O BILANGAN 19
19
O hapi madoka-dokara yatö tuhu-tuhuku
1Ma Jou wahipareta o Musa deʼ o Harun 2mangale ihidöaka o datoro-datoro nënanga o Israel manyawaika: yal̄ë o hapi mabeka madoka-dokara o dutu moi koiwa manabo deʼ komaiwahi yapake ihimoku o gina. 3Ihi döaka o hapi gënanga ma Imam Eleazarika. O aiwani gënanga kokiani yao ihihupu o tau madoomuoka deʼ yatoaka ma imam ai himangoka. 4De ma Imam Eleazar kokiani wal̄ë mahuhutulu o aiwani gënanga ma awunu deʼ wodohurero wohigali matumudi mahimangino ma Jou Ai Tauika. 5O aiwani gënanga ingodumu, makai, ma akeme, ma awunu deʼ ma mamata madol̄a, kokiani yatuhuku ma imam ai himangoka. 6De ihi gali-galioli ma imam kokiani wal̄ë o aras ma gota mahuhutulu, o hisop o tage moi deʼ o gumini madoka-dokara o ramini moi de wohikaweli o uku magoronaika magogiriaka yatuhuku o hapi madoka-dokara gënanga. 7De ipaha ma imam kokiani wafoka ai pakeanga deʼ woma ohiki. Genanga de iböto ünanga yakunu wowohama o tau madoomu magoronaika, mä ünanga kawopesekohi hiädono o wange itumunu. 8O nyawa watö tuhu-tuhuku o hapi gënanga kokiani wafoka ai pakeanga deʼ womaohiki; unangö kawo pesekohi hiädono o wange itumunu. 9#Ibr. 9:13 De ima tengo ani yopese-pesekua kokiani yatoomu o hapi gënanga makafo deʼ yakelenga o ngï madebi-debinoka o tau ma doomu maporetoka. O kafo gënanga igogono genangoka hupaya o Israel manyawa yakunu yapake mangale yodiai o debini ma upacara ma akere mangale o baradoha iehe. 10O nyawa watotoomu o hapi makafo gënanga kokiani wafoka ai pakeanga, mä ünanga wopeseke hiädono o wange itumunu. O datoro gënanga ipake kahi ado-adonika, kayaoa mangale o Israel manyawa kayaoa o nyawa maporetino yogogogere tingini nia hidogoronaka.
O mayeti yapeke
11O nyawa yakorona o mayeti idadi yopeseke madekana o wange tumidi. 12Mawange mahangeoka deʼ matumidoka ünanga kokiani watebini ai diri de o upacara ma akere, dahao ünanga wotebini. Mä nako mawange mahangeoka deʼ matumidoka ünanga watebinua ai diri, ünanga kahirahi wopeseke. 13O nyawa yakorona o mayeti deʼ watebinua ai diri gënanga wopeseke, karana ünanga iwi tuagi owahi de o upacara ma akere. Unanga wapeseke ma Jou Ai Tau deʼ karana gënanga iwi etongoka ua ma Jou Ai umati.
14Nako imatengo ani yohonenge moi o tau magoronaka, o nagona dika naga o tau gënanga magoronaka ekola yowohama magoronaika, yodadi yopeseke madekana o wange tumidi. 15Mata-mata o kendi de o bohoko koiwa-iwa madadamunu idadi ipeseke. 16Moi-moi o nyawa yakorona o nyawa yätoma de yohonenge manga mayeti, ekola yohonenge mahirete o dumuleoka yopeseke o wange tumidi madekana. Hoko genangoli o nyawa yapeke-peke o lungunu ekola o nyawa yohone-honengoka manga kobongo.
17Mangale yatebini o nyawa yopese-peseke gënanga, kokiani yal̄ë o kafo mahuhutulu o hapi mabeka madoka-dokara yatuhu-tuhukoka mangale o baradoha ma apongo. O kafo gënanga kokiani ihi ngohama moi o bohoko magoronauku, daha yöguhe o akere yol̄o l̄ë l̄ë o akere ihä hahurino. 18O hali madodihiraka magoronaka, enagënanga nako naga o nyawa yohonenge o tau magoronaka, o nyawa yopese-pesekua kokiani yal̄ë o hisop o tage moi, yatono o akere gënanga ma goronauku, daha wodohurero o tauika gënanga deʼ hagala moi-moi naga magoronaka de hagala o nyawaö naga genangokadau. O hali mahinotoka magoronaka, enagënanga womatengo ani iwi korona o mayeti, o lungunu ekola o nyawa yohone-honengoka manga kobongo, o nyawa yopese-pesekua kokiani wïdohurero o nyawa wo pese-pesekika gënanga de madodagi kaimatero dika. 19Unanga kokiani wïdohurero o wange mahangeoka deʼ o wange matumidoka. O wange matumidoka gënanga ibötoka o nyawa yo pese-peseke madebini gënanga ma upacara. O nyawa gënanga kokiani wafoka ai pakeanga deʼ womaohiki. Imulaenge maöraha o wange itumunu ünanga idadi wotebini.
20O nyawa yopese-pesekoka deʼ yadiaiua ai diri madebini ma upacara, kahirahi wopeseke karana iwi tuagi owahi de o upacara ma akere. Unanga wapeseke ma Jou Ai Tau, deʼ iwi etongokaua ma Jou Madutu Ai umati. 21O datoro gënanga ipake kahi ado-adonika. O nyawa wadö dohurero o upacara ma akere gënanga unangö kokiani wafoka ai pakeanga, deʼ o nyawa iwi kokorona o akere gënanga idadi wopeseke hiädono o wange itumunu. 22O baranga wapeke-peke idadi yopeseke, de o nyawa mahomoa yapeke, idadi ipeseke hiädono o wange itumunu.
Currently Selected:
O BILANGAN 19: TLB
Highlight
Share
Compare
Copy
Want to have your highlights saved across all your devices? Sign up or sign in
