O MARKUS 5
5
O Yesus wihitogumu womatëngo o womaha madorou iwïngohamika
(Mat. 8:28-34; Luk. 8:26-39)
1Ipaha o Yesus deʼ iwinöninïki imahiädono o Galilea ma Taaga mahonongaika, o Gerasa madaeraoka. 2O Yesus kade wouti o ngotiroka, wïngino Unangino o nauru womatëngo o jere ma arukino de wohupu. 3O nyawa gënanga o womaha madorou iwikuaha deʼ wogogere o jereoka. Unanga iwiliko yakunokaua; ngaro de o rante. 4Ma ngaroka ail̄ou deʼ aigiama yaliko de o rante, mä salalu marante-rante gënanga watöaka, deʼ o behi ai l̄ouoka watobiki. Unanga hoko gënanga ai kuata moi okaua o nyawa yakunu iwi tatoko. 5O hutu deʼ o wange ünanga wakaika wakaino o jereika deʼ i totoporonika, daha wopöa-pöaka deʼ ai röehe o helewoika wohi boha-boha hiädono i wi l̄abo-l̄abo.
6Magurutokahi ünanga wïmäke o Yesus woböa, ünanga woma popäta de womaruku o Yesus aihimangoka. 7Deʼ ai ilingi makuatil̄e ünanga wopöaka, ”Yesus ma Jou Madutu wokö Kurutil̄e ai Ngohaka! Aha Ngona nohidodoa ngohi nënanga? De ma Jou Madutu ngohi togahoko, uha nohi hangihara ngohi!” (8O nyawa gënanga wotemo hoko gënanga hababu o Yesus wïtemo unangika, ”Womaha madorou, nohupu de o nyawa nënanga!”)
9Deʼ o Yesus wïleha unangika, ”Ani romanga okia?”
O nyawa gënanga wohaluhu, ”Ahi romanga ’Legiun’ – hababu ngomi nënanga duru kamiangöe!” 10Wögogilio ünanga woributu wogahoko hupaya o Yesus uha wahuloko o womaha madorou gënanga i hupu de o daera gënanga.
11Itigika de o ngï gënanga naga duru kahä ngöe o ode magogiriaka o inomo ima lingiri o gelehoroka. 12O womaha madorou gënanga igahoko o Yesusika, ”Nomï huloko ngomi miwohama o odeika gënanga.” 13Deʼ o Yesus wömodeke. Hoʼ, o womaha madorou gënanga i hupu de o nyawa gënanga deʼ i wohama o odeika. Mata-mata o ode de matika gënanga i piringana deʼ ima ngumo o bakoro madatekoka de o taagauku hoyalutu – mata-mata naga o dutu o ribuhu hinoto.
14O ode yogöa-göana gënanga yopiringana, deʼ ihingahu o abari gënanga o kotaika deʼ o kapongo o kota magilolitino. Ho o nyawa yohupu laʼ yolega okia idädadioka. 15Onanga yaika o Yesusika, ho iwi mäke o nyawa hoko kangano iwi ngoha-ngohamika o womaha madorou gënanga, wogogeruku genangoka. Unanga woma pakeangoka, deʼ aihininga itiaioka. Onanga mata-mata yohawanoka. 16O nyawa yamäke-mäke de mangalako mahirete idädadi mangale o nyawa deʼ o ode gënanga ihiade-ade okia idädadioka. 17Ho o daera gënanga manyawa yogahoko hupaya o Yesus wamal̄a o daera gënanga.
18Maöraha o Yesus woharene o ngotiril̄e, o nyawa kokangano iwi kuaha o womaha madorou gënanga wogahoko o Yesusika, hupaya yakunu wonïki.
19Mä o Yesus wihigumal̄aua, wïtemo, ”Nolio deʼ nohingahu aniriadodotika okia ma Jou wodiaioka mangale ngona deʼ hoko kia Unanga aioa ngonaika!”
20O nyawa gënanga woiki, deʼ muläenge woade-ade o Kota Ngimoi madaeraoka, okia o Yesus wodiaioka unangika. Mata-mata o nyawa yohëranga yoihene gënanga.
O Yairus ngoi ora – O ngoheka momatëngo matigi o Yesus aijuba
(Mat. 9:18-26; Luk. 8:40-56)
21O Yesus womaki lioroli o taaga mahonongaika. O taaga madatekoka gënanga mangangöe o nyawa iwihidoomu iwikilolitino o Yesus. 22Womatëngo airomanga o Yairus woböaino. Unanga ganga o pupuji matau matutuda o kota magoronaka gënanga. Maöraha ünanga wïmäke o Yesus, ünanga womaruku aihimangoka, 23deʼ wogahoko woributu, ”Bapa, ngohi ora mopanyake duru kami hiri. Kayaoa de noböa laʼ nomi pal̄anga, hupaya münanga motogumu deʼ uha mohonenge!”
24Ho o Yesus de o Yairus yoiki imatuono. Manga ngöe o nyawa iwinïki Unanga deʼ iwihi dehoto Ai higili de Ai niraka, Ai himanga de Ai porete.
25Manga hidogoronaka nagaoli momatëngo o ngoheka o taongo ngimoi de hinoto madëkana, mopanyake mokokopoa. 26Mata-mata amitiwi deʼ ami arata koiwaka mamatäka mapäke mahi fangu imi hou-houru, mä komoiua yakunu imihi togumu duga-duga ami panyake idogo itubuho. 27O ngoheka gënanga moihenoka mangöe mangale o Yesus. O nyawa yowöe-wöe manga hidogoronaka gënanga münanga momahi tigi o Yesusika ai poretino möböa, 28karana muna ami hiningaka, ”Iti ngohi tatigi dika Ai juba ngohi aha totogumu!”
29Münanga matigi o Yesus aijuba, deʼ o öraha gënanga dika ami awunu itogumu mokopoa okaua. Münanga mamäo muna motogumoka. 30O öraha gënanga dika o Yesus wamäo naga o kuata ihupu Ai dirino. Unanga womä lega o nyawa yowöe-wöeika gënanga deʼ woleha, ”O nagona yatigi Ahi juba?”
31Iwinöninïki yotemo, ”Bapa Ngona mahirete namäke naga hokokia manga ngöe o nyawa imakokehoto. Deʼ Bapa kanolehahi, o nagona ini tigi Bapa?”
32Mä o Yesus kahoko genangika dika wotailako Ai gilolitino de wälingiri o nyawa iwi tigi-tigioka gënanga. 33O ngoheka gënanga manäko okia idadioka ami dirioka, mohahara deʼ ami hawana momaruku o Yesus aihimangoka deʼ momangaku mata-mata okia idadioka. 34De o Yesus womitemo mangoheka gënanga, ”Ngohi ora, karana ngona nongaku Ngohino, ngona notogumu! Noiki de mahalamati. Ngona duru notogumoka!”
35Magogiriaka o Yesus kawo temo-temohi, o huhuloko yamuruononaga o Yairus aitauoka de yaino. ”Ngoni moholehe Tuanga mohonengoka,” önanga yotemo o Yairusika. ”Ngarouha Tuanga o huha nidiaioli ma Bapa Guru.”
36Wohaduliikaua okia ihi ngahu o nyawa gënanga, o Yesus wïtemo o Yairusika, ”Uha nohawana, nongaku dika!” 37De o Yesus wotagi gila-gila, mä moiö de wahi gumal̄aua iwinïki, sawaliua o Petrus de o Yakobus deʼ ai dodoto o Yohanis. 38Maöraha imahi ädono o Yairus ai tauika, o Yesus wamäke i ruaeuku, deʼ woihene o gari de o dodora makuatil̄e. 39De o Yesus wowohama deʼ wätemo onangika, ”Yadodoa honigigoro deʼ niari? O ngohaka gënanga mohonengua; muna duga-duga moma idu!”
40Onanga iwigogiete o Yesus. Unanga wähuloko önanga mata-mata yohupu. De Unanga wä ao o ngohaka gënanga ngomi ayo de ami ama deʼ yaruange iwinöninïki yowohama o ngohaka gënanga ami kamarika. 41O Yesus wasö o ngohaka gënanga ami giama deʼ womitemo munangika, ”Talita kum,” mamangarati, ”Ngohaka ngoheka, Ngohi toni temo ngonaika: nomomiki!”
42O ngohaka moholehe gënanga de majapati momomiki deʼ momädagi. (Ami umuru o taongo ngimoi de hinoto i böto.) Mata-mata yahöhakihi idädadi gënanga duru yokiriri! 43Mä o Yesus wahipoma-poma kamoikaö de yakunua ihingahu o hali gënanga. Deʼ wätemo, ”Nimi tofo o ngohaka gënanga.”
Currently Selected:
O MARKUS 5: TLB
Highlight
Copy
Compare
Share
Want to have your highlights saved across all your devices? Sign up or sign in
