O YEHEZKIEL 20
20
Ma Jou Ai mau deʼ o nyawa manga dorou
1O mede mamotoa mawange ngimoioka o taongo matumidi magoronaka maöraha ngomi imitabuanga, o Israeloka manga tutuda yamuruono naga yoboa ngohino mangale yogahoko ma Jou ahidumutu. Onanga yogogeruku iböto ahi himangoka, 2ngohi toihene ma Jou wohitemo ngohino, 3”Hei o nyawa nokokakaliua, na ade-ade hagala o tutudaika gënanga deʼ nahetongo Ngohi, o Jou Duru toko Kurutil̄e totemo hokonenanga, ’Duru kaniabarani ngini nigahoko ohidumutu Ngohino! Mangale Ngohi, o Jou Madutu towango-wango, Ngohi toluku ngini nihidotagahoko o hidumutu! Ngohi, o Jou Duru toko kurutil̄e totemoka.’
4Hei o nyawa nokokakaliua, ngona nomahidiaioka nä juru hakimi önanga? Aa, nadiai! Nahidoäka o hohininga önanga aha hagala ipese-peseke yadodiaioka toönanga manga ete deʼ manga tohora. 5#Kel. 6:2-8 Nohiädono okia Totö temo-temoka nënanga. Ngohi täirikoka o Israel deʼ tokoboto mangale önanga. O Mesiroka, Ngohi tomahima toko Ahi diri onangika ikali totemo, ’Ngohi o Jou nia Jou Madutu.’ 6Oraha gënanga Ngohi tokoboto aha Täao önanga yohupu o Me sirino yameta o bereraika Täö iri-irikoka mangale önanga. O berera gënanga ikaya deʼ iburere, o tonaka duru koharahai o dunia yamode-modekika. 7Tähuloko önanga yaumo hagala o dulada haemo-emono önanga yoigo-igo gënanga, deʼ Täduhunu önanga yapeseke manga diri deʼ yahuba hagala o gomanga o Mesirino, hababu Ngohi toönanga manga Jou Madutu. 8Mä önanga ihi lawani Ngohi deʼ yoluku ihihigihene Ngohi. Onanga yoluku yaumo hagala o dulada haemo-emono gënanga deʼ yoluku imatogumu yahuba o Mesir manga goma-gomanga. Maöraha önanga dokengokahi, Ngohi tomahidiaioka tomau tadogopoa Ahi gangamo onanguku. 9Mä Ngohi tadiaiua, hupaya Ahi romanga uha ihikauku o hoana deʼ berera o ngï önanga naga. Hababu o hoana deʼ o berera manga himangoka gënanga, Ngohi tohingahuoka o Israeloka manyawa aha o Mesiroka deʼ Tä ao tahihupu.
10Daha Tä ao önanga o Mesiroka deʼ tahihupu yameta o tonaka makokakahaika. 11#Im. 18:5 Dokengoka Tohidoäka onangika hagala Ahi pareta deʼ Tädotoko Ahi tita kokiani önanga ihingounu, hababu o nyawa ihi ngou-ngounu aha kahirahi yowango. 12#Kel. 31:13-17 Tähuloko önanga yahoromati o Sabat mawange hokä Ahi jaji manonako dede önanga, mangale yohininga önanga Ngohi o Jou tahitingakoka önanga mangale Ngohi. 13Mä o tonaka makokakahaka gënanga önanga ihi lawani Ngohi. Onanga yatilakuru hagala Ahi pareta, deʼ yaoluku hagala Ahi tita yatö tago-tagongo o nyawa ihi ngou-ngounu kahirahi yowango. Onanga duru yapeseke o Sabat mawange. Hababu gënanga, o tonaka makokakahaka gënanga Ngohi tomahidiaioka tomau tadogopoa Ahi gangamo ikokiria onanguku deʼ tabinaha önanga. 14Mä Ngohi tadiaiua mangale Ahi romanga mahoromati, hupaya Ahi romanga uha ihikauku mangale o hoana deʼ o berera yamake Ngohi tä ao o Israeloka o Mesiroka deʼ yohupu. 15#Bil. 14:26-35 O tonaka makokakahakaö gënanga Ngohi tomasadiaka tomau tahibodito o Israeloka manyawa aha taaoua tahingohama o tonaka tasosadiaka mangale önanga, o tonaka ikaya-kaya deʼ iboburere deʼ duru koharahai o dunia yamode-modekika. 16Tomau tahibodito gënanga Tähetongoka karana önanga yolegaikaua hagala Ahi pareta, yatilakuru hagala Ahi tita deʼ yapeseke o Sabat mawange. Onanga iholoi yoigo yahuba toönanga manga gomanga.
17Mä ipaha Ngohi tädora onangika, hiädono önanga idadiua Tätoma o tonaka makokakahaka gënanga. 18Idulu yaino hagala o nyawa o gö ngini niahidogoronaka, Tänasihati hoko nënanga, ’Uha nia nïki hagala o datoro yadodiai nia ete deʼ nia tohora. Uha nimä duru toönanga manga biaha deʼ uhaö nia peseke nia diri deʼ niahuba toönanga manga gomanga. 19Ngohi ma Jou tingini nia Jou Madutu. Nihingounu hagala Ahi tita deʼ hagala Ahi pareta. 20Nia horomati o Sabat mawange hupaya idadi o jaji manonako Ngohi dede ngini nanga hidogoronaka, mangale ngini niohininga Ngohi o Jou tingini nia Jou Madutu.’
21Mä o gogo maduruil̄eö gënanga yatogowini manga haëke Ngohino. Onanga yatilakuru hagala Ahi tita deʼ yolegaikaua hagala Ahi pareta, yätagongo o nyawa ihi ngou-ngounu kajirahi yowango. Onanga yapeseke o Sabat mawange. Hababu gënanga Ngohi tomasadiaka tomau tagopoa ahi dohata ikokiria onanguku o tonaka makoka-kahaka gënanga deʼ Tätoma önanga mata-mata. 22Mä Ngohi tadiaiua hupaya Ahi romanga uha ihikauku mangale o hoana deʼ berera yamake Ngohi ta ao o Israeloka o Mesiroka deʼ yohupu. 23#Im. 26:33 O tonaka makokakahakaö gënanga Ngohi tokoboto Ngohi aha tahikabarihi önanga o dunia yamode-modekika, 24karana önaga yolegaikaua hagala Ahi pareta, yatilakuru ha gala Ahi tita, yapeseke o Sabat mawange, deʼ kahirahi yahuba hagala o gikiri yapo puji-puji toönanga manga ete deʼ manga tohora.
25Ipaha Tahidoäka onangika o tita madodorou deʼ hagala o pareta yakunua yahidoäka o ngango. 26Tä mal̄aika önanga yapeseke manga diri deʼ hagala manga huhuba toönanga mahirete, ikali toönanga manga ngoha-ngohaka o nauru o riaka önanga ihihuba. Deʼ madodagi gënanga Ngohi tä hukumu önanga hupaya önanga ihi öriki Ngohi ma Jou.
27Aa, o nyawa nokokakaliua, nahiadono o Israel manyawaika, okia Ngohi o Jou Madutu toko Kurutil̄e totemo onangika: Nënanga manonako mahomoa ihidumutu sarakia nia ete deʼ nia tohora ihihikauku Ngohi deʼ yosetiaua Ngohino. 28Ngohi tä ao o tonaka Tahijä jajika onangika. Maöraha önanga yamake hagala o doporono magogurutil̄e deʼ o gota mautu irubu-rubu mahoka, önanga ihihuba o huhuba o ngïoka gënanga. Onanga yadiai Ngohi tongamo karana hagala o huhuba ituhu-tuhuku deʼ o huhuba toönanga manga angguru. 29Ngohi täleha onangika, ’Hagala o ngï magogurutil̄e okia ngini niolega gënanga?ʼ Mulaenge o öraha gënanga hagala o ngï gënanga yahetongo ’Hagala o ngï magogurutil̄e.’
30Hoʼ nahiadono o Isarel manyawaika okia Ngohi, o Jou ma Jou Madutu Duru toko Kurutil̄e totemo onangika. ’Yadodoa ngini niadiai hagala baradoha hokä yadodiai nia ete deʼ niatohora? Hokä önanga, nginiö nianïki hagala o gomanga haemo-emono gënanga. 31Ikali hiädono o wange nënangö ngini nia peseke nia diri deʼ niao o huhuba deʼ nia tuhuku nia ngoha-ngohaka hokä o huhuba hagala o gomangika. Daha kainimoroinohi ngini nigahoko o hidumutu Ngohino? Mangale Ngohi, o Jou Madutu towango-wango, o Jou Duru toko Kurutil̄e, ngini Tini higumal̄aua nigahoko o hidu-mutu Ngohino. 32Ngini nioigo nimahitero o hoana deʼ o berera mahomoa deʼ hagala o berera mahomoa manyawa yahuba-huba o gota mautu deʼ o helewo. Mä nia nahihu gënanga nia makeua.’ ”
Ma Jou Madutu wähukumu deʼ wahi apongo
33-34”Mangale Ngohi, ma Jou Madutu towango-wango, o Jou Duru toko Kurutil̄e, ngini Tinihidoäka o hohininga karana Ahi dohata ngini aha Tinipareta de mabuturungu deʼ tohitotiaiuku hiädono ngini niamao Ahi kuaha. Ngini aha Tinitoomu deʼ Tiniao tini higilio hagala o berera o ngï ngini inihi kokabarihikaoka. 35Daha ngini aha Tiniao deʼ o Hoana deʼ berera manga tonaka ma Kokakahaika. Dokengoka ngini aha Tini juru hakimi deʼ homakihima-ngino o biono deʼ o biono, 36hokä Tadodiaioka nia ete deʼ nia tohoraika o Sinai matonaka i Kokakahaoka. Ngohi o Jou Duru toko Kurutil̄e totemoka.
37Ngini aha Tinihidiai dema buturungu hupaya ngini nihingounu Ahi jaji. 38Ima lawa-lawani deʼ o nyawa madorou aha Tahititoko nia hidogoronaka. Onanga aha Ta ao tahihupu hagala o bereraino o ngï öraha nënanga önanga yogogogere deʼ Tahigumal̄aua yolio o Israel matonakika. Done nihi öriki ngini Ngohi ma Jou.”
39Ma Jou Duru woko Kurutil̄e wotemo, ”Hei o Israeloka manyawa, öraha nënanga nimahidailako dika ngini. Nihi gila-gila dika nidiai o baradoha deʼ niahuba hagala o gomanga! Mä niohininga iböto de gënanga ngini kiani nihihingounu Ngohi deʼ ibötohi niapeseke Ahi romanga itebi-tebini deʼ niao o huhuba ha-gala o gomangika gënanga. 40Hababu o Israel matonakoka, Ahi l̄oku itebi-tebini matubuoka, ngini mata-mata, o Israeloka manyawa aha nihihuba Ngohi. Dokengoka aha tinisanangi nginika de Ahi hininga yadaene tatarima hagala nia huhuba, nihihö huba-huba duru maoa-oa de hagala nia ngongike nihi tinga-tingakoka. 41Ngini Tiniao tinihihupu ibötino hagala o ngï ngini nimahi kokabarihikaoka, Ngohi aha Tinitoomu ngini deʼ tatarima hagala nia huhuba itö tuhu-tuhuku. Done ihi öriki mata-mata o hoana deʼ berera Ngohi nënanga o Jou Duru totö Tebi-tebini. 42Nako ngini Tiniao tinihigilio o Israel matonakika, o tonaka Tohijajaji nia ete deʼ nia tohoraika, done nihi öriki ngini Ngo-hi o Jou. 43Dokengoka ngini aha nimahininga hagala nia manarama haemo-emono yapese-peseke niadiri. Done ngini aha niaemono niohininga hagala idadadi gënanga. 44Nako ngini Tinihidiaioka hoko gënanga mangale Ahi romanga mahoromati, deʼ koigoungua imamoteke deʼ niakalakuanga ipatu-patutua ikali niamanarama itotorou, nihi öriki ngini o Israeloka manyawa Ngohi o Jou. Ngohi o Jou Duru toko Kurutil̄e totemoka.”
O uku o koreharail̄e idaduoka
45Ma Jou wohitemo ngohino, hoko nënanga, 46”Hei o nyawa nokokakaliua, nolega o koreharail̄e idaduoka. Nataaere o tonaka o koreharail̄e natailako nohidodiai o hongana dokengoka. 47Nahuloko o hongana gënanga ihigihene okia Ngohi o Jou Duru toko Kurutil̄e totemo enangika, ’Noihene! Ngohi aha totofo o uku yatuhuku yamata moi-moi o gota mautu naga ngonaka, yaoa madoole-nge yaoa kama gou-gouohi. O uku itoka-tokara gënanga yakunua yahonenge. Enanga aha imatahe o korehara deʼ yauku o koremieuku, deʼ mata-mata o nyawa aha yamao mahauku. 48Onanga aha yamao Ngohi, o Jou tawangoka o uku gënanga, deʼ moiuaö yakunu yahonenge.’ ”
49Mä ngohi o Yehezkiel tohinyata ahi kabaratanga deʼ totemo, ”Jou Duru noko Kurutil̄e, uha nohihuloko ngohi tahetongo gënanga! Mata-mata o nyawa yotaianoka hababu ngohi toigo totemo-temo deʼ o hitotero hiädono ihuha imangarati.”
Currently Selected:
O YEHEZKIEL 20: TLB
Highlight
Copy
Compare
Share
Want to have your highlights saved across all your devices? Sign up or sign in
