O HOSEA 8
8
Ma Jou wa hukumu o Israeloka karana önanga ya huba o gomanga
1Ma Jou wotemo, ”Nia toilingi o guguli o bahaya ma nonako! O haturü yaparangi Ahi berera, hokä o totaleo o kawihi ya utuku ma inomo! Ahi umati ya tilakuru Ahi jaji dede önanga, deʼ ya lawani hagala Ahi dodotoko. 2Ngaroko önanga ihi hetongo Ngohi toönanga manga Jou Madutu deʼ yo temo önanga ganga Ahi umati ihi nako-nako Ngohi, 3mä önanga yoluku ya tarima okianaga ma oa-oa. Mangale karana gënanga önanga aha yoginake toönanga manga haturü yä giniki.
4Ahi umati ima ngiriki o koano ko ima lehaua Ahi damake. Onanga imä goraka manga tutuda ma Ngohi ko tata rimaiua. Onanga ya l̄ë toönanga manga gurasi deʼ manga haaka daha yo diai o gomanga ma dulada idadi magurehau o hababu toönanga manga bodito ma hirete. 5Ngohi tö dohata o hapi o gurasi ika yahö huba-huba o Samaria ma kota manyawa, Ngohi duru tä ngamo onangika. Hiadono muruonoka önanga aha ka hokogënanga kaya peseke manga diri de ya huba-huba o gomanga? 6O hapi o gurasi yahö huba-huba o Samariaoka, gënanga ganga manga muraa la o Israel manyawa yogö gao-gao. Gënanga ma Jou Madutu ua, deʼ kokiani ya wede-wederuku! 7Ahi umati yo datomo o hidal̄oko önanga aha yautuku o rato ma ngutuku! Toönanga manga gandum ma dumule koi kuratiua aha ihi hasilua o gopuno mangale manga inomo. Mä nako o dumule gënanga kai kurati dika, done ma gandum aha o hoana ma homoa ya mata. 8Hokä o bohoko ibelaka, hoko genangoli o Israel koiwa ma mangarati oli, deʼ yo dadi oka o hoana biaha dika hokä o hoana deo berera ma homoa. 9Hokä o keledai ihü huhuku ko ima himotekua, hoko genangoli o Israel manyawa ya moteke manga mau ma hirete. Onanga yo lingiri o bobatumu o Asyur ino, deʼ i ma ija i ma teke dodiawo de o hoana de o berera ma homoa. 10Hoʼ hoko gënanga Ngohi aha ta toomu deʼ ta hukumu önanga. I tedekanokaua önanga aha yotidono ka manga hiri, nako önanga o Asyur manga koano wä tuku.
11I dogo i woe o huhuba mangï ihigoko o Israel manyawa la yaehe o baradoha, i dogo i woe oli o ngï mangale önanga la yodiai o baradoha! 12Ngohi to tulihi duru kaha ngoe o dodotoko mangale önanga, mä mata-mata gënanga önanga ya oluku karana ya pulono koiwa naga ma dungutu dede önanga. 13Onanga yö igo ihi huba o huhuba Ngohi ino, deʼ ya olomo aiwani ma akeme o huhuba gënanga, ma Ngohi ma Jou, to sanangiua de hagala o huhuba gënanga. Oraha nënanga Ngohi aha tö hininga toönanga manga baradoha deʼ Ta hukumu önanga karana hagala o baradoha gënanga; Ngohi aha ta hidingotoli önanga o Mesirika!
14O Israel manyawaihigoko hagala o kadato, mä önanga iwi wohanga toönanga manga dodadi ika, o Yehuda manyawa yawöe manga kota-kota dema bebeno o meheleka, Mä Ngohi aha tohi guti o uku la yatuhuku ya mata hagala o kadato deʼ toönanga manga kota-kota.”
Currently Selected:
O HOSEA 8: TLB
Highlight
Copy
Compare
Share
Want to have your highlights saved across all your devices? Sign up or sign in
