O IBRANI 5
5
1Moi-moi o imam yomomulia yäiriki o umati manga higoronaka, deʼ yägöraka la iwïleleani ma Jou Madutu hokä toönanga manga dururu. Ai manarama gënanga la wohihuba ma Jou Madutuika o ngongike-ngongike deʼ o huhuba-huhuba mangale o baradoha ma apongo. 2O imam womomulia gënanga una mahirete wobole o hali mangöe magoronaka, deʼ karana gënanga ünanga yakunu wadiai wäbole-bole hagala o nyawaika okia-kiaua yanako deʼ o ngëkomo madiai yahohongohu. 3#Im. 9:7 Deʼ karana gënanga ünanga mahirete wobole, done ünanga kokiani wohihuba o huhuba, karana kaoumatua dika hagala manga baradoha, mä karanaö hagala aibaradoha mahirete. 4#Kel. 28:1 Kao nyawa moiö makoiwa naga yagöraka manga diri mahirete yodadi o imam womomulia. O nyawa yodadi o imam womomulia nako mangale gënanga ma Jou Madutu wïahoko – imatero hokä o Harun.
5 #
Mzm. 2:7
Hokogenangö o Kristus. Unanga womagörakua Ai diri mahirete wodadi o Imam womo Mulia. Ma Jou Madutu mahirete wïgöraka Unanga. Ma Jou Madutu wïtemo Unangika,
”Ngona ahi Ngohaka;
o wange nënanga ngohi todadi Ani Ama.”
6 #
Mzm. 110:4
O ngï mahomoaka ma Jou Madutu wotemoli,
”Ngona ganga o imam kahiado-adonika,
hokä ma Imam Melkisedek.”
7 #
Mat. 26:36-46; Mark. 14:32-42; Luk. 22:39-46 Maöraha o Yesus wowango o duniaka nënanga, Unanga womäniata deʼ wogahoko de Ai böaka de wïgari ma Jou Madutuika, wa aku-akunu wihihalamati o honengino. Deʼ karana Unanga womahimoteke ma Jou Madutuika de Ai horomati ioma-omanga, ho Unanga wihigihene. 8O Yesus ganga ma Jou Madutu ai Ngohaka, mä ngarokö hokogënanga Unanga womädotoko wohingounu de madodagi Ai huha de Ai hangihara. 9Ho iböto Unanga wodadioka wohihohalamati itötotomo, Unanga wodadi o halamati matiti ikokakali mangale o nyawa mata-mata yomote-moteke Unangika, 10deʼ ma Jou Madutu mawohinyata Unanga hokä o Imam womo Mulia, hokä ma Imam Melkisedek!
O hohininga
11Yakorona o Yesus aipangkati hokä o Imam womo Mulia, mangöe naga iparalu ngomi mihingahu nginika, mä ihuha mangale hohitararono hababu ngini itaituaholi nimangarati. 12#1Kor. 3:2 Imoteke madiai ngini maorahoka la ngini nidadi o guru, mä manyonyata ngini kaiparaluohi nimädotoko o nyawa mahomoaika mangale mahohol̄e madodihiraka ma Jou Madutu aidodötoko. Ngini yakunowahi niatarima o inomo madodogowini; ngini kokiani niokere kaohuhuohi dika. 13O nyawa kayohuhuohi, mamangarati Unanga kaongohaka magil̄auohi; ünanga koiwahi wödibanga i kurutika mangale okia itiai de okia ihowono. 14O inomo itotogowini ganga mangale o nyawa yobalu-baluhoka karana yamömäke-mäke deyadodiai, yakunoka ihilihowono kiaka maoa deʼ kiaka madorou.
Currently Selected:
O IBRANI 5: TLB
Highlight
Copy
Compare
Share
Want to have your highlights saved across all your devices? Sign up or sign in
