O YEHEZKIEL 6
6
Ma Jou walolai yahuba-huba o gomanga
1-2Ma Jou wohitemo ngohino, ”Hei o nyawa nokokakaliua, napulono hagala o Israeloka manga l̄oku, deʼ nohiadono Ahi behehongo mangale o hukumanga onangika. 3Nähuloko önanga ihigihene deʼ yohohininga okia Ngohi, o Jou Duru toko Kurutil̄e totemo hagala o l̄okuika gënanga, hoko genangö hagala o doporonika, hagala o bakoro deʼ hagala o wai. Igoungu, Ngohi aha tohidingoto o oworo mangale yawedere hagala o ngï yahuba-huba o gomanga. 4Hagala mahuhuba mangï aha yaruba deʼ hagala madupa aha yapooteke. Mata-mata o nyawa genangoka aha yätoma manga gomanga mahimangoka. 5Ngohi aha tadiai hagala o Israeloka manga maiyeti imahi gogerewotika; deʼ toönanga manga kobo-kobongo aha tohikabarihi hagala o huhuba mangï gënanga magilolitino. 6Mata-mata o Israeloka manga kota aha ibinaha, mata-mata o huba mangï deʼ magomanga iwedere imahikokabarihika, hagala madupa imakokitingakoka, deʼ hagala okiahönanga yadodiai aha ihihanga. 7Okiaka honanga naga o nyawa yätoma, deʼ önanga yohohalamati aha ihioriki Ngohi ma Jou.
8O hidoku mahuhutulu onangino aha Tahiotana o domaino gënanga mä önanga aha yahikokabarihi o hoana deo berera ma ago-agomo manga hidogoronaka; 9dokengoka önanga yowango o tabuanga magoronaka. Daha önanga aha ihihininga Ngohiino ikali Ngohi tahukumu deʼ Ta hikauku önanga hababu toönanga manga hininga isatiaokaua Ngohiino. Onanga ihi mal̄aka Ngohi deʼ yairiki o gomanga hokä Ahi dagali. Daha önanga aha yato kayowunanga de toönanga manga diri mahirete karana hagala manga dorou deʼ manga manarama i patu-patutua önanga yadodiaioka. 10Done önanga aha ihiöriki Ngohi o Jou deʼ mata-mata o hohininga Tohidö döa-döaka o hikokamodongua mahomoa mata-mata.”
11Ma Jou Duru woko Kurutil̄e wotemo, ”Ani hininga ihuha! Nododora! Noari de ani hininga yatora karana hagala o dorou deʼ o manarama ipatu-patutua yadodiaioka o Israeloka manyawa. Onanga aha yohonenge karana o parangi, o habirokata deʼ o panyake o bobaku. 12Onanga mata-mata aha yamao Ahi hininga mahauku madohata. Hagala o nyawa manga gogurutika o tabuangoka aha yoruba yopanyake daha yohonenge; yototigino aha yohonenge o parangi magoronaka, deʼ mahou aha o hahini ihihonenge. 13Hagala o maiyeti imahikokabarihika hagala o gomanga mahidogoronaka deʼ hagala o huhuba mangï magilolitino, hohihoheika o doporono magogurutil̄e yogetongo, deʼ o l̄oku matubuoka yogetongo, o gota irubu-rubu matimioka yogetongo deʼ o gota ma ago-agomo yogetongo; o demo madipoko, okiaka dika önanga yotuhuku o huhuba toönanga manga gomangika. Done moi-moi o nyawa aha ihiöriki Ngohi ma Jou. 14Ya, Ngohi aha tohi tumutika Ahi giama deʼ Tawedere toönanga manga berera, hiädono duru kairïdika, mulaenge o Tonaka makokakaha o koreharail̄e hiädono o Ribla makotaika o koremieuku. Hagala o ngï o Israel manyawa yogogogere, kamoiö aha yahihalamatua. Done mata-mata o nyawa ihiöriki Ngohi ma Jou.”
Currently Selected:
O YEHEZKIEL 6: TLB
Highlight
Copy
Compare
Share
Want to have your highlights saved across all your devices? Sign up or sign in
