O MATIUS 19
19
O Yesus ai dodötoko mangale o ngongoluku
(Mark. 10:1-12)
1O Yesus iböto wohi ade-adeoka mata-mata gënanga, Unanga wamal̄a o Galilea deʼ woiki o Yudea madaeraika o Yordan ma Ngairi mahonongaka. 2Manga ngöe o nyawa iwinïki Unanga, deʼ Unanga wahitogumu yopopanyake genangokadau.
3Deʼ o Farisi manyawa yaino la iwïbudi Unanga. Onanga yoleha, ”Imoteke nanga agama matita, kaidadi o nyawa yäoluku manga hekata, de okia dika matiti?”
4 #
Kej. 1:27, 5:2 O Yesus wohaluhu, ”Mode ngini niabasa owahi Ma Jou Ai Demo ma Buku, nanga Dodadi, wodiai o nyawa, mahirahi wädiai önanga o nauru deʼ o ngoheka? 5#Kej. 2:24 Deʼ wädiaioka Unanga wotemo, ’Gënanga mahababu o nauru wämal̄a ngoi ayo de ai ama deʼ yodadi moi de ngoihekata, önanga yahinoto yodadi moi.’ 6Hoʼ, önanga yahinotoua maimatëngo. Gënanga mahababu okianaga ma Jou Madutu wohi rimoioka yakunua o nyawa ihikitingaka.”
7 #
Ul. 24:1-4; Mat. 5:31 Deʼ o Farisi manyawa yoleha Unangika, ”Nako hokogënanga yadodoa ho o Musa wohuloko, ihidöaka o ngongoluku mahurata manga hekata yä olu-olukika?”
8O Yesus wohaluhu, ”O Musa wohigumal̄a ngini niäoluku niahekata, hababu ihuhaholi ngini hinïdotoko. Mä imoteke madiai hokogenangua madodihirakahi. 9#Mat. 5:32; 1Kor. 7:10-11 Hoʼ, ni ihene nënanga: O naguna womi oluku ngoi hekata – enahioko o ngoheka gënanga mohowonua – ipaha wokawingoli de o ngoheka mahomoa, o nyawa ge ünanga wohowono.”
10O Yesus iwinöninïki yotemo Unangika, ”Nako mangale o rimoi o rokata de o hekata hokä hokogënanga, iholoi yaoa ngarouha hokawingi.”
11O Yesus wohaluhu, ”Mata-mataua o nyawa yakunu yatarima o ade-ade nënanga, duga-duga o nyawa ma Jou Madutu wödatoroka onangika. 12Karana naga o nyawa yakunua yokawingi, hababu önanga imahidotao manga ayo ami röehokahi. Nagali yakunua yokawingi, hababu o nyawa mahomoa yädiai hokogënanga. Deʼ nagali imängiriki mahirete la yokawingua, hupaya yakunu ma Jou Madutu iwïleleani. O nyawa ya aku-akunu yatarima o dodötoko nënanga, mal̄aika önanga yatarima.”
O Yesus wahi barakati o ngoha-ngohaka
(Mark. 10:13-16; Luk. 18:15-17)
13Naga o nyawa yäao manga ngoha-ngohaka o Yesusika, hupaya Unanga wogelenga Ai giama manga mumukuku deʼ wahiniata önanga. Mä o Yesus iwinöninïki yängamo yäao-ao o ngoha-ngohaka gënanga. 14Mä o Yesus wotemo iwinöninïkika, ”Nia mal̄aika o ngoha-ngohaka gënanga yaino Ngohino. Uha niaduhunu önanga, hababu o nyawa hoko nënanga yodadi ma Jou Madutu ai umati.”
15Deʼ o Yesus wögelenga Ai giama o ngoha-ngohaka gënanga manga mumukuku deʼ wahibarakati önanga. Ipaha Unanga woiki genangoka de woma jobo.
Mangale o kaya manyawa
(Mark. 10:17-31; Luk. 18:18-30)
16O wange moiuku womatëngo o nauru waino o Yesusino, de wotemo, ”Bapa Guru,” ö manarama maoa okia kokiani ngohi tadiai hupaya ngohi tatarima o ngango madutu deʼ i kokakali?”
17O Yesus wohaluhu, ”Yadodoa hongona noleha Ngohino okia naga maoa? Duga-duga naga Womatëngo yaoa. Nako ngona nönahihu nowango, ngona kokiani notomoteke ma Jou Madutu ai pareta-pareta ika.”
18 #
Kel. 20:13-16; Ul. 5:17-20 ”O pareta hoko kiaka gënanga?” o nyawa gënanga woleha.
O Yesus wohaluhu, ”Uha notoma, uha nohowono, uha notohiki, uha nohakihi i elu-eluku, 19#Kel. 20:12; Im. 19:18; Ul. 5:16 nä horomati ngoni ayo deʼ ani ama; deʼ nädora o nyawa hokä ngona nödora ani diri mahirete.”
20”Mata-mata o pareta gënanga tamotekoka,” magoduru gënanga wohaluhu. ”Okiahi i paralu?”
21O Yesus wïtemo unangika, ”Nako ngona nönahihu idadi nototomo, noiki deʼ nahukunu ani arata mata-mata. Ma tiwi nahi döaka o nyawa mihikinika, deʼ ngona aha namäke o arata o horogaka. I böto gënanga, naino la nohinïki Ngohi!”
22Woihene o ade-ade gënanga, magoduru gënanga woiki de aihininga de mahuhaka, hababu ünanga duru wokaya.
23Deʼ o Yesus wätemo iwinöninïkika, ”Ngohi tinïtemo nginika, duru ihuha o kaya manyawa yodadi ma Jou Madutu aiumati. 24Deʼ nenangohi tomau tinihingahu nginika; i holoi igapanga o onta o aiwani ma ago-agomo gënanga iwohama o populaki mapidahika, ma o kaya manyawa igapangua yowohama ma Jou Madutu ai Dunia ma Hungika.”
25Iwinöninïki o Yesus yoihene o Yesus aidemo gënanga önanga yohëranga. Onanga yotemo, ”Nako hokogënanga,” ö nagona yakunu yohalamati?”
26O Yesus wäpulono önanga deʼ wätemo, ”Nako kao nyawa, gënanga yakunua idadi! Mä mangale ma Jou Madutu, mata-mata kayakunu idadi.”
27Deʼ o Petrus wotemo, ”Namäke, ngomi mia mal̄aka mata-mata mia kiahönanga la mininïki Ngona Bapa. Done okia aha ngomi miatarima?”
28 #
Mat. 25:31; Luk. 22:30 O Yesus wätemo onangika, ”Ningaku: O Dunia ma Hungioka, o Nyawa manga Ngohaka aha wogogeruku Ai kuruhi imomulia mal̄okuoka. O öraha gënanga ngini nihinöninïki nigogeruku o kuruhi ngimoi de hinoto mal̄okuoka, deʼ o Israeloka o hoana ngimoi de hinoto aha niahidero o adili! 29Deʼ o nyawa moi-nyawa moi yamal̄aka manga tau ekola manga riadodoto o nauru ekola manga biranga, ekola manga ayo de manga ama, ekola manga ngoha-ngohaka ekola manga dumule karana Ngohi, önanga gënanga aha yatarimaoli higali maratuhu moi. Deʼ önanga aha yatarimaoli o ngango madutu deʼ ikokakali. 30#Mat. 20:16; Luk. 13:30 Mä mangangöe o nyawa o öraha nënanga yohihira aha yodadi yototuru, deʼ o öraha nënanga yototuru aha yodadi yohihira.”
Currently Selected:
O MATIUS 19: TLB
Highlight
Copy
Compare
Share
Want to have your highlights saved across all your devices? Sign up or sign in
