O NGO ESTER 1
1
Ma Jou boki o ngo Wasti malawani ma Koano Ahasyweros aipareta
1-2 #
Ezr. 4:6
O Susan, o Persia makota matitioka, o Ahasyweros wopareta hokä o koano Ai pareta o propinsi o ratuhu moi de monaoko de tumidi mangöe, mulaenge o India de yaino hiädono o Sudanika.
3O taongo mahangeoka aipareta, ma Koano Ahasyweros wodiai o rameanga ma ago-agomo mangale mata-mata o nyawa yolago-agomo de aipareta. O pareta de o Media manga kokapitaö yoboa o rameangika gënanga, hoko genangö gubernur-o gubernur de o propinsioka mapangka-pangkati magogurutil̄e. 4O mede butanga madekana ma koano wohi mato-matoko ai kadato makaya de makaramata ikali mamulia aipareta.
5Iböto gënanga ma koano wodiaioli o rameanga mangale o kawaha yongodumu o Susanoka, yaoa yoko kaya-kaya yaoa yomomihikini. O rameanga gënanga gila-gila o minggu moi itotomo de yadiai ma koano ai kadato madumuleoka. 6O kadato malöa ihiporoka de guba o ngöere o lenan marupa mabihi-bihi de magare-garehe, i hiliko de o lenan ma aluhu magumini de ihi lakete o gogoli-gogoli o haakaika ihipake o pualam maliate-liateoka. Matimioka ihi gogere o dangiri o gurasi de o haaka malante mal̄okuoka ima hiporomu o pualam magare-garehe, o hablur madoka-dokara, o muhutika makai ileto-letongo de o pirus nahelewo mabihi-bihi. 7Ma koano wasadia o angguru duru de maboloi wahidiai o galahi-galahi o gurasiuku irupa-rupaka marupa. 8Ai angguru kayahi tugaukua ai tamu-tamu ekola yahi pakisa yokere. Ma koano wohidöaka o pareta o kadatoka yolöleleanika, hupaya o tamu magetongo yaleleani imamoteke manga igo moi-moi.
9O öraha utu gënanga o ngo Wasti, ma koano ngoi jou Boki, modiaiö o rameanga mangale o ngongoheka o kadato magoronaka.
10O wange matumidoka, ma koano wokere hiädono wamao duru womorene. Hababu gënanga ünanga wä ahoko yatumidi o pangkati yodadi ai diri yolö leleani; önanga ganga o Mehuman, o Bizta, o Harbona, o Bigta, o Abagta, o Zetar de o Karkas. 11Unanga wähuloko önanga imiao ai himangika ma Jou Boki o ngo Wasti de o popareta mamakota ami häekoka. Ma Jou Boki duru koami hailoa, de ma koano womau wohimatoko ami hailoa o nyawa yolago-agomika de ai tamuika mata-mata. 12Mä maöraha yolöleleani gënanga ihi ädono ma koano aipareta ma Jou Boki o ngo Wastiika, ma Jou Boki moluku maino, hiädono ma koano duru wongamo.
13Ma koano toünanga ai biaha mangale wogahoko o damake duru yanö nako-nako mangale yakorona o hukumu de o adati. Hababu gënanga wa ahoko iwinö nonasihati ihiö ori-oriki okia kokiani yadiai o perekara marupa hokä gënanga magoronaka. 14Yononasihati duru mamoi-mamoi ma koano wa ahoko enagënanga: o Karsena, o Setar, o Admata, o Tarsis, o Meres, o Marsena deʼ o Memukan. Önanga ganga o Persia de o Media ma pangka-pangkati toönanga manga pangkati magogurutil̄e o pareta magoronaka. 15Ma koano wätemo o nyawa yatumidika gënanga, ”Ngohi tahulokoka ihilö leleani ma Jou Boki o ngo Wastiika mangale imi huloko munanga maino ngohino. Mä munanga moluku. Ima moteke o tita, o manarama okia kokiani ngone ha l̄ë mangale munanga?”
16Daha o Memukan wato ma koanoika de o nyawa yo lago-agomika, ”De o manarama gënanga, Jou Koanoua dika moni hikauku oka ma Jou Boki o ngo Wasti mä mata-mata Jou Koano ani pegawe, kamamoi o nau-nauru magetongo o paretaka nënanga! 17Hababu ma Jou Boki ami manarama gënanga aha ihi öriki mata-mata ongo heka, deʼ önanga aha yahoromatiua manga rokata moi-moi. Onanga aha yotemo Jou Koano nomi paretaka ma Jou Boki o ngo Wasti mangale monihimanga, mä ma jou Boki moluku moboa. 18Ho, nako o nyawa yologoagomo manga heka-hekata o Persiaoka deʼ o Mediaoka yoihene o hali gënanga, maraioka önanga daha deʼ majapatioka ihingahu manga rokatika moi-moi. Ma hasili enagënanga, o hekata aha malawani ami rokata aipareta deʼ o rokata aha womi ngamo ngoi hekata. 19Hababu gënanga, ngomi migahoko hupaya Jou Koano nal̄ë o putuhu ma Jou Boki o ngo Wasti yakunokaua moni himangoli Jou Koano. O putuhu nënanga kiani nohidadi o Persia deʼ o Media ma undang-undang, hupaya yakunokaua yatauroli. Iböto gënanga, ma jou Boki ongo Wasti ami pangkati nohi döaka ongo heka mahomoaika iholoi yaoa ngaro deʼ munanga. 20Nako Jou Koano ani putuhu gënanga yodogerewotoka o pareta ma amokika nënanga yamode-modekika, o hekata magetongo aha yahoromati manga rokata, yaoa yokaya-kaya yaoa yomo mihikini.”
21Ai gogahoko o Memukan gënanga ihigoungu ma koano deʼ o nyawa yolago-agomo, done ma koano deʼ majapatioka wadiai. 22Unanga wohidingoto o pareta mahurata opareta mapropinsi mata-mataika, mabahasa magoronaka o propinsi madulihi gënanga moi-moi. O pareta gënanga mademo o tau manyawa magoronaka yo getongo, o rokata kiaka wodadi o häeke, deʼ iputuhu wal̄ë hagala o putuhu.
Currently Selected:
O NGO ESTER 1: TLB
Highlight
Copy
Compare
Share
Want to have your highlights saved across all your devices? Sign up or sign in