O BILANGAN 12
12
O ngo Miryam imi hukumu
1O Musa womil̄ëoka momatengo o Kus mangoheka idadi ngoi hekata, deʼ o hali gënanga idadi o titi o ngo Miryam deʼ o Harun mangale iwi hohedu o Musa. 2Onanga yato, ”Boteka kade o Musa dika ma Jou wotemo-temo? Koigoungua de ngoneö Unanga wotemo-temo?” Ma Jou woihene okia önanga yahetongo. 3O Musa ganga o nyawa duru ai hininga ipoluluku, woma hiholoi de mata-mata o nyawa yowö wango-wango o duniaka nënanga.
4Itodokanino ma Jou wätemo o Musa, o Harun deʼ o ngo Miryamika ”Ngini inï ruange nioiki Ahi Tauika.” Deʼ önanga yoiki gena ngika dau. 5De ma Jou wouti o liate o lobi magoronauku. Ma Jou woma okoino ai Tau mangoranoka deʼ wä ahoko o Harun de o ngo Miryam. O nyawa yahinoto gënanga yotagi manga himangiha, 6deʼ ma Jou wätemo, ”Ni ihene Ahi demo-demo nënanga! Nako tingini nia hidogoronaka naga o nabi womatengo, Ngohi tohi nyata Ahi diri unangika o hayali magoronaka, deʼ mimä ade-ade dede ünanga o nanere magoronaka. 7#Ibr. 3:2 Mä hoko genangua de Ahi gilaongo o Musa. Unanga ganga o nyawa yososetia Ahi umati manga hidogoronaka, dede o sumu-sumua. Maboboloi oli Ahi rupa mawa makeoka! Yadodoa ho, ngini nibarani niwilawani o Musa Ahi gilaongo gënanga?” 8De Ngohi titemo unangika mima rorihimanga, de itotarararonu, dede o sumu-sumua. Maboloioli Ahi rupa mawa makeoka. Yadodoaho, ngini nibarani niwilawani o Musa Ahi gilaongo genanga.
9Ma Jou duru wängamo onangika yahinotö, deʼ Unanga womä joboka. 10Maöraha o lobi gënanga yamal̄a ma Jou Ai Tau, yamake o ngo Miryam imidaenoka o panyake o pado; ami kai mamagarehe hokä o kapasi. Maöraha o Harun womä lega o ngo Miryamika deʼ womi make munanga imi koronaka o panyake gënanga, 11unanga wïtemo o Musaika, ”Nomï riwo, ahi Tuanga, uha nohi gumal̄a ngomi imi hangihara karana o baradoha ngomi mia do diai mia bodo magoronaka. 12Uha namal̄aika münanga modadi hokä o ngohaka magil̄au imahiädonino ihonengoka, de ami akeme mahononga yomela.”
13De o Musa wopoaka ma Jouika, ”Ya Jou Madutu, ngohi togahoko münanga nomihi togumu.” 14#Bil. 5:2-3 Ma Jou wohaluhu, ”O demo ma ade ami biono ami ama waobiri, koigoungua madekana o wange tumidi kokiani munanga matagongo o mal̄eke? Münanga nimi tingaka de o tau madodoomu madekana o wange tumidi, deʼ gënanga de iböto münanga yakunu mowohamoli.” 15Deʼ o ngo Miryam imi hihupu de o tau madodoomu madekana o wange tumidi, deʼ o Israeloka gënanga ima tagali magenangoka hiädono o ngo Miryam imi higumal̄aoli molio o tau madodoomuika. 16De ipaha önanga yamal̄a o Hazerot deʼ imä tau o Paran matonaka ikokakahaka.
Currently Selected:
O BILANGAN 12: TLB
Highlight
Share
Compare
Copy
Want to have your highlights saved across all your devices? Sign up or sign in
