O AMSAL 26
26
1Hokä o awana o ngogoro maorahoka, deʼ o domoata mahau-haukoka,
hoko genangö o higiriri mangale o nyawa bodo ipatutua.
2Hokä o totaleo ihoho deʼ imawöwoto o gitawaka,
hoko genangö o lolai yakunua yakorona o nyawa yahowo-howonuaika.
3O keledai kokiani dema aro-aroka mauruino, o kuda kokiani yagohara,
hoko genangö o nyawa bodo kokiani yägohara.
4O nyawa yöbaluhu o nyawa yofuma-fuma manga loleha,
imatero manga bodo deo nyawa gënanga.
5O loleha ibodo-bodo kokiani hobaluhu deo bobaluhu ibodo-bodoli,
hupaya wolö leha-leha wamao ünanga wosawaroua hokä watobote wosawaro.
6Hihuloko womatengo o nyawa bodo la wohidingoto o abari,
imatero hatobiki nanga l̄ou mahirete deʼ halingiri o bodito.
7Hokä o nyawa wolugu-lugu wohidagi ai l̄ou,
hoko genangoli o nyawa bodo wohiade-ade yososawaro manga ngaje-ngaje.
8Hihigiriri o nyawa koiwa-iwa ai ganako,
hokä o helewo haliko hakëkeketika o katepelika.
9Hokä yadalu-daluku ihihupu o hihika manga giamoka,
hokogenangoli o nyawa bodo ihiade-ade yososawaro manga ngaje-ngaje.
10O nagona wahikarajanga o nyawa bodo ekola sabaranga o nyawa
aha yahi rugi o nyawa manga ngöe.
11 #
2Pet. 2:22
Hokä o kaho yögilio mangunangika,
hoko genangoli o nyawa bodo wögilioli aibodo.
12O nyawa duru wobodo-bodo kayaoahi
deo nyawa wamao aidiri wososawaro.
13Iwi totebeturu wöigo wogogere aitauoka;
ünanga wotemo ”Naga o singa maporetoka, ngohi yakunu ihigoli o ngekomo mahidogoronaka.”
14Hokä o ngorana iloliti maengseloka,
hoko genangoli iwitotebeturu waidu-idulu airöehe aingidu-ngidu mal̄okuoka.
15Naga o nyawa iwitotebeturu o goguleua;
hohugara o inomo aiuruoko maünanga wöigoua.
16Iwi totebeturu wamao aidiri iholoi wobarija
ngaro deo nyawa yatumidi ihidöaka manga bobaluhu duru yakokorona.
17O nyawa wonö ninïkiwosapuru o ributu magoronaka enahioko tounangua aimanarama
imatero hokä watagoko o kaho ihühuhuku mangaukika.
18-19O nyawa wotipu-tipu, daha wotemo, ”Ngohi duga-duga tohangaja dika,” kaimatero deo nyawa yätotogohanga ihigogule o dae i bobahaya.
20Nako o gota koiwaka, i honenge o uku;
nako o uru pidaha koiwiwaka, o ributu ma imatogumu.
21Hokä o kuru deʼ o gota yadiai o uku kahirahi itokara;
hoko genangö o nyawa yöigo-igo o ributu yatuhuku okianaga idödadadi.
22O fitana gënanga majame ihemoro;
o nyawa yöigo yalahiri.
23Hokä o bohoko o tonaka ihihopu o haaka,
hokogenangö o nyawa manga uruoka mamutiti mä manga hininga itorou.
24Wotobadohata imutiti aidemo-demo
mä ai hininga iomanga deo akali itotorou.
25Ngaroko ünanga aidemo mahailoa, uha nïngaku;
karana o dohata yakuaha aihininga.
26Ngaroka ünanga wagogono aidohata,
mata-mata o nyawa aha yamake aidorou.
27O nagona yohaiti o pidaha mangale o nyawa mahomoa,
aha yödohodoa magoronauku.
O nagona yadululu o helewo hupaya o nyawa mahomoa yabänga,
aha yabänga mahirete o helewo gënanga.
28Häeluku o nyawa kaimatero dika dehädohata.
O uru mamutiti yädotagao o bodito.
Currently Selected:
O AMSAL 26: TLB
Highlight
Copy
Compare
Share
Want to have your highlights saved across all your devices? Sign up or sign in