O NGO ESTER 6
6
Ma koano wi horomati o Mordekhai
1O hutu genangö ma koano wakunua womaidu. Hababu gënanga ünanga wogahoko yal̄ë o pareta masejara madulihi mabuku de wähuloko o nyawa yabasa. 2#Est. 2:21-22 Magoronaka yamake madulihi o Mordekhai wohingahuoka manga hidailako iwitoma ma koanoika ihidö dato-datoroka o Bigtan de o Teres, yahinoto o pangkati magogurutil̄e yogögoa-goana ma koano ai kamari. 3Ma koano woleha, ”O horomati de o balahi o oa-oa okia iwihidöakoka o Mordekhaika gënanga?”
Yolö lelelani yohaluhu, ”Unanga okia-kiaua watarima.”
4Daha ma koano wotemo, ”O nagona ahi pegaweino öraha naga o kadatoka?”
Ima daenika o Haman gënanga daha wowohamika o kadato ma löaika; ünanga womau wogahoko o higumal̄a ma koanoika mangale o Mordekhai iwi liko o liateuku wohigögoko-gokoka gënanga. 5Yolö lelelani gënanga iwi baluhu ma koanoika, ”O Haman naga o kadatoka de ünanga womau wonihimanga Jou Koano.”
Ma koano wato, ”Niwi huloko ünanga wowohama.”
6O Haman wowohaminoka, ma koano witemo unangika, ”Nako o nyawa tomau tihidöaka o horomati ma amo-amoko. Okia aha tadiai mangale ünanga?”
O Haman womatibanga, ”Kao nagonahi ma koano aha wahi döaka o horomati hoko gënanga ma amoko? Maraioka ngohi!”
7-8Hababu gënanga ünanga wohaluhu, ”Kokiani o nyawa gënanga nil̄ë o pakeanga imomulia biaha napöpake-pake Jou Koano mahirete. Daha Jou Koano ani kuda yaporomu de o pareta madulada-dulada. 9Womatengo o negaraka wolamo-amoko o nyawa yomomulia manga difauku manga doomuino kiani iwihi noa o pakeanga gënanga o nyawaika jou Koano nomau nihöhoromati gënanga, daha iwihiduono o nyawa gënanga de wobarenuku jou Koano ani kuda yanonu o kota malapanga. O nyawa wolo ago-agomo gënanga aha womadagi ai himangoka ikali wopöa-pöaka, ’Hoko nënanga ma koano wihidöaka o ragane o nyawa wihöhoromatika!ʼ ”
10Daha ma koano wïtemo o Hamanika, ”Itaiti nal̄ë o pakeanga de o kuda gënanga de nihidöaka hagala o horomati gënanga o Mordekhaika, o Yahudi manyawa gënanga. Nadiai hokä notötemo-temo kangano, kamoiö ma nakurangua. Ngona yakunu nimake ünanga magogiria wogogeruku o kadato mangorana ma amo-amoko mahimangoka.”
11Daha o Haman wal̄ë o pakeanga de o kuda gënanga de wihi noa o pakeanga gënanga o Mordekhaika. O Mordekhai wobarenoka o kuda gënanga, o Haman wihiduono wihinonu o kota malapanga, ikali wopöa-pöaka, ”Niwi pulono, hoko gënanga ma koano wihi döaka o ragane o nyawa wihöhoromatika!”
12Iböto gënanga o Mordekhai womaidulu o kadato ma ngorana ma amo-amokika. Mä o Haman woma tai-taiti wolio. Unanga woluku iwimake o nyawa, karana ünanga duru iwimal̄eke, done watamunoka ai biono. 13Ngoi hekata de ai dodiawo mata-mataika ünanga wa ade-ade okia mamömao-maoka. Ipaha ngoi hekata de ai dodiawo yoböbarija gënanga iwitemo unangika, ”Ngona mulaenge ani kuata ihihanga de o Mordekhai. Unanga o yahudi manyawa de ngona aha nakunua nilawani. Unanga maraioka aha woni utumu ngona.”
O Haman iwi hukumu iwi hohonenge
14Onanga kai amoteke ade-adeohi de o Haman, o kadatoka yopangka-pangkati yoboa de imatai-taiti yomau iwingotaka o Haman o jamuangika o ngo Ester madödodiai.
Currently Selected:
O NGO ESTER 6: TLB
Highlight
Copy
Compare
Share
Want to have your highlights saved across all your devices? Sign up or sign in