O IBRANI 1
1
Ma Jou Madutu wotemo-temo imadöhanga de ai Ngohaka
1Mahiraino haramangöe ma Jou Madutu wotemo-temo nangaete de nangatohoraika wäpäke o nabi-nabi de wäpäke irupa-rupa madodagi. 2Mä o öraha mabobahaoka nënanga Unanga wotemo-temo ngoneino imadohanga Ai Ngohaka. De madodagi Ai Ngohaka nënanga ma Jou Madutu wohidadi o alami de madol̄a. Deʼ ma Jou Madutu wohitantuoka Ai Ngohakö gënanga wahaku hagala mata-mata ka Unanga madutu. 3Unangino ihupu ma Jou Madutu aimulia ilöleto-letongo; Unanga ganga ma Jou Madutu aidiri mahirete madulada inyata-nyata. Unangoli ganga wapaliara o alami mata-mataika kamagahu-gahumu de to Unanga aidemo duru ikokuaha. Ipahaika Unanga wohigumal̄a o nyawa yolapahi de toona manga baradoha, Unanga wögogere Ai kuruhi imomulia o horogaka imatuonino de ma Jou Madutu, Wokokuaha wokökurutil̄e.
Ma Jou Madutu Ai Ngohaka aimulia
4O ngohaka gënanga wamäke aigogere iholoi ikurutil̄e de o malaekat, deʼ o romanga iwihidöa-döaka ma Jou Madutu iholoi ikurutika mahoromati de o romanga yahidöa-döaka o malaekatika. 5#2Sam. 7:14; 1Taw. 17:13; Mzm. 2:7 O malaekatika kamoikaö mä ma Jou Madutu komaiwa wotemo hokonënanga,
”Ngona ahi Ngohaka;
o wange nënanga Ngohi todadi ani Ama.”
Yäkorona o malaekat okia dika, komaiwa ma Jou Madutu wotemo hokonënanga,
”Ngohi aha todadi ai Ama,
deʼ Unanga aha wodadi ahi Ngohaka.”
6 #
Ul. 32:43
Mä maöraha ma Jou Madutu wïhuloko Ai Ngohaka o riaka o duniauku nënanga, ma Jou Madutu wotemo hokonënanga,
”Mata-mata ma Jou Madutu aimalaekat mapatutu iwihuba ma Ngohaka gënanga.”
7 #
Mzm. 104:4
Yakorona hagala o malaekat, ma Jou Madutu wotemo hokonënanga,
”Ma Jou Madutu wadiai hagala aimalaekat yodadi o hidal̄oko,
deʼ hagala iwïlöleleani yodadi o uku madokara.”
8 #
Mzm. 45:7-8
Mä ma Ngohakika gënanga, ma Jou Madutu wïtemo,
”Ani kuruhi imomulia ya Jou Madutu, aha ikakali kahi ado-adonika!
Ani popareta ganga o popareta iadi-adili.
9Ngona nöigo o adili deʼ nödohata o lalimi; mahababu gënanga ma Jou Madutu,
Ani Jou Madutu Ngona woniiriki deʼ Ngonaika wonihidöaka o horomati ya ao-ao o mörene,
noholoi de anidodiawo.”
10 #
Mzm. 102:26-28
Ma Jou Madutu wotemoli,
”Ngona ma Jou, madodihirakahi o dunia nohidadi,
deʼ Ngona mahirete nodiai o dihanga.
11Mata-mata gënanga aha ihihanga,
deʼ idadi madorou hokä o pakeanga; mä Ngona nongaliua.
12O alami mata-mataika nënanga aha natupukoro hokä o baju,
deʼ aha mahomoali nohitururu.
Mä Ngona komaiwa aha nongali,
deʼ Ani ngango aha koiwa mabobaha.”
13 #
Mzm. 110:1
O malaekat kamoikaö ma komaiwahi ma Jou Madutu wotemo hokonënanga,
”Nogogeruku Ahi nirakoka,
hiädono hagala Ani haturü tahidodokouku anil̄ou matimioka.”
14Nako hokogënanga, imoteke madiai hagala o malaekat gënanga okia? Onanga ganga hagala o womaha iwïlölöleleani ma Jou Madutu, deʼ ma Jou Madutu wahulo-huloko la yariwo hagala o nyawa aha yatotarima o halamati.
Currently Selected:
O IBRANI 1: TLB
Highlight
Copy
Compare
Share
Want to have your highlights saved across all your devices? Sign up or sign in
