O IBRANI 11
11
O ngongaku
1De nanga ngongaku mamangarati hohigoungu hagou-goungu mangale o hali-o hali höngano-nganono, mamangarati hohiöriki de madiai mangale o hali-o hali hamäke-mäkeua. 2Karana de manga ngongaku, hohagala o nyawa kahuruonino ma Jou Madutu aihininga yadäene.
3 #
Kej. 1:1; Mzm. 33:6, 9; Yoh. 1:3 Karana de nanga ngongaku, hongone homangarati o alami nënanga idadi mangale ma Jou Madutu aidemo; hoʼ, okia yakunu hamäke, idadi de okia yakunua imäke.
4 #
Kej. 4:3-10
Karana de aingongaku, ho o Habel wohihuba ma Jou Madutuika iholoi yaoa de to Kain aihuhuba. Karana aingongaku gënanga, o Habel ma Jou Madutu wïtarima hokä o nyawa maoa, hababu inyataka ma Jou Madutu watarima aihuba. O Habel wohonengoka, mä karana aingongaku gënanga, ho ünanga kawo temo-temohi hiädono örahananga.
5 #
Kej. 5:21-24
Karana de aingongaku, ho o Henokh wohonengua, duga-duga iwigöraka deʼ iwiao ma Jou Madutuika. Kao nyawa moiö de yakunua iwimäke ünanga, hababu ünanga ma Jou Madutu wïgorakoka. Ma Jou Ai Demo ma Buku magoronaka yatulihi ihira de o Henokh iwigöraka, ünanga ma Jou Madutu aihininga wadäene. 6De o ngongakua, kao nyawa moiö de yakunua ma Jou Madutu aihininga yadäene. Hababu o nyawa yoböboa-boa ma Jou Madutuika kokiani yongaku ma Jou Madutu naga, deʼ ma Jou Madutu wohi döaka mabalahi o nyawa iwilingi-lingirika.
7 #
Kej. 6:13-22
Karana de aingongaku, ho o Nuh ma Jou Madutu wihingahu mangale o hali-o hali aha idödädadi maduruino, kiaka ünanga wamömake-makeua. O Nuh wihingounu ma Jou Madutu hiädono ünanga wodiai o kapa o gahumu moi inyata maduruino iwihihalamati aidiri kamamoi de aitau madol̄a. De hokogënanga o dunia yahukumu, ho de o Nuh mahirete karana aingongaku ma Jou Madutu wohinyata hokä o nyawa maoa moi.
8 #
Kej. 12:1-5
Karana de aingongaku, ho o Abraham wihingounu ma Jou Madutu maöraha ma Jou Madutu wïahoko deʼ wïhuloko woiki o bereraika ma Jou Madutu wihijäjaji unangika. Done o Abraham womagöraka de wohiorikua okiaika aha woiki. 9#Kej. 35:27 De aingongaku o Abraham wögogere maberera ma Jou Madutu wihijäjajioka unangika gënanga hokä o nyawa mahomoaino. O Abraham wogogere genangoka o tau-tau magoronaka. Hokogenangoli o Ishak deʼ o Yakub, imaketero yatarima o jaji ma Jou Madutuino. 10Hababu o Abraham magogiria wododamä o kota ma Jou Madutu wohidö dailako de wohigögoko-goko de mapondasi ikökua-kuata.
11 #
Kej. 18:11-14, 21:2 Karana de aingongaku, o Abraham yakunu wamäke o difauku o ngo Sarahino, ngarokö o Abraham duru iwiperekioka, deʼ o ngo Sarah mahirete mofätua. O Abraham wohigoungu ma Jou Madutu aha wohiganapu Ai jaji. 12#Kej. 15:5, 22:17, 32:12 Ngarokö öraha ganga o Abraham hokä o nyawa airöehe ihonengoka, mä unanga wamäke o difauku kamangangöe, mangangöe hakunua haëtongo, – mangangöe hokä o murumu o dihangoka deʼ o dowongi o höhana madatekino.
13 #
Kej. 23:4; 1Taw. 29:15; Mzm. 39:13 Mata-mata o nyawa geönanga itatapu de manga ngongaku hiädono yohonenge. Onanga yatarimaua o hali-o hali ma Jou Madutu wahijöjäjajioka, mä duga-duga kamagurutoka de yamäke deʼ yödähongo. Deʼ degënanga önanga imahinyata önanga duga-duga o nyawa mahomoaino de o dagi-dagino o duniaka nënanga. 14O nyawa imahëtongo hokogënanga ihidumutu de madiai önanga magogiria yalingiri o berera aha idädadi toona manga berera madutu. 15Koigoungua o berera kiaka önanga yamal̄a-mal̄aka gënanga önanga yatiba-tibanga. Hababu nako hokogënanga, done önanga yamäkeoka o ngëkomo mangöe la imakilioroli o bereraika gënanga. 16Mä manyonyata, önanga yöigo de yönganono moi o berera iholoi yaoa, enagënanga o berera o horogaka. Mahababu gënanga ma Jou Madutu iwimal̄ekua nako önanga iwihetongo Unanga toönanga manga Jou Madutu, hababu ma Jou Madutu wasadiaka o kota o gahumu moi mangale onanga.
17 #
Kej. 22:1-14
Karana de aingongakuoli, ho o Abraham wihihuba o Ishak hokä o huhuba maöraha ünanga ma Jou Madutu wïuji. O Abrahamika dika ma Jou Madutu wohidöaka Ai jaji, mä o Abraham womödeke wohidöaka aingohaka womatëngo-tëngoka gënanga. 18#Kej. 21:12 Ma Jou Madutu wïtemoka o Abrahamika, ”De mangëkomo o Ishak nënanga ngona aha namäke o difauku tonihijöjäjajioka ngonaika.” 19O Abraham wohiöriki igoungu ma Jou Madutu wakunu wihiwango okali o Ishak o honenge mahigoronaka – hoʼ, yakunu hahetongo o Abraham wïtarima okali o Ishak o honengino.
20 #
Kej. 27:27-29, 39-40 Karana de aingongaku ho o Ishak wahijaji hagala o barakati o Yakub deʼ o Esauika mangale öraha manga hima-himangika.
21 #
Kej. 47:31–48:20
Karana de aingongaku, ho ihira de o Yakub wohonenge, ünanga wahidöaka aibarakati o Yusuf aingoha-ngohakika – de womahiake aidiki-diki mahäekika deʼ wïhuba ma Jou Madutu.
22 #
Kej. 50:24-25; Kel. 13:19 Karana de aingongaku, ho o Yusuf – maöraha itigi-tigi o dunia wamal̄a – wotemo-temo mangale o Israeloka o Mesir de yohupu, deʼ wamal̄a o behehongo mangale okia kokiani yodiai aimayetiika.
23 #
Kel. 1:22, 2:2 Karana de manga ngongaku, ho o Musa aidimono iwiiunu o mede hange madëkana womakil̄au ipahaika. Onanga iwimäke ünanga o ngohaka moi kaihailoa, deʼ onanga yohawanua yalawani ma koano aipareta.
24 #
Kel. 2:10-12
Karana de aingongaku, ho o Musa de wolamokoka, woluku iwihëtongo makoano Mesir ngoiora amingohaka. 25De o wowango iböbaradoha masanangi wajame kajai-jaino dika, ünanga iholoi wöigo watagongo o huha de o hangihara imakokinïki de ma Jou Madutu aiumati. 26De wamäke hagala o Mesir maberera maarata, o Musa wamäo iholoi ikurutil̄e maragane o hidoku wamäke o hikauku karana ma Koano Wohihohalamati ma Jou Madutu wohijöjäjaji gënanga, hababu o Musa wönganono o hewa o wange ma duruino.
27 #
Kel. 2:15
Karana de aingongaku, ho o Musa wamal̄a o Mesir de kowamäoua ma koano aidohatika. O Musa wotagi aihimangika wödumutu touna aidungutu hokä ünanga wimäkeoka ma Jou Madutu himömake-makeua gënanga. 28#Kel. 12:21-30 Karana de aingongaku ho o Musa wadiai o Paskah deʼ wahipareta hupaya ihieheika o awunu o Israeloka manga tau mangoranika hupaya o Honenge ma Malaekat uha wätoma toönanga manga ngoha-ngohaka o riaka.
29 #
Kel. 14:21-31
Karana de manga ngongaku ho o Israel manyawa yakunu yatobongo o Ngöto ma Doka-dokara, önanga imädagi hokä o tonaka madüdudungu mal̄okuika, hode o Mesir manyawa o gahi gënanga yälahiri, maöraha önanga ihitaili yatobongoli.
30 #
Yos. 6:12-21
Karana de manga ngongaku o Israel manyawa yakunu yaruba o Yerikho makota mabebeno o mehele ipahaino önanga yögiloliti o wange tumidino madekana. 31#Yos. 6:22-25, 2:1-21 Karana de ami ngongaku dika, ho o ngo Rahab, o ngoheka amiröehe mahuku-hukunu gënanga, imi hidotomaua de o nyawa iwilawa-lawani ma Jou Madutu; hababu münanga kamahidodiai mätarima o Israel manyawa yotötailako.
32 #
Hak. 4:6–5:31, 6:11–8:32, 11:1–12:7, 13:2–16:31; 1Sam. 1:1–25:1; 1Sam. 16:1–1Kok. 2:11 Aa, ngohi katakunu dika tohigila-gila totemo-temo, ma ahi öraha yawedonua. Hababu ngohi tähëtongowahi na o Gideon, o Barak, o Simson, o Yefta, o Daud, o Samuel, deʼ o nabi-nabi. 33#Dan. 6:1-27 Karana de manga ngongaku, önanga yahohihangoka o kokoano manga popareta. Onanga yodiaioka okianaga madiai, hiädono yatarima okianaga ma Jou Madutu wohijäjajioka. Onanga yatamunu hagala o singa mauru, 34#Dan. 3:1-30 yahohonenge o uku ihohiru-hiru madökara, yahirehene de o oworo madoto. Onanga yobole, mä yodadi yokuata; önanga yonauru o parangi magoronaka hiädono yahohihanga o hoana de o berera mahomoaino manga tentara. 35#1Kok. 17:17-24; 2Kok. 4:25-37 Karana de manga ngongaku, ho o ngongoheka yakunu yamäke okali manga nyawa yohone-honengoka.
Nagali yömodeke yähangihara hiädono yohonenge, deʼ yoluku yahibebasi, karana yomau yahiwangoli mangale moi o wowango i holoi yaoa. 36#1Kok. 22:26-27; 2Taw. 18:25-26; Yer. 20:2, 37:15, 38:6 Naga yähohedu, yägohara yäliko de o rante, deʼ yahingohama o bui magoronaika. 37#2Taw. 24:21 Onanga yäkaweli de o helewo hiädono yohonenge, naga yätobiki de o garagaji, deʼ yätoma de o oworo. Onanga yonöniarara de manga pakeanga o duba makai ekola o kabingi makai; önanga yomihikini, yä aniaya deʼ yähangihara. 38O dunia nënanga toönanga manga ngï madutuua. Onanga yonöniarara o tonaka ikökakahaka deʼ o dodoporonika, inoli yogögere hagala o aruku magoronaka deʼ o tonaka ipida-pidaha magoronaka.
39Hokokia maamoko o utumu yamäke o nyawa mata-mata gënanga karana toönanga manga ngongaku! Mä onanga yatarimaua okianaga ma Jou Madutu wohijäjaji, 40hababu ma Jou Madutu de Ai datoro iholoi yaoa mangale ngone. Ai datoro enagenangala duga-duga kamamoi dede ngone, önanga aha idadi yototomo.
Currently Selected:
O IBRANI 11: TLB
Highlight
Copy
Compare
Share
Want to have your highlights saved across all your devices? Sign up or sign in
