O BILANGAN 32
32
O Israel manyawa manga hoana o Yordan ma Ngairi o wange mahiwaroko
(Ul. 3:12-22)
1O Ruben deʼ o Gad manga hoana manga aiwani o gigini duru kahangöe. Maöraha önanga yamake hoko kia marahai o Yaezer deʼ o Gilead matonaka mangale o aiwani o gigini, 2önanga yoiki iwï himanga o Musa, ma Imam Eleazar, deʼ o Israeloka manga tutuda-tutuda mahomoahi. Onanga yato, 3-4”O kota Atarot, o Dibon, o Yeezer, o Nimra, o Hesybon, o Eleale, o Sebam, o Nebo deʼ o Beon, yogö gogeroka o Israeloka de ma Jou Ai roriwo matonaka duru irahai mangale o aiwani o gigini deʼ karana tongomi mia aiwani o gigini duru kahangöe, 5ngomi migahoko hupaya o tonaka nënanga nimihidöaka ngomino idadia tongomi. Uha nimï huloko mimatagali o Yordan ma honongaika.”
6O Musa wohaluhu, ”Onagona yato ngini nimau nigogere nenango kadau, ena hioko nia nyawa nimako hoana de o berera moi yoiki yoparangi? 7Yadodoa hoʼ ngini nimau nidiai o Israel manyawa yohawana mangale yatobongo o Yordan ma Ngairi deʼ yowohama o bereraika ma Jou wahi döa-döaka onangika? 8#Bil. 13:17-33 Nia ama yodiai hoko genangoli, maöraha o Kades-Barnea madaeraka de ngohi tä huloko mangale yatailako o berera gënanga. 9Onanga yadonoka o Eskol ma Waika deʼ yamakeoka matonaka gënanga. Mä maöraha önanga imakilioro, önanga yadiai o Israel manyawa yohawana mangale yowohama o tonaka ma Jou wahi döa-döaka onangika. 10-11#Bil. 14:26-35 Done ma Jou wongamo öraha gënanga hiädono Unanga wotemo, ’O nyawa geönanga yosetiaua Ngohino. Mangale ma hababu gënanga Ngohi tokoboto, onangino manga umuru o taongo monaoko de ihikail̄e maöraha önanga yamal̄a o Mesir, moiua aha yowohama o bereraika Tahi jajajioka o Abraham, o Ishak deʼ o Yakubika.’ 12Mata-mata yakorona o hukumanga gënanga sowaliua o Kaleb o Yefune aingohaka deʼ o Yosua o Nun aingohaka, karana önanga yahinoto kahirahi yosetia Ngohino. 13Ma Jou wangamo o Israel manyawaika hiädono Unanga wä mal̄aika önanga yoiki yodadagi o tonaka ikokakahaka o taongo mo ruata madekana hiädono yongodumu imakoku tuono yolawa-lawanoka Unangika yohonengoka mata-mata. 14Deʼ öraha nënanga, ngini nilawani hokä nia ama-ama! Ngini igoungu o doomu moi o nyawa yobö baradoha yadiai ma Jou ai dohata ifaeoli o Israel manyawaika. 15Nako ngini nima idulu niwï porete ma Jou, done yongodumu o nyawa neönanga aha wä mal̄aika iholoioli itedekana o tonaka ikokakahaka, deʼ ngini dika nidadi o hababu toönanga manga binaha!”
16Daha o Ruben deʼ o Gad manga nyawa gënanga imahi tigi-tigika o Musaika deʼ yotemo, ”Kayaoa de ngomi ihira mihigoko o kurunga-o kurunga o mehele mangale tongomi mia duba-duba, deʼ o kota mabebeno o mehele mangale mia ngohaka de mia hekata. 17Ngomi aha mimahidiai mangale itaiti mitagi mia himangika miparangi mimako moteke de tongomi mia riadodoto. Ngomi aha mihibaluhu o parangi gënanga deʼ mia ao yowohama o bereraika idadi toönanga. Itai-taitino gënanga mia ngohaka deʼ mia hekata yakunu yogogogere nenangoka dau, o kota mabebeno o meheloka, iridi de o parangi o berera madutuino. 18Ngomi aha komilioua tongomi mia tauika ihira de o Israel manyawa mata-mata de manga tonakoka mangale toönanga manga puhaka. 19Kama huhutulö ma ngomi mioluku mia tarima toönanga manga tonakino o Yordan ma Ngairi mahonongaka, karana ngomi mia tarimaka tongomi mia hidoku nenangoka dau, o Yordan ma Ngairi o wange mahiwaroko.”
20O Musa wohaluhu, ”Nako ngini igou-goungu nima hidiai hupaya niparangi mangale ma Jou, 21deʼ mata-mata nia hidogoronaka yakunu yoparangi yatobongo o Yordan ma Ngairi, deʼ ma Jou Ai tutuda matimiuku nitagi nia parangi nia haturu-haturu hiädono ma Jou wäduhu önanga, 22hiädono o berera gënanga imahi döaka Unangika, done ngini yakunu nilio, deʼ ngini nibebasi okia nia dodiai ma Jouika deʼ nia riadodotika, deʼ ma Jou aha winihi döaka o tonaka o wange mahiwaroko nënanga idadi tingini. 23Mä nio hohininga, nako ngini nia totomua nia jaji, ngini nibaradoha ma Jouika deʼ aha wini hukumu karana nia baradoha gënanga. 24Nioiki nihigoko nia kota deʼ nia duba makurunga, deʼ uha nia wohanga nia totomo okianaga ngini nijajajioka gënanga!”
25Daha o Gad deʼ o Ruben manga nyawa yato, ”Tuanga, ngomi aha mia diai okianaga Tuanga nohipopareta. 26Tongomi mia ngohaka de mia hekata deʼ mia aiwani mia gigini o hapi de ikali mia duba aha igogogere nenangoka dau, o Gilead makotaka. 27Mä ngomi nënanga mima hidiai mangale mioiki miparangi ma Jou Ai tutuda matimiuku. Ngomi aha mia tobongo o Yordan ma Ngairi deʼ miparangi hokä ma Jou waheto-hetongoka.”
28 #
Yos. 1:12-15
Done o Musa wohidöaka o pareta nënanga ma Imam Eleazarika deʼ o Yosua deʼ o Israeloka manga tutuda-tutudaika, 29”Nako o Gad ainyawa deʼ o Ruben ainyawa yamoteke ma Jou aipareta deʼ yatobongo o Yordan ma Ngairi mangale yoparangi, deʼ nako de toönanga manga roriwo ngini nihasili nia ora o berera gënanga, done o Gilead matonaka kokiani ngini nia hidöaka onangika idadi toönanga. 30Mä nako önanga yatobongua o Yordan ma Ngairi mangale yoparangi nimako moteke dede ngini, done önanga kokiani yatarima o hidoku o tonaka o puhaka o Kanaan mabereraka, imatero hokä ngini.”
31O Gad deʼ o Ruben manga nyawa yohaluhu, ”Tuanga, ngomi aha mia diai okianaga ma Jou wohipareta. 32Ma Jou Ai tutuda matimiuku ngomi aha mitagi dokengika o Kanaan ma tonakika deʼ mitagi mia himangika miparangi, mä ko kiani o tonaka o Yordan ma Ngairi o wange mahiwaroko nënanga itatapu idadi tongomi.”
33Daha o Musa wohidöaka o Gad deʼ o Ruben manga hoanika deʼ o Manasye ai hoana mahononga mata-mataika o Sihon ai daera, o Amori manga koano, deʼ o Og ai daera, o Basan manga koano, ihi detongo o kota deʼ o tonaka mahigilolitino. 34O Gad ai hoana ihi gokooli o Dibon ma kota, o Atarot, o Aroër, 35o Atarot-Sofan, o Yaezer, o Yogbeha, 36o Bet-Nimra, deʼ o Bet-Haran ma kota hokä o kota-o kota ma bebeno o mehele deʼ hokä mangï o duba makurunga. 37O Ruben ai hoana ihi gokoli o kota-o kota o Hesybon, o Eleale, o Kiryataim, 38o Nebo, o Baal-Meon, deʼ o Sebam. O kota-kota önanga ihi gokoli gënanga önanga yatagali maromanga.
39Ngini Makhir, o Manasye aingohaka nia parangi o Gilead matonaka, de yä ora de nia duhu o Amori manyawa genangoka naga. 40Hababu gënanga o Musa wahidöaka o Gilead matonaka gënanga o Makhir ai ahalika, deʼ önanga yotatapu genangokadau. 41O Yair o Manasye ai hoanino, yaparangi deʼ yaora o kapongo muruono naga, daha ihi romanga ”O Yair makapo-kapongo”. 42O Nobah waparangi deʼ wa ora o Kenat de ikali makapongo-makapongo mahigilolitino, de wohiromanga o Nobah, imoteke ai romanga mahirete.
Currently Selected:
O BILANGAN 32: TLB
Highlight
Share
Compare
Copy
Want to have your highlights saved across all your devices? Sign up or sign in
