O YEHEZKIEL 3
3
1 #
Him. 10:9-10
Ma Jou Madutu wotemo, ”Hei o nyawa nokokakaliua, naol̄omo o buku ilululuino nënanga, daha noiki deʼ natemo-temo hagala o Israel manyawaika.” 2Daha tahelenga ahi uru deʼ ma Jou Madutu wohihidöaka o buku ilüluluino gënanga ngohino hupaya taol̄omo. 3Wato, ”Hei o nyawa nokoakakaliua, naol̄omo! Nohi dol̄a ani mamata de o buku ilüluluino nënanga.” Daha taol̄omo o buku gënanga deʼ tamao mamutiti hokä o ohungu magula.
4Ma Jou Madutu wotemoli, ”Hei o nyawa nokokakaliua, noiki hagala o Israel manyawaika deʼ nohiadono hagala Ahi behehongo onangika. 5-6Onangika ngona Tonihuloko, deʼ ko ohoana deoberera manga demo ihuhuhaikaua, imahowono deʼ nomangaratiua. Hohiade ngona Toni huloko o hoana deo berera hokä hoko gënanga, done önanga aha ihi gihene ani demo-demo. 7Mä o Israel manyawa yoluku inihigihene ngona, ikali Ngohiö önanga ihilegaikaua. Onanga mata-mata manga häeke itogowini deʼ yoigo ihilawani. 8O öraha nënanga ngona aha Tonidiai ani häeke itogowini deʼ noputurungu hokä onangoli. 9Ngona aha Tonihidadi kaimatero mabitumu o nuha deʼ kaimatero madogowini o intan. Uha namodongo yolölawa-lawanika gënanga.”
10Gila-gila ma Jou Madutu wotemo, ”Hei o nyawa nokokakaliua, natailako nohidodiai deʼ nohohininga hagala aha Taheto-hetongo ngonaika. 11Noiki ani hoanika naga o tabuanga magoronaka gënanga, deʼ nohiadono okia Ngohi, o Jou Duru tokokurutil̄e totemo onangika, boteka önanga yomau yoihene ekola kowali.”
12Daha ma Jou Madutu Ai Womaha ihi goraka ngohi deʼ ahi poretoka toihene o ilingi igiloanga itemo, ”Nihigiriri ma Jou Ai mulia o horogaka!” 13Toihene hagala o dodadi gënanga magahuhu mailingi ihi kokepeleke, deʼ mailingi maboriti o lululu-lulu gënanga makuatil̄e hokä o ohu mailingi. 14Ma Jou Ai kuaha ihi dotoboa ngohi de magiria, deʼ maöraha ngohi ihi goraka deʼ ihiao Ai Womaha, ahi hininga tamao mamali deʼ mahauku. 15Done ngohi tomahiadono o ngï yogögogere yototabuanga o Tel-Abiboka o Kebar ma Ngairi madatekoka. O wange tumidi madekana ngohi togogere genangoka; ngohi ihi todokana hagala okianaga daha toihene deʼ tamake gënanga.
Ma Jou witumutu o Yehezkiel wodadi o Israeloka manga gogoana
(Yeh. 33:1-9)
16O wange tumidi ipaha, ma Jou wohitemo ngohino, 17”Hei o nyawa nokokakaliua, ngona Tonigoraka nodadi o Israeloka manyawa manga gogoana. Nohiadono onangika o hohininga Tohidö döa-döaka nënanga. 18Nako Ngohi tohingahu womatengo o nyawa madorou aha wohonenge, mä ngona nitaaerua ünanga hupaya ünanga wangali ai kalakuanga hiädono ünanga wohalamati, done ünanga aha wohonenge hokä womatengo o nyawa baradohaohi, deʼ watagongo ma bobaluhu mangale ai honenge aha todotagahoko ngonaino. 19Nako ngona nitaaere o nyawa madorou gënanga deʼ ünanga woluku womatogumu wodiai o dorou, ünanga aha wohonenge hokä o womatengo o nyawa baradoha, mä ngona mahirete aha nohalamati.
20Nako womatengo o nyawa maoa mulaenge wodiai o baradoha, deʼ ünanga tihihimanga de o bahaya, done ünanga aha wohonenge nako ngona nitaaerua. Unanga aha wohonenge karana hagala ai baradoha, deʼ hagala ai manarama maoa-oa aha tohiningaokaua. Mä natagongo mabobaluhu mangale ai honenge gënanga aha todotagahoko ngonaino. 21Nako o nyawa maoa gënanga nitaaere hupaya uha wodiai o baradoha, deʼ ünanga wamoteke ani nasihati, done ünanga aha Tihukumua deʼ ngona aha nohalamati.”
O Yehezkiel aha wodadi womou
22Tamao Ai kuata ma Jou Ai boa deʼ toihene Unanga wohitemo ngohino, ”Nomomiki deʼ noiki o waiika. Dokengoka Ngohi aha toni temo-temo ngonaika.”
23Done ngohi toiki o waiika, deʼ genangoka tamake o dararono mameletongo ihi dumutu ma Jou Ai boa hokä tamö make-makeoka o Kebar ma Ngairi madatekoka. Daha ngohi toruba tomotumuku o tonaka mal̄okuoka, 24mä ma Jou Madutu Ai Womaha ihi ngohama deʼ ihioko. Ma Jou wohitemo ngohino, ”Nolio deʼ noma kurumika o tau magoronaka. 25Hei o nyawa nokokakaliua, ngona aha iniliko de o gumini hiädono nakunua nohupu deʼ nakunua nimakamake de o nyawa. 26Ngohi aha tadiai ani akiri itaulu hiädono ngona nakunua nahidaaere o hoana deo berera manyawa ima lawa-lawani gënanga. 27Dama, nako Ngohi tonitemooli ngonaika deʼ Tohigilio ani sawaro mangale notemo-temo, ngona kiani nohiadono okia Ngohi, o Jou Duru tokokurutil̄e totemo onangika. Mahononga onangino aha ihigihene, mä mahonongali kowali, karana önanga igoungu o hoana deo berera yototalawani.”
Currently Selected:
O YEHEZKIEL 3: TLB
Highlight
Copy
Compare
Share
Want to have your highlights saved across all your devices? Sign up or sign in
