O MARKUS 3
3
Womatëngo aigiama mahononga i honenge
(Mat. 12:9-14; Luk. 6:6-11)
1O Yesus womakilioroli o pupuji matauika. Genangoka naga womatëngo aigiama mahononga ihonenge. 2Genangoka naga o nyawa yomau yalingiri o Yesus aihowono, hupaya yakunu Unanga iwikalaki. Hoʼ onanga salalu iwitotailako Unanga boteka Unanga aha wahitogumu o nyawa o Yahudioka manga Puji mawangeoka. 3O Yesus wïtemo o nyawa aigiama mahononga ihone-honenge gënanga, ”Naino noma okoino nengokadau, mahimangoka.” 4Daha Unanga wäleha genangokadau manyawa, ”Imoteke nanga agama, ngone yakunu okia hodiai o Puji mawangeoka? O oa hodiai ekola o dorou hodiai? Hahihalamati o nyawa ekola hatoma?”
Onanga kai marirïdoka. 5O Yesus de aidohata woma lega ikilolitino mä Unanga aihininga kai huha dika, karana önanga manga häeke madogowini. Ho witemo o nyawaika gënanga, ”Nohi döakika anigiama.” O nyawa gënanga aigiama wohidöakika, deʼ aigiama maitogumu. 6O Farisi manyawa yamal̄a o pupuji matau gënanga, deʼ de majapati imahi kadailako de o Herodes ainyawa yamuruono naga, laʼ iwitoma o Yesus.
O nyawa manga ngöe o taaga madatekoka
7O Yesus deʼ iwinöninïki yoiki imadohuku o Galilea ma Taagaika. Duru kamanga ngöe o Galileaino manyawa yoiki iwinïki o Yesus. Manga ngöeoli o Yudea de yaino, 8o Yerusalemino, o Idumea madaeraino, deʼ o Yordan o wange mahiwaroko mahonongaino, deʼ o Tirus deʼ o Sidon makota magilolitino. Onanga mata-mata yoböa o Yesusika, hababu önanga yoihene o hali mangöe wadiaioka. 9#Mark. 4:1; Luk. 5:1-3 O nyawa yoböa-böa gënanga duru kamanga ngöe, hiädono o Yesus wähuloko iwinöninïki yasadia o ngotiri, hababu uha hiädono o nyawa mangangöe gënanga iwihidehoto. 10Unanga wahitogumu duru kamanga ngöe o nyawa, hiädono mata-mata o nyawa yopopanyake imahi eho-ehoto imahi dailako imahi tigi Unangika la yakunu iwisö Unanga. 11Deʼ o nyawa yangoha-ngohama o womaha madorou kade iwi mäke Unanga, gila-gila ima ruku Ai himangoka deʼ yopöaka, ”Ngona ma Jou Madutu ai Ngohaka!”
12Mä o Yesus woduhunu ikiria o womaha madorou gënanga i hi ngahu Unanga o naguna.
O Yesus womä ngiriki iwinö ninïki yangimoi de yahinoto
(Mat. 10:1-4; Luk. 6:12-16)
13Ipaha o Yesus wodöa o doporonil̄e, deʼ wä ahoko o nyawa yamuruono naga imoteke Ai mau. O nyawa gënanga yaino, 14daha manga hidogoronaka Unanga wäiriki yangimoi de yahinoto. Wato, ”Ngohi tinï iriki ngini, hupaya ngini nihinïki Ngohi, hupaya ngini tinïhuloko nihingahu o Abari ma Oa ma Jou Madutuino, 15deʼ ngini aha niamäke o kuaha la niaduhu o womaha madorou.”
16Nënanga yangimoi de yahinoto gënanga manga romanga: o Simon (iwihi ahokoli o Petrus), 17o Yakobus deʼ aidodoto o Yohanis enagënanga o Zebedeus aingoha-ngohaka (önanga nënanga yahiromanga Boanerges mamangarati ö dotereke ma ngohaka”), 18o Andreas, o Filipus, o Bartolomeus, o Matius, o Tomas, o Yakobus, o Alfeus aingohaka, o Tadeus, o Simon o berera ma Gogöana, 19deʼ o Yudas Iskariot wososetiaua o Yesusika.
O Yesus deʼ o Beelzebul
(Mat. 12:22-32; Luk. 11:14-23, 12:10)
20Ipaha o Yesus wolio o tauika. Mä o nyawa manga ngöe yoböaoli imatoomu, hiädono o Yesus deʼ iwinöninïki imahi däenua yol̄omo. 21O nyawa manga ngöe yotemo, ”Unanga iwitogohangoka!” Deʼ Ai roriadodoto yoihene o hali gënanga, önanga yoiki yomau iwingöho Unanga.
22 #
Mat. 9:34, 10:25 O agama maguru-guru o Yerusalem de yaino-ino yotemo, ”Unanga o Beelzebul iwïngohamika! O womaha madorou madimono gënanga iwihidöaka o kuaha Unangika la waduhu o womaha madorou.”
23O Yesus wä ahoko o nyawa yowöe-wöe gënanga, deʼ woade-ade onangika o hitotero muruono naga. ”Sarakia yakunu o womaha madorou yaduhu o womaha madorou,” o Yesus wato. 24”Nako o negara moi, i regu-regu de imakokalawani, o negara gënanga aha i tedekanua. 25Deʼ nako o tau moi manyawa deʼ manga rimoi koiwa deʼ imakokalawani, o tau moi manyawa gënanga aha yokilianga. 26Nako o Ibilihi mapareta magoronaka idadi o gitingaka deʼ o galawani, o pareta gënanga i tedekanua, deʼ marai aha ihihanga.
27Moiua o nyawa yakunu yöngohama womatëngo wokua-kuata aitau deʼ waora aiarata nako ünanga wohiraua wïliko o nyawa wokua-kuata gënanga. Wïliko i böto, dahaö ünanga yakunu waora aiarata.
28Nianäko! Okiaka o nyawa o baradoha yodiai deʼ ihidemo o hikauku, önanga yakunu yä apongo. 29#Luk. 12:10 Mä kiaka önanga ihikauku ma Jou Madutu ai Womaha, önanga yakunua yä apongo! Hababu o hikauku gënanga ganga o baradoha i kokakali.” (30O Yesus wahetongo hokogënanga hababu naga o nyawa yotemo o Yesus iwi ngohamika o womaha madorou.)
O Yesus ngoi ayo deʼ Ai riadödoto
(Mat. 12:46-50; Luk. 8:19-21)
31Ipaha de gënanga o Yesus ngoi ayo deʼ Ai riadödoto yoböa. Onanga yotamä maporetoka deʼ yähuloko o nyawa iwiahoko o Yesus. 32O öraha gënanga manga ngöe o nyawa magogiriaka yogogeruku iwihigilolitino o Yesus. Onanga iwitemo Unangika, ”Bapa, ngoni ayo deʼ Ani riadödoto Bapa naga maporetoka. Onanga ini lingiri Bapa.”
33O Yesus wohaluhu, ”O nagona Ngohi ayo? O nagona Ahi riadödoto?” 34Ipaha Unanga wäpulono o nyawa yogögogeruku iwihi gogilolitino deʼ wotemo, ”Ne önanga Ngohi ayo deʼ Ahi riadödoto! 35O nyawa yadodiai ma Jou Madutu aimau, ge önanga Ahi riadödoto o nauru deʼ Ahi biranga deʼ Ngohi ayo.”
Currently Selected:
O MARKUS 3: TLB
Highlight
Copy
Compare
Share
Want to have your highlights saved across all your devices? Sign up or sign in
