O YUNUS 4
4
O Yunus ai gangamo deʼ ma Jou Madutu Ai apongo
1O Yunus kautuö deʼ wosanangua deʼ o hali gënanga; ünanga idadi holoi wongamo. 2#Kel. 34:6 Daha ünanga woma niata, ”Ya Jou, koigoungua totemoka mahiraahi tauoka toma gorakuahi, Ngona maraioka aha nodiai hoko nënanga? Genanga mahababu ngohi tohi gila-gila tohi oara ahi diri o Spanyolika! Ngohi tohi öriki Ngona o Jou Madutu notahayanga deʼ notodora, ani sabari ikurutu, Ani hininga ya bole, deʼ salalu nomasadia mangale nangali Ani hukumanga ma datoro. 3#1Kok. 19:4 Oraha nënanga, ya Jou, mal̄aika ngohi tohonenge dika, hababu deʼ towango iholoi yaoa ngohi tohonenge.”
4Ma Jou wohaluhu, ”Ngona koiwa ani hababu mangale idadi nongamo hoko gënanga.”
5Ipaha o Yunus woiki o kota o wange mahiwaroko idaduoka, daha wogogeruku genangoka. Unanga woma diai moi o tau-tau deʼ woma hohongika magoronaka, ikali wododamä okia aha idadi o Niniwe ma kotaoka. 6Daha ma Jou o Jou Madutu wohi wango moi idö dato-datomo itahe iwihi döaka o hohohongo o Yunusika hiädono ünanga wa mao wosanangi. Igoungu, o Yunus duru wosanangi deʼ o dadatomo gënanga. 7Mä iyarehino maöraha ma hohuhutuinohi, ma Jou wadiai moi o pipiti yatetoro o dadatomo mangutuku gënanga, hiädono imaai. 8O wange ipotoka ibötino ma Jou Madutu wohi boa o hidal̄oko ihau-hauku iwuwu o wange mahiwariha. O Yunus ngadeke wokiditoko karana iwi pairuku o wange mahauku matero-tero yatuhuku ai haëkuku. Unanga idadi ai nganono itoaka deʼ womau kawo honenge. Wato, ”De towango iholoi yaoa ngohi tohonenge dika!”
9Ma Jou Madutu wïtemo ünangika, ”Ngona ipatutua idadi hoko gënanga ani hininga ihuha karana o dadatomo gënanga!”
O Yunus wohaluhu, ”Yadodoa hokowali? Ipatutu ngohi idadi duru tongamo hiädono tohonenge.”
10Daha ma Jou wïtemo unangika, ”O dadatomo nënanga iwango o hutu moi dika magoronaka, deʼ o wange yaino enanga imaai; ngona hakali-kali nohi wango ua ekola napaliaraua. Ngaro hoko gënanga ngona namao ani hininga ihuha karana enanga imaai. 11Kiaka iyakunu Ngohi aha ahi hininga ihuhaua tatibanga o Niniwe, o kota ma amo-amoko gënanga. Hababu mahomoa hagala o aiwani hakunua haetongo gënanga, gënangokaö tamake iholoi o nyawa ya ratuhu moi deʼ yamonaoko manga ribuhu o ngohaka yakunuahi ihi tingaka okia ma oa-oa deʼ okia ma dodorou.”
Currently Selected:
O YUNUS 4: TLB
Highlight
Copy
Compare
Share
Want to have your highlights saved across all your devices? Sign up or sign in
