbaluhu, ”Ngohi tätingakikaka yaribuhu tumidi mangale Ahi dirimahirete. Onanga komaiwahi yahuba o Gomanga o Baal.” 5Hoko genangoli o örahanënanga: Naga o hidoku mahuhutulu o nyawa ma Jou Madutu wäiri-irikoka karana Ai hayanga de Ai dora. 6Unanga wäiriki önanga matiti Ai hayanga de Ai dora de matiti o nyawaua manga manarama. Hababu nako ma Jou Madutu aingongiriki gënanga matiti de o nyawa manga manarama, done ma Jou Madutu Ai hayanga de Ai dora gënanga o hayanga de o dora madutuokaua.
7Hoʼ, sarakia? O Israel manyawa yamäkeua okia önanga yalingi-lingiri. Yamömäke-mäke duga-duga o nyawa o doomu moi mai teteke wäiri-irikoka ma Jou Madutu. Mahomoa mata-mata idadioka manga häeke itogowini ma Jou Madutu aigogahokika. 8#Ul. 29:4; Yes. 29:10 Hababu Ma Jou Ai Demo ma Buku magoronaka yatulihi hoko nënanga, ”Ma Jou Madutu wadiai idadi to önanga manga hininga deʼ manga dibanga ihuha imangarati; deʼ hiädono o örahanënanga to önanga manga lako yakunua imahimäke, deʼ toönanga manga ngauku yakunua imahi ihene.” 9#Mzm. 69:23-24 Ma Koano Daud wotemoli,
”Mal̄aikala to ona manga rame-rame idadi o modoi onangika mahirete,
deʼ idadi o baiti, o ngï önanga yäotaka deʼ yowedere!
10Mal̄aikala to ona manga lolega idadi i huhutu hupaya önanga imahimäkeua;
deʼ mal̄aikala önanga idadi yohugu kahiado-adonika.”
11Ngohi tolehali: Maöraha o Yahudi manyawa yäotaka, bote gënanga idadi hupaya önanga yowedere? Hakali-kali kowali! Mä karana önanga yobaradoha, ho o hoana de o berera mahomoa manyawa iholoioli yahihalamati, hiädono idadi o hababu o Yahudi manyawa yäsanangiua o hoana de o berera mahomoa manyawa gënanga. 12Karana o Yahudioka yahowono deʼ yamotekua ma Jou Madutu aimau, ho o hoana de o berera mahomoa manyawa ma Jou Madutu wahibarakati. Yomoholoioli nako o Yahudioka de ma Jou Madutu manga rimoi yaoaokali; marai iholoioli ilamoko mabarakati aha ma Jou Madutu wohidöaka!
O hoana de o berera manyawa mahomoa o Yahudiokaua manga halamati
13Maöraha nanga kayaoa de ngohi totemo-temo o roriadodotika o Yahudi manyawaua! Madëkana nanga, hokä o Yahudi manyawaua manga rasul, ngohi duru ahimumukoka tatamil̄e tongohi ahimanarama. 14Ngohi tonganono ngohi takunu ahinyawa mahirete, manga hininga tasanangiua, hupaya de o ngëkomo gënanga ngohi takunu tahi halamati önanga o hidoku moi. 15Karana önanga ma Jou Madutu wätila, ho o dunia de ma Jou Madutu marimoi yaoaokali; okia hongoli nako ma Jou Madutu wätarima! Marai gënanga kaimatero dika hokä o nyawa yohonengoka de yowangoli!
16Nako o roti o dobiki moi madodihiraka ihidöakoka ma Jou Madutuika, gënanga mamangarati maroti magahumu ihidöakoli ma Jou Madutuika. Deʼ nako magota mangutuku ganga toma Jou Madutu, gënanga mamangarati majaga-jagaö ganga kato Unanga. 17O hidoku moi o zaitun magota majaga-jaga – enagënanga o Yahudi manyawa – yaoto yatobikoka. Deʼ yaoto-oto marioika gënanga ihitataulika o zaitun magota o honganino majaga, enagenangala o Roriadodoto o Yahudi manyawaua. Riadodoto inihi tataulika genangika hupaya Riadodoto niamäo hagala maoa-oa o Yahudi manyawa mangawowango cara rohani. 18Mangale karana gënanga uha ngini niahiuwini önanga yätobi-tobikoka hokä o jaga gënanga. Ngini kokiani nimahininga ngini duga-duga kamajaga. Deʼ koigoungua majaga ihiol̄omo mangutukika, duga-duga mangutuku ihiol̄omo majaga.
19Mä Riadodoto aha notemo, ”Ia, mä o jaga-jaga gënanga yatobiki hupaya ngohi yakunu ihihitataulu maröehika!” 20Gënanga igoungu itiai. Mä onanga yäumo karana önanga yongakuua, enahioko Riadodoto initarima karana Riadodoto nongaku. Hö Riadodoto uha noma edenge karana ganga; i idulu yaino Riadodoto kokiani namäo nohawana. 21Hababu nako ma Jou Madutu wädoraua wäumo o Yahudi manyawa hokä o jaga-jaga madutu gënanga, uha natobote Unanga aha wonïdora mangale woniumo ngona Riadodoto! 22Hö nenangoka ngone hamäke hokokia ma Jou Madutu aioa-oa deʼ hokokia aidogowini Unanga. Unanga wodiai wakaigoungu yoböbaradohaika, mä Unanga aihininga yaoa ngonaika Riadodoto – iti yakunu Riadodoto notatapu nowango de Ai oa. Nako kowali, done Riadodoto ngonaö aha woniumo. 23Deʼ mangale o Yahudi manyawa gënanga, nako önanga yamal̄a manga manarama de manga damäke yongakua, done önanga aha watarimali; hababu ma Jou Madutu wokuaha mangale watarimali önanga. 24Riadodoto nia ahali o Yahudi manyawaokaua ganga hokä o zaitun magota o honganika majaga-jaga. Aa, Riadodoto nako imalawani de anibiaha, yakunu inihitataulu o zaitun magota madutuika, okiaoli hagala o Yahudi manyawa yahitotero de o zaitun magota madutu gënanga majaga-jaga. Marai mangale ma Jou Madutu iholoioli igapanga mangale wahigilioli önanga to önanga manga zaitun magota madutuika.
Ma Jou Madutu aidora de aihayanga mangale o nyawa mata-mata
25O Roriadodoto! Ngohi tonganono uha ngini niamäo hagala mata-mata nihiorikoka. Hababu naga o hali moi ma Jou Madutu womau, mä o nyawa ihiorikowahi. Deʼ ngohi tomau ngini nihiöriki ganga; enagena nënanga: O Yahudi manyawa o hidoku moi manga häeke yatogowini, mä manga manarama de manga damäke gënanga aha igila-gila duga-duga hiädono o Yahudiokaua manyawa yongodumoka yoböa ma Jou Madutuika. 26#Yes. 59:20-21 Hokogënanga o Yahudi manyawa aha yohalamati. Hababu Ma Jou Ai Demo ma Buku yatulihi hokonënanga,
”Ma Koano Wahihohalamati aha woböa o Sion de waino;
Unanga aha waëhe o Yakub aidifauku manga dorou mata-mata.
27 #
Yer. 31:33-34
Ngohi aha tadiai Ahi jaji nënanga dede önanga
maöraha Ngohi tahi apongo to önanga manga baradoha mata-mata.”
28Karana o Yahudi manyawa yoluku yatarima o Abari ma Oa ma Jou Madutuino, önanga yodadi ma Jou Madutu aihaturü; deʼ genanga imateke korona idadi manga utumu o Roriadodoto o Yahudi manyawaua. Mä karana ma Jou Madutu aingongiriki, ho o Yahudi manyawa gënanga itatapu ma Jou Madutu wädora matiti mangaete de mangatohora. 29Hababu nako ma Jou Madutu wäiriki o nyawa deʼ wahibarakati o nyawa geönanga, ma Jou Madutu komaiwa watauru wakilio okia wadodiaioka. 30Mahira ngini nitomotekua ma Jou Madutuika. Mä orahananga ma Jou Madutu wohinyataoka ngini nilapahi de o howono, karana o Yahudi manyawa yotomotekua. 31Hoko genangoli de o Yahudi manyawa gënanga. O örahanënanga önanga yotomotekua ma Jou Madutuika, hupaya ngini ihinyata nilapahi de o howono. Mä ahao onangö aha ihinyata yolapahi de o howono. 32Hababu ma Jou Madutu wamal̄aika o nyawa mata-mata o tomotekua yäkuaha, hupaya Unanga yakunu wohimatoko Ai dora de Ai hayanga onangika mata-mata.
O higiriri ma Jou Madutuika
33 #
Yes. 55:8
Igoungu duru kahagiria ma Jou Madutu aikaya! Igoungu iamoko aisawaro de Ai ganako! O nagona yakunu yatailako de madiai waputu-putuhoka? O nagona yakunu imangarati madodagi Unanga wokarajanga? 34#Yes. 40:13 Ma Jou Ai Demo ma Buku yatulihi hokonënanga,
”O nagona ihiöriki ma Jou ai dibanga?
O nagona yakunu ihidöaka o dodaaere Unangika?
35 #
Ayb. 41:11
O nagona iwihidöaka okia naga ma Jouika
hiädono yakunu yogahoko mabalahi?”
36 #
1Kor. 8:6
Ma Jou Madutu wohidödädadioka hagala moi-moi. Mata-mata maahali ma Jou Madutuino deʼ ganga mangale ma Jou Madutu. Ma Jou Madutu iwihigiriri kahiado-adonika! Amin.
Currently Selected:
O ROMA 11: TLB
Highlight
Copy
Compare
Share
Want to have your highlights saved across all your devices? Sign up or sign in
