O IMAMAT 16
16
O baradoha i apongo
1O Harun aingohaka yahinoto yohonenge ipahaika maöraha ihihuba o uku yadae-daenua ma Jou Ai mau, ma Jou wïtemo o Musaika, 2#Ibr. 6:19 wato, ”Nohiädono ani riadodotika o Harun, duga-duga maöraha ihi tö tantuoka yakunu wö ngohama o Ngï duru iTebi-tebini ihi batingino de o guba, karana genangoka Ngohi tohimatoko Ahi diri o lobi magoronaka o Jaji ma Peti madadamunu mal̄okuoka. Nako o Harun watilakuru o pareta gënanga, ünanga aha wohonenge. 3#Ibr. 9:7 Duga-duga de madodagi wohihuba o hapi manauru ma gö mangale o baradoha ma apongo mahuhuba de o duba manauru o duba moi mangale o huhuba yatö tuhu-tuhuku, o Harun yakunu wö ngohama o Ngï duru iTebi-tebini.”
4Ikali o Harun kokiani wö hininga wohidodiai o datoro-o datoro nënanga. Wö ngohamowahi o Ngï duru iTebi-tebini ünanga kokiani womaohiki daha wapake o imam mapakeanga, enagënanga o baju, o haluara maboboluluku, o gorona maninikutu deʼ o haëke madadamunu, mata-mata yadiai de o ngöere o lenan.
5Daha o Israel manyawa kokiani ihidoaka o Harunika o kabingi manauru o dutu hinoto mangale o baradoha ma apongo mahuhuba deʼ o duba manauru o dutu moi mangale o huhuba yatö tuhu-tuhuku. 6O Harun kokiani wohihuba o hapi manauru o dutu moi mangale o baradoha ma apongo mahuhuba ai dirika mahirete deʼ ai tau madol̄a. 7O kabingi manauru o dutu hinoto o Israel manyawaika kokiani yao ma Jou Ai Tau mangorana mahimangoka. 8Genangoka ünanga kokiani woundi wapake o helewo o gahumu hinoto, moi yanonakoika ”mangale ma Jou” deʼ mahomoa ”mangale o Azazel”. 9O kabingi yairi-irikika mangale ma Jou kokiani ihihuba mangale o baradoha ma apongo mahuhuba. 10O kabingi yairi-irikika mangale o Azazel kokiani kama-ngango yakelengauku ma Jou Ai himangoka daha yaduhu o tonaka i kokakaha ilua-luasika mangale o Azazel, hupaya o Israel ma nyawa manga baradoha iëhe.
11Ipahaika, o Harun wohihuba deʼ watoaka o hapi manauru mangale o baradoha ma apongo mahuhuba ai diri mahirete deʼ mangale aingohaka deʼ ai hekata, 12ünanga kokiani wal̄ë o uku mangï o huhuba mangïoka deʼ wönoa o uku mangaboho waoma-omangil̄e deʼ o dupa ma aluhu o bokoto hinoto, daha wäo o Ngï duru i Tebi-tebinika. 13O dupa gënanga kokiani watuhuku o Jaji ma Peti mahimangoka, hiädono manofo yahawoino o Peti gënanga madadamunu deʼ o Harun yakunua wamake o Peti gënanga madadamunu, hababu nako ünanga wamake ünanga aha wohonenge. 14Daha o Harun kokiani wal̄ë o hapi ma awunu mahuhutulu, deʼ de ai hagarara wödohurero o awunu gënanga o Jaji ma Peti madadamunu mahimangino deʼ wohigali matumidi o Peti mahimangino.
15 #
Ibr. 9:12
Genanga deʼ iböto o Harun kokiani watoaka o kabingi mangale o Israel manyawa manga baradoha ma apongo mahuhuba. O kabingi gënanga ma awunu kokiani wao o Ngï Duru i Tebi-tebinika, daha wodohurero o Jaji ma Peti madadamunu mahimangino deʼ o Peti mahimangino, hokä wadodiaioka de o hapi manauru ma awunu. 16De madodagi gënanga ünanga watebini o Ngï Duru i Tebi-tebini deʼ o Israel manyawa manga peseke deʼ hagala toönanga manga baradoha. Ma Jou Ai Tau kokiani yödebini karana naga o naga o Israel manyawa manga Tau madoomu mahi dogoronaka deʼ yakorona toönanga manga peseke. 17Mulaenge maöraha o Harun wö ngohama o Ngï Duru i Tebi-tebini mangale wodiai o debini ma upacara hiädono ünanga wo hupu, kao nyawa moiö ma yakunua naga o Tau gënanga magoronaka. De iböto wodiai o upacara mangale ai diri mahirete, mangale aingohaka deʼ ai hekata deʼ mangale o Israel manyawa yo ngodumu, 18O Harun kokiani wohupu deʼ woiki o huhuba yatö tuhu-tuhuku mahuhuba mangï ika mangale watebini o huhuba mangï gënanga. Unanga kokiani wal̄ë o hapi deʼ o kabingi ma awunu mahuhutulu, deʼ wohinauhu o huhuba mangï matota tadukika malibuku-libukuoka. 19De ai hagarara ünanga kokiani mahuhutulu o awunu gënanga wodohurero wohigali matumidi o huhuba mangï mal̄okuino. De madodagi gënanga ünanga watebini o huhuba mangï deʼ o Israel manyawa manga peseke hupaya idadi itebini.
O kabingi ma daro-daromo
20Ipahaino wadiai o Ngï duru i Tebi-tebini deʼ o hidoku ma homoa ma Jou Ai Tau madebini ma upacara inoli mahuhuba mangï, o Harun kokiani wohihuba ma Jouika o kabingi mangango yairi-irikika mangale o Azazel. 21Unanga kokiani ai giama hinoto wö gelenga o kabingi gënanga mahaëkuku inoli womangaku o Israel manyawa manga howono, manga baradoha deʼ manga dodilakuru mata-mata. De hoko gënanga o Israel manyawa manga howono mata-mata yatagali o kabingi gënanga mahaëke mal̄okuku. Daha womatengo iwihuloko kokiani waduhu o kabingi gënanga o tonaka ikokakaha malua-luasika. 22O kabingi gënanga yäo o Israel manyawa manga baradoha mata-mata o tonaka ikokakaha madaeraika yogö gogerua deʼ ënanga kokiani yapidili o tonaka ikokakaha ilua-luasika.
23 #
Yeh. 44:19
Genanga deʼ iböto o Harun kokiani wowohama o Tau ma goronaika, wahuputu o imam mapakeanga wapö pake-pake maöraha wowohama o Ngï Duru i Tebi-tebinika, deʼ wamal̄aika o pakeanga ünanga gënanga dokengoka. 24Daha ünanga womaohiki o ngï moioka yatinga-tingakoka deʼ wapake ai pakeanga mahirete. De iböto ünanga kokiani wo hupu deʼ wohihuba o huhuba yatö tuhu-tuhuku mangale ai baradoha mahirete ma apongo deʼ o Israel manyawa manga baradoha. 25O aiwani mahaki mangale o baradoha ma apongo mahuhuba kokiani yatuhuku o huhuba mangïoka.
26O nyawa waota-otana o kabingi mangale o Azazel o tonaka ikokakaha maluas-luasoka kokiani wafoka ai pakeanga deʼ woma ohiki ihira deʼ wolio ai tauika. 27#Ibr. 13:11 O hapi manauru deʼ o kabingi mangale o baradoha ma apongo mahuhuba, ma awunu iao-ao ihi ngohama o Ngï Duru i Tebi-tebinika mangale o baradoha ma apongo, kokiani yao ihihupu o Tau madoomu maporetika deʼ yatuhuku. Makai, mahiode ma akeme deʼ mamamata madol̄a o aiwani hinoto kokiani mata-mata yatuhuku. 28O nyawa watö tuhu-tuhuku kokiani wafoka ai pakeanga deʼ woma ohiki ihira deʼ wolio o Tau madoomuika.
Madodagi ihiamoko o baradoha ma apongo mawange
29-31 #
Im. 23:26-32; Bil. 29:7-11 O datoro-o datoro nënanga kokiani ihingounu kahi ado-adonika. Mawange ngimoi o mede matumidoka, o Israel manyawa deʼ o nyawa maporetino yogogogere manga hidogoronaka kokiani yopuaha deʼ niä duhunu yokarajanga, karana o wange gënanga o wange duru madebi-debini. O wange gënanga kokiani nidiai o upacara mangale yatebini o Israel manyawa deʼ hagala toönanga manga baradoha hupaya önanga yotebini. 32Ma imam wo Amo-amoko, iwi tabi-tabisoka deʼ iwi tingakoka mangale ma Jou Madutu mangale wï tagali ai ama, kokiani wadiai o debini maupacara gënanga. Unanga kokiani wapake o pakeanga yatinga-tingakoka, 33daha wadiai o Ngï Duru i Tebi-tebini madebini maupacara, mahidoku mahomoa ma Jou Ai Tauoka, o huhuba mangï, o imam-imam deʼ o Israel manyawa yongodumu. 34O upacara gënanga kokiani yadiai o taongo moi mamoi mangale yatebini o Israel manyawa deʼ hagala toönanga manga baradoha. Genanga doka o datoro-o datoro kokiani ihi ngounu kahi ado-adonika.
O Musa wadiai hokä ma Jou wihipopareta unangika.
Currently Selected:
O IMAMAT 16: TLB
Highlight
Share
Compare
Copy
Want to have your highlights saved across all your devices? Sign up or sign in
