O MATIUS 25
25
O hitotero mangale o moholehe yangimoi
1 #
Luk. 12:35
”Oraha okia o Nyawa manga Ngohaka woböa hokä ma Jou, madodagi hokä o hitotero magoronaka nënanga: O moholehe yangimoi iwitotomoteke wokawi-kawingi, o nyawa moi-nyawa moi yal̄ë manga hilo deʼ yoiki iwïbuhuku o nauru wokawi-kawingi. 2Yamotoa onangoka yobodo, deʼ mahomoa yamotoa yosawaro. 3Yamotoa mamoholehe yobodo-bodo yao manga hilo, mä imä gaoua magorohokaha madogo. 4Yamotoa yososawaro yao manga hilo de magorohokaha madogo ma imägao. 5Ma nauru wokawi-kawingi gënanga woböa itedekana, hoʼ mamomoholehe gënanga muläenge yäkioko deʼ imaiduoka.
6Hutu gorona, dahaö yoihene o ilingi ihi böaka, ’Ma nauru wokawi-kawingi woböaka! Niaino niwï buhuku!ʼ 7O moholehe yangimoi gënanga yomomiki deʼ yatuhuku manga hilo. 8Mamoholehe yobodo-bodo gënanga yätemo yoso sawaro ika, ’Nimihi döaka ngomino niagorohokaha mahuhutulu, hababu miahilo imau ihonenge.’ 9’Idadiua!ʼ mamoholehe yososawaro gënanga yohaluhu, ’hababu done ngone mata-mata homa kadonua nanga gorohokaha. Nioiki nimä ija o tokoika.’ 10De mamoholehe yobodo-bodo gënanga yoiki o gorohokaha imä ija. Ho de önanga yoikoka, manauru wokawi-kawingi womahi ädono. Mamoholehe yamotoa ima sösadiaka gënanga yowohama imaku tuono de manauru wokawi-kawingi o rameanga mangï ika, deʼ mangorana ma yabeno!
11 #
Luk. 13:25
Ipaha mamoholehe mahomoa yobodo-bodo gënanga imahi ädono. Onanga yopöaka, ’Tuanga, Tuanga, o ngorana nomi belenga.’ 12Mä manauru wokawi-kawingi gënanga wohaluhu, ’Ngohi ti ni näkoua ngini!ʼ ”
13Deʼ o Yesus wohibobaha o hitotero gënanga hoko nënanga, ”Ma hababu gënanga la nimä göa-göana, hababu ngini nia näkoua ma wange ekola majam.”
O hitotero mangale yolö leleani yaruange
(Luk. 19:11-27)
14 #
Luk. 19:11-27
”Oraha okia o Nyawa manga Ngohaka woböa hokä ma Jou madodagi hokä o hitotero nënanga magoronaka. Womatëngo o nauru womau woiki o berera ikokurutika. Unanga wä ahoko iwïlö leleani, deʼ wahidöaka yögöana ai arata onangika. 15Yolöleleanika gënanga wahidöaka imoteke manga dagakunu moi-moi. Womatëngo wihidöaka o ribuhu motoa o tiwi gurasi. De mahomoa ikali ünanga wihi döaka o ribuhu hinoto o tiwi gurasi. Deʼ womatengoli ünanga wihi döaka o ribuhu moi o tiwi gurasi. Deʼ unanga woma joboka. 16Wolöleleani watotarima o ribuhu motoa o tiwi gurasi gënanga tai-taiti woiki womahi daganga, hoʼ wamäkeoli mautumu o ribuhu motoa o tiwi gurasi. 17Kogenangoli wolöleleani watotarima o ribuhu hinoto o tiwi gurasi, wamäkeoli mautumu o ribuhu hinoto. 18Mä wolöleleani watotarima o ribuhu moi o tiwi gurasi gënanga woiki wahaiti wapidaha o tonakuku, deʼ wagogono ai tuanga ai tiwi genangoka.
19Iböto de gënanga duru madëkana ipahaika, yolö leleani gënanga manga tuanga wolio, deʼ womuläenge imaketongo dede önanga. 20Wolöleleani watotarima o ribuhu motoa o tiwi gurasi gënanga waino, deʼ wohidöaka o ribuhu ngimoi. ’Tuanga,’ ünanga wotemo, ’Tuanga nohidöaka ngohino o ribuhu motoa o tiwi gurasi. Nolega ngohi tohasili tamäke mautumu o ribuhu motoaoli.’ 21’Irahai,’ ma tuanga gënanga wato, ’ngona ganga yolö leleani maoa deʼ nosetia. Karana ngona yakunu honingaku deʼ okianaga mahuhutulu, ngohi aha tonihi döaka okianaga iwöe-wöe ngonaika. Nowohama deʼ nomahi sosanangi dede ngohi!ʼ
22Deʼ wolöleleani watotarima o ribuhu hinoto o tiwi gurasi gënanga waino, deʼ wotemo, ’Tuanga, Tuanga nohidöakoka o ribuhu hinoto o tiwi gurasi ngohino, ngohi tohasili tamäke ma utumu o ribuhu hinotoli.’ 23’Irahai,’ matuanga gënanga wato, ’ngona yolöleleani maoa deʼ nosetia. Karana ngona yakunu honi ngaku deʼ okianaga mahuhutulu, ngohi aha tohi döaka okianaga iwöe-wöe ngonaika. Nowohama deʼ nomahi sosanangi dede ngohi!ʼ 24Ipaha wolöleleani watotarima o ribuhu moi o tiwi gurasi gënanga waino, deʼ wotemo, ’Tuanga, ngohi tanäko Tuanga o nyawa moi notogowini. Tuanga noutuku o hohoko, o ngï kiaka Tuanga genangoka nodatomua, deʼ nal̄ë o hasili, o ngï kiaka Tuanga genangoka nohi barihua o gihihi. 25Ngohi tohawana, hoʼ ngohi toiki ta gogono ani tiwi Tuanga o tonaka magoronaka. Nënanga ani tiwi Tuanga.’ 26’Ngona yolöleleani madorou deʼ notebeturu!ʼ ma tuanga gënanga wato. ’Mode koigoungua ngona nohi orikoka ngohi toutuku o hohoko, o ngï kiaka ngohi todatomua, deʼ tal̄ë o hasili, o ngï kiaka ngohi tohibarihua o gihihi? 27Nako hokogënanga, kokiani ngona nagogono ahi tiwi o bangika, hupaya ma orahoka ngohi tolio, ngohi yakunu totarimaoli ahi tiwi de mabunga. 28Karana gënanga nia l̄ë o tiwi gënanga unangoka, deʼ o ribuhu ngimoi ai tiwi o gurasi gënanga unangika niwihi döakoka. 29#Mat. 13:12; Mark. 4:25; Luk. 8:18 Karana o nyawa to önanga de maenangoka, aha yahi döaka iholoi iwöeoli, deʼ unanga aha de maboloioka. Mä o nyawa komanga kia-kiaua, mahuhutulohi naga onangoka aha yal̄ëoli. 30#Mat. 8:12, 22:13; Luk. 13:28 Deʼ wolöleleani ai faidä koiwa gënanga, iwi umo maporetika mahohuhutuika. Dokengoka ünanga aha woari deʼ watagongo o hangihara!ʼ ”
O adili ihigogere o Kiamati ma Wangeoka
31 #
Mat. 16:27, 19:28 ”Oraha okia o Nyawa manga Ngohaka woböa hokä o koano iwitomoteke mata-mata Ai malaekat, Unanga aha wogogeruku Ai kuruhi imomulia mal̄okuoka. 32Hagala o hoana manyawa aha yätoomu Ai himangoka. Deʼ Unanga aha wäfara önanga yodadi o doomu hinoto, hokä o aiwani magogöana wafara o duba de o kabingi. 33O nyawa yadodiai ma Jou Madutu aimau aha wätoomu Ai nirakoka, deʼ mahomoaohi Ai higiloka. 34Ipaha ma koano gënanga aha wätemo o nyawa Ai nirakoka, ’Niaino ngini winihibö barakati Ahi Ama. Niwohama Ahi Paretaika, kiaka isadiaka mangale ngini madero o dunia madodihiraka idadi. 35Hababu maöraha Ngohi ihi hahini, ngini nihihi döaka Ngohi tol̄omo, deʼ maöraha Ngohi ahi kiriti madudungu, ngini nihihi döaka Ngohi tokere. Ngohi o nyawa dagi-dagino, ngini nihi tarima Ngohi nia tauoka. 36Ngohi toma pakeangua, ngini nihihi döaka o pakeanga. Ngohi topanyake, ngini nihi houru de nihipaliara Ngohi. Ngohi ihi buika, ngini nihï riwo Ngohi.’
37Deʼ o nyawa ge önanga aha yotemo, ’Jou, kahuruono de ngomi minimäke Jou ini hahini deʼ ngomi minihi döaka Jou nol̄omo, ekola ani kiriti madudungu deʼ ngomi minihi döaka Jou nokere? 38Kahuruono de ngomi mini mäke Jou hokä o nyawa dagi-dagino, deʼ ngomi minibuhuku Jou nowohama mia tauika? Kahuruono de ngomi minimäke Jou noma pakeangua deʼ ngomi minihi döaka Jou o pakeanga? 39Kahuruono de mini mäke Jou nopanyake ekola nobuika deʼ ngomi Jou mini riwo?ʼ 40Ma koano gënanga aha wohaluhu, ’La nihi öriki: maöraha ngini niadiai o hali gënanga, ngarokö womatëngo Ahi riadodoto duru yohina-hinaika, mamangarati ngini niadiaioka Ngohino!ʼ
41Deʼ ma koano gënanga aha wätemo o nyawa Ai higiloka, ’Nioiki nenangoka, o nyawa madorou! Niwohama o uku ihone-honengua magoronaika, o Ibilihi deʼ ai malaekat-malaekat manga ngï ika yasösadiaka gënanga! 42Hababu maöraha Ngohi ihihahini, ngini nihihidöakua Ngohi tol̄omo; maöraha Ngohi ahi kiriti madudungu ngini nihihi döakua Ngohi tokere. 43Ngohi o nyawa o dagi-dagino, ngini nihi tarimaua nia tauika. Ngohi toma pakeangua, ngini nihihidöakua o pakeanga. Ngohi topanyake deʼ tobuika, ngini nihipaliaraua.’ 44Deʼ onanga aha yohaluhu, ’Jou, kahuruono de mini mäke Jou inihahini, ekola ani kiriti madudungu ekola o nyawa dagi-dagino, ekola noma pakeangua, ekola nopanyake, ekola nobuika, deʼ ngomi Jou minï riwoua?ʼ 45Ma koano gënanga aha wohaluhu, ’La nihi öriki: maöraha ngini nioluku niäriwo ima tëngo dika duru yohina-hina nënanga, mamangarati ngini nioluku nihïriwo Ngohi.’ 46#Dan. 12:2 Hoʼ o nyawa ge önanga aha yähukumu de o hukumanga i kokakali, hode o nyawa yadodiai ma Jou Madutu ai mau aha yamäke de yamäo o ngango madutu deʼ i kokakali.”
Currently Selected:
O MATIUS 25: TLB
Highlight
Copy
Compare
Share
Want to have your highlights saved across all your devices? Sign up or sign in
