O BILANGAN 30
30
O datoro mangale o jaji
1O Musa wohidöaka o datoro-o datoro nënanga o Israel manyawa manga hoana matutuda-tutudaika. 2#Ul. 23:21-23; Mat. 5:33 Nako womatengo o nauru wonazar ekola wahetongo ai jaji deʼ makoboto ma Jouika, hiädono ünanga wanikutu o jaji moika, ünanga kokiani wadiai okia wojajajioka gënanga, deʼ yakunua wohi pongono ai demo.
3-4Nako o moholehe momatengo mogogere ami ama ai tauoka mo nazar ma Jouika, deʼ manikutu ami diri de o jaji moi, deʼ ami ama wohimoteke maöraha woihene o hali gënanga, done o moholehe gënanga kokiani matotomo ingodumu ami nazar de ami jaji gënanga. 5Mä nako maöraha woihene o hali gënanga ami ama wohi motekua, done o moholehe gënanga imi nikutua ami nazar deʼ ami jaji ika. Ma Jou aha womihi apongo münanga, karana münanga ami ama womïduhunu.
6-7Nako o ngoheka momatengo mokawingowahi monazar ekola ami diri manikutu de o jaji moi, mudukua ihira matibangoka ekola kahoko gënanga dika, done munanga imi nikutu o nazar ekola ami jaji gënanga. Nako maduruino munanga mokawingi, munanga kahirahi imi nikutu ami nazar deʼ ami jaji gënanga, iti yakunu ami rokata womi himoteke maöraha woihene mangale o hali gënanga. 8Mä nako ami rokata maöraha woihene gënanga de womï duhunu munanga, done munanga iminikutua ami nazar de ami jaji gënanga. Ma Jou aha womihi apongo munanga.
9Nako o bobao momatengo ekola o ngoheka imi olukika modiai o nazar ekola o jaji manikutu ami diri, munanga morimoi ami nazar de ami jaji ika gënanga deʼ kokiani matotomo.
10Nako o ngoheka momatengo mokawingoka modiai o nazar ekola o jaji manikutu ami diri, 11munanga kokiani matotomo hagala mojajaji gënanga, iti yakunu ami rokata womihi moteke maöraha ünanga woihene o hali gënanga. 12Mä nako maöraha woihene o hali gënanga de ami rokata womï duhunu munanga, done o ngoheka gënanga imini kutua ami nazar ekola ami jajika. Ma Jou aha womihi apongo munanga, karana munanga ami rokata womï duhunu. 13O rokata deʼ manga haku mangale wohigoungu ekola wohiuha moi-moi o nazar ekola o jaji madodiai ngoi hekata. 14Mä nako maöraha woihene o hali gënanga ami okata wo mihi moteke, o ngoheka gënanga kokiani matotomo ingodumu ami nazar ekola ami jaji madodiai ngoi hekata. Ami rokata wohigoungu deʼ o nazar ekola o jaji gënanga karana ünanga womihi moteke maöraha woihene. 15Nako maduruino ami rokata gënanga wohiuha o nazar ekola ami jaji ngoi hekata, done ami rokata gënanga kokiani womahi ta gongo wohiuha gënanga mahasili.
16Genanga doka o datoro-datoro ma Jou wohidöaka o Musaika mangale o nazar deʼ o jaji yadodiai o moholehe momatengo mo gogere ami ama ai tauoka, ekola o ngoheka momatengo mokawi-kawingoka.
Currently Selected:
O BILANGAN 30: TLB
Highlight
Share
Compare
Copy
Want to have your highlights saved across all your devices? Sign up or sign in
