O GALATIA 3
3
O agama matita ekola o ngongaku o Kristusika
1O Roriadodoto o Galatia manyawa mata-mata! Ngini igoungu nibodo! Boteka ngini inï koronaoka o nagona naga manga bobaja? O Kristus ai honenge o saliboka ngohi tohitararonoka nginika tohi totiaika. 2Beika nihihi ngahu ngohino o hali moi nënanga: Boteka ngini nia tarimaka ma Jou Madutu ai Womaha karana niadiai o agama matita, ekola karana ngini ni ihene o Abari ma Oa ma Jou Madutuino deʼ niwi ngaku o Kristusika? 3Yadodoa ho ngini hoko gënanga nia bodo! Ngini nimulaengoka o wowango mahungi de ma Jou Madutu ai Womaha, sarakia öraha nanga ngini nimau nia mäke itötotomo de tingini nia kuata mahirete? 4Parahaja dika mata-mata ngini nia mäo-mäoka gënanga? O nagona yato parahaja! 5Ma Jou Madutu wohi döaka ai Womaha nginika deʼ naga idadi o nonako ihëra-hëranga ngini nia hidogoronaka. Boteka ma Jou Madutu wodiai gënanga karana ngini niadiai o agama matita ekola karana ngini ni ihene o Abari ma Oa gënanga deʼ ningaku o Kristusika?
6 #
Kej. 15:6; Rm. 4:3 Gënanga imatero hokä yatuli-tulihi Ma Jou Ai Demo ma Buku magoronaka yakorona o Abraham – hoko nënanga, ”O Abraham wo ngaku ma Jou Madutu ika deʼ karana ai ngongaku gënanga ünanga ma Jou Madutu wïtarima hokä o nyawa yasosanangi ma Jou Madutu ai hininga.” 7#Rm. 4:16 Hoʼ kokiani ngini nima mäo igou-goungu o nyawa o Abraham ai difauku ganga o nyawa yongaku-ngaku ma Jou Madutuika. 8#Kej. 12:3 Ma Jou Ai Demo ma Buku yamäkeoka ihira ma Jou Madutu wahi gumal̄a hagala o nyawa o Yahudi okaua imateke oa-oaoli de ma Jou Madutu, nako önanga iwi ngaku ma Jou Madutuika. O Abari ma Oa gënanga ihi ngahu ihira o Abrahamika o jaji nënanga magoronaka, ”De mangëkomo ngona, ma Jou Madutu aha wahi barakati mata-mata o hoana de o berera manyawa o dunia mal̄okuoka.” 9O Abraham wongaku, ho ünanga iwihi barakati. Hoko genangoli mata-mata o nyawa yongaku-ngaku, aha wahi barakati kamamoi de o Abraham.
10 #
Ul. 27:26
Hagala o nyawa imahi gogagao o agama matitaika, mata-mata yowango o lolai matimiuku. Hababu Ma Jou Ai Demo ma Buku magoronaka itulihi, ”O nyawa yososetiaua yadiai mata-mata yatuli-tulihoka o Agama ma Tita ma Buku magoronaka, ma Jou Madutu wahilolai!” 11#Hab. 2:4 Kamoiö de moiua o nyawa imateke oa-oa de ma Jou Madutu de karana yadiai o agama matita. O hali gënanga i hi nyataka Ma Jou Ai Demo ma Buku magoronaka, ”Duga-duga o nyawa yongaku-ngaku ma Jou Madutuika hiädono manga dodohanga de ma Jou Madutu yaoaoli, aha yowango!” 12#Im. 18:5 Mä o agama matita ihihol̄eua o ngongaku mal̄okuoka. Ma Jou Ai Demo ma Buku magoronaka yatulihi o nyawa yadodiai o agama matita, aha yowango karana o tita gënanga.
13 #
Ul. 21:23
Mä o Kristus wonahi lapahi ngone de o agama matita malolai. Unanga wodiai gënanga de wohigumal̄a Ai diri yalolai karana ngone. Hababu Ma Jou Ai Demo ma Buku magoronaka itulihi, ”Yädäene o lolai o nyawa yohonenge yonuneuku o liate magotaka.” 14O Kristus wodiai hoko gënanga hupaya o barakati ma Jou Madutu wihi jäjaji o Abrahamika yahi döakoli hagala o nyawaika o Yahudi manyawaua. De hoko gënanga ngoneö hongaku-ngaku ma Jou Madutuika, yakunu hatarima o Womaha ma Jou Madutu wohi jäjaji gënanga.
O agama matita ekola ma Jou Madutu ai jaji
15Roriadodoto! Irahai ngohi tapäke o hitotero o wange higëtongo hadodiai. Nako o nyawa yadiai o jaji moi de o jaji gënanga yaputuhoka, done kao nyawa moiö de yakunua yatöaka o jaji gënanga, ekola yödogo okia naga moi enangika. 16#Kej. 12:7 Ma Jou Madutu ai jaji-jaji gënanga ma Jou Madutu wodiai mangale o Abraham deʼ mangale o nyawa o Abraham ai difauku. Ma Jou Ai Demo ma Buku magoronaka itulihua ”deʼ mangale hagala o nyawa o Abraham ai difauku”, mamangarati kamanga ngöe. Yatulihi genangokadau ganga ”deʼ mangale o nyawa ani difauku”, ma mangarati womatëngo dika Unanga gënanga o Kristus. 17#Kel. 12:40 Ngohi tomau tohihihira nenangoka genangala nenanga doka: ma Jou Madutu ai jaji ihira yadiaioka deʼ yaputuhoka. O agama matita ihi döa-döaka o taongo o ratuhu iata de moruange ipahaika, yakunua yatöaka maputuhu de yaehe ma Jou Madutu ai jaji gënanga. 18#Rm. 4:14 Hababu nako ma Jou Madutu ai ngongike imahigagao o agama matitaika, done gënanga igoungokaua o ngongike wohi jäjaji. Imakorona karana ma Jou Madutu wihijajioka o Abrahamika, ho ma Jou Madutu wihidöaka gënanga unangika.
19Nako hoko gënanga, mangale okia o agama matita ihidöaka? Mabobaluhu ena genangala o tita gënanga ihidogo la inyata o nyawa nanga dodilakuru. O agama matita gënanga ilaku duga-duga hiädono woböa womatëngo o Abraham ai difauku, kiaka yahëto-hëtongo ma Jou Madutu ai jaji magoronaka o Abrahamika. O agama matita gënanga o malaekat-malaekat ihi ädono de iwi päke womatëngo o nyawa. 20Aa, kokiani naga o regu hinoto, dahao iparalu o huhuloko. Mä ma Jou Madutu woparalua o huhuloko, hababu Unanga mahirete wohijobo.
O agama matita mal̄okuoka
21Boteka gënanga mamangarati o agama matita ima lawani de ma Jou Madutu ai jaji? Maraioka kowali! Hababu nako o agama matita ihi döaka mangale inahidöaka o wowango o nyawaika, done o nyawa yakunu homateke oa-oa de ma Jou Madutu de madodagi o agama matita. 22Mä Ma Jou Ai Demo ma Buku magoronaka itulihi mata-mata o hoana de o berera manyawa naga o baradoha makuaha matimiuku. Karana gënanga, o ngongike ihi jäjaji de matiti o ngongaku o Yesus Kristus yahidöaka onangika yongö ngaku-ngaku.
23Ihira de iböa maöraha mangale hïngaku o Kristusika, ngone inagöana o agama matita ihidodiai; ngone hokä ina kurungaino hiädono o ngongaku gënanga ihi nyata. 24De hoko gënanga, o agama matita imadadi hokä tongone nanga gogöana hiädono o Kristus woböa la wona diai ngone homa teke oa-oaoli de ma Jou Madutu karana ngone hïngaku o Kristus. 25Oraha nänga, karana maorahoka o nyawa yakunu hïngaku o Kristusika, ho ngone o agama matita inä göanokaua.
26Karana ngini ningaku o Kristus Yesusika, ho ngini nirimoi dede Unanga; deʼ mangale karana gënanga ngini nidadi ma Jou Madutu ai ngoha-ngohaka. 27Ngini mata-mata inï ohikoka de o gohiki itebi-tebini de o Kristus ai romanga, hoʼ ngini niatarima nia dirioka o Kristus mahirete ai wowango mabiaha. 28O hali nënanga magoronaka koiwaka naga mahowono o Yahudi manyawa deʼ o Yahudi manyawaua, o gilaongo deʼ o gilaongua, o nauru deʼ o ngoheka. Riadodoto mata-mata kamoi karana o Kristus Yesus. 29#Rm. 4:13 Nako ngini tö Kristus, done ngini ganga o Abraham ai difauku. Deʼ ngini aha nia tarima okia ma Jou Madutu wohi jäjaji.
Currently Selected:
O GALATIA 3: TLB
Highlight
Copy
Compare
Share
Want to have your highlights saved across all your devices? Sign up or sign in
