O IMAMAT 23
23
O wange ma amoko
1Ma Jou wohidöaka o Musaika 2o datoro-o datoro mangale o agama marameanga, kokiani wohi ngahu hokä o wange ma amoko mangale o pupuji. 3#Kel. 20:8-10, 23:12, 31:14-15, 34:21, 35:2; Ul. 5:12-14 Naga o wange butanga mangale nimanarama, mä o wange ma tumidoka, o Sabat mawange, ganga o dodogumu mawange yatinga-tingakoka ma Jouika. O wange gënanga ngini kokiani niadiai o doomu mangale nimaka make mangale nipuji deʼ yakunua nimanarama. 4Nenanga hagala o wange ma amoko wohi gogeroka ma Jou deʼ kokiani nihingahu maöraha ihitö tantuoka.
O Paska deʼ o Roti i Ragi-ragiua mawange ma amoko
(Bil. 28:16-25)
5 #
Kel. 12:1-13; Ul. 16:1-2 O Paska mawange ma amoko nihirö rame-rame mangale niwi horomati ma Jou, imulaenge maöraha o wange itumunu mawange ngimoi deʼ iatoka o mede madodi hiraka. 6#Kel. 12:14-20, 23:15, 34:18; Ul. 16:3-8 Yarehino mawange ngimoi deʼ motoaka, imulaenge o Roti i Ragi-ragiua marameanga, deʼ madekana o wange tumidino ngini yakunua nia ol̄omo o roti dema ragi-ragioka. 7-8Madekana o wange tumidino gënanga ngini kokiani nihihuba o huhuba o inomo ma Jouika. Mawange madodihiraka deʼ o wange matumidi o rameanga gënanga ngini kokiani niadiai o doomu hupaya nimakamake mangale nipuji deʼ yakunua nimanarama itubuho.
9-10Nako ngini nimahiädonoka o bereraika ma Jou winihi döa-döaka nginika, deʼ nia toomu matonaka mahasili, o gandum madodihiraka nia utuku magobe nia niku-nikutino kokiani niao ma imamika. 11O Sabat mawange ipahaino, ma imam kokiani wohihuba o gandum gënanga hokä o huhuba ihidö dumu-dumutu ma Jouika, hupaya ma Jou winisanangi nginika. 12Mawangeoka ngini nihihuba o gandum gënanga, ngini kokiani nihihubaö mangale o huhuba yatö tuhu-tuhuku o duba manauru ma ngohaka o dutu moi ma umuru o taongo moi deʼ maröehe koiwa mabodito. 13Mangale o huhuba o inomo nihihuba o kilo hinoto o tarigu nihi ganuino deʼ o zaitun maminya. O huhuba gënanga mabounu yasanangi ma Jou Ai hininga. 14Ihira deʼ iao o huhuba gënanga ma Jouika, kama huhutulö deʼ yakunua nia ol̄omo o gandum mahungi gënanga, kayaoa magouohi, yal̄ofo ekola yaharongo idadi o roti. O datoro gënanga kokiani ihi ngounu nia difauku mata-mata kahi ado-adonika.
O gugutuku ma rameanga
(Bil. 28:26-31)
15 #
Kel. 23:16, 34:22; Ul. 16:9-12 Imulaenge deʼ o Sabat mawange ipahaino maöraha ngini nihihuba ma Jouika o gandum magobe nia niku-nikutino, kokiani ngini nia ëtongo o minggu tumidi itotomo. 16Mawange moritoaka, enagënanga o Sabat mawange matumidino ipahaika, ngini kokiani niao o huhuba ihi dodiaiuku ma Jouika. 17O tau madol̄a moi-moi kokiani ihihuba o roti o gahumu hinoto mangale o huhuba ihidö dumu-dumutu mangale ma Jou. O roti moi-moi kokiani ihidiai de o tarigu ma aluhu o kilo hinoto ipake o ragi deʼ kokiani ihi döaka ma Jouika hokä o huhuba o tonaka mahasili madodihiraka. 18Ihidomoteke deʼ o roti gënanga o Israel manyawa kokiani ihihuba o duba mangohaka maumuru o taongo moi o dutu tumidi, o hapi magö o dutu moi deʼ o kabingi o dutu hinoto. Moi-moi yakunua naga mabodito deʼ kokiani ihihuba mangale o huhuba yatö tuhu-tuhuku mangale ma Jou, deʼ o huhuba yadodiaiuku deʼ o huhuba o angguru ma akere. O huhuba gënanga mabounu yasanangi ma Jou Ai hininga. 19Nihihubaö o kabingi manauru o dutu moi mangale o baradoha ma apongo mahuhuba deʼ o duba manauru maumuru o taongo moi o dutu hinoto mangale o dame mahuhuba. 20O roti deʼ o duba mangohaka hinoto gënanga kokiani ma imam wohihuba hokä o huhuba ihidö dumu-dumutu mangale ma Jou, deʼ gënanga mangale ma imam ai hidoku. O huhuba-o huhuba gënanga ganga itebini. 21O wange gënanga ngini kokiani nidiai o doomu hupaya nimaka make mangale nipuji deʼ yakunua niadiai o manarama madodubuho. O datoro gënanga kokiani nia difauku ihingounu kahi ado-adonika, kiaka dika önanga yogogere.
22 #
Im. 19:9-10; Ul. 24:19-22 Nako ngini o gandum niutuku, o gandum iwö wango-wango nia dumule madate-datekino uha nia utuku deʼ uha nimakilioroli hupaya nia toomu o gandum mahou-hou nia utuku ipahaino. Nia mal̄a ika gënanga mangale o mihikini manyawa deʼ o nyawa maporetino. Ma Jou ganga nia Jou Madutu.
O taongo mahungi marameanga
(Bil. 29:1-6)
23-24O mede matumidoka o wange madodihiraka kokiani nihi rame hokä o wange yatinga-tingakoka mangale nimahi batongo. O wange gënanga ihi nonako deʼ o trompet mailingi, deʼ ngini kokiani nidiai o doomu hupaya nimaka make mangale nipuji. 25Nihihuba o huhuba o inomo ma Jouika deʼ uha nia diai o manarama madodubuho o wange gënanga.
O baradoha ma apongo mawange
(Bil. 29:7-11)
26-27 #
Im. 16:29-34
Ma mede tumidoka mawange ngimoioka ganga o taongo ihi getongo ma upacara mawange mangale o Israel manyawa manga baradoha ma apongo. O wange gënanga kokiani ngini nipuaha deʼ nidiai o doomu hupaya nimaka make mangale nipuji ikali nihihuba o inomo ma Jouika. 28Uha nimanarama, hababu o wange gënanga ganga o baradoha ma apongo mawange, hupaya ngini nia make o apongo ma Jou Ai himangoka nia Jou Madutu. 29Onagona honanga ya ol̄omo okianaga moi, önanga yä etongokaua hokä ma Jou Madutu Ai umati. 30Deʼ onagona honanga yadiai o manarama o wange gënanga, ma Jou mahirete wä hukumu deʼ o hukumanga wä hohonenge. 31O datoro nënanga ipake mangale mata-mata nia difauku kiaka dika önanga yogogere. 32Imulaenge o wange itumunu mawange mahiwoka o mede gënanga hiädono maöraha o wange itumunu mawange ngimoioka, kokiani ngini nihirame hokä o Sabat mawange, o wange yatinga-tingakoka mangale nimahi batongo. O wange magurutu gënanga ngini kokiani nipuaha.
O Tau o hoka-hoka marameanga
(Bil. 29:12-40)
33-34 #
Ul. 16:13-15
O Tau o hoka-hoka marameanga imulaenge o mede matumidoka mawange ngimoi deʼ motoaka deʼ ma dekana o wange tumidino. 35-36Ma dekana o wange matumidino gënanga ngini kokiani nihihuba o huhuba o inomo. O wange madodi hiraka deʼ matufangeoka kokiani ngini nidiai o doomu hupaya nimaka make mangale nipuji deʼ nihihuba o huhuba o inomo ma Jouika. O wange gënanga uha niadiai o manarama madodubuho.
37Genanga doka o agama mawange ma ago-agomo ma Jou wohi totatapuoka deʼ kokiani ngini nihingahu nihikawahaoko. O rameangoka gënanga kokiani ngini niwi horomati ma Jou deʼ nidiai o doomu hupaya nimaka make mangale nipuji deʼ nihihuba o huhuba o inomo, o huhuba yatö tuhu-tuhuku, o huhuba ihidö dumu-dumutu o huhuba o aiwani deʼ o huhuba o angguru ma akere, hokokia mangöe o wange ihi getongo iparalu. 38O rameanga gënanga marupa o Sabat mawange biaha madogo, hoʼ o huhuba-huhuba gënanga nagaö nia ngongike biaha madogo, nia huhubaika mangale nia tuhuhu nia jaji, ekola o huhuba o hininga mahuka ngini nihi döa-döaka ma Jouika.
39 #
Kel. 23:16, 34:22 Ni utuku ipahaino, imulaenge o mede matumidoka mawange ngimoi deʼ motoaka, kokiani ngini nidiai o rame madekana o wange tumidino. Mawange madodihiraka deʼ matufangeoka gënanga o wange yatingakoka mangale nimahi batongo. 40O wange madodihiraka kokiani ngini nia pagele o hohoko duru ma oa-oa nia dumuleino, o palma ma hoka-hokaö deʼ majaga ma alu-aluhu o gota mahoka irubu-rubuino, daha imulaenge o morene marame mangale iwi horomati ma Jou nia Jou Madutu. 41O rame gënanga kokiani nia diai o wangetumidi madekana. O datoro genanga kokiani nia difauku yadiai kaki ado-adonika. 42O wange tumidino madekana yongodumu o Israel manyawa ko-kiani yogogere o Tau o hoka-hoka magoronaka, 43hupaya nia difauku ihiöriki ma Jou wä huloko yogogere o Tau irorahaiua magoronaka, maöraha Unanga wä ao önanga o Mesir mabereraka deʼ yaino. Unanga ma Jou nia Jou Madutu.
44Hoko gënanga o Musa wohiädono o Israel ma nyawaika o datoro-o datoro mangale madodagi yadiai o rame-rame mangale i wi horomati ma Jou.
Currently Selected:
O IMAMAT 23: TLB
Highlight
Share
Compare
Copy
Want to have your highlights saved across all your devices? Sign up or sign in
