O EFESUS 3
3
O Paulus ai manarama mangale o Yahudi okaua manyawa
1Hababu gënanga ngohi, o Paulus, ihi buika karana o Kristus Yesus mangale tingini o Yahudi okaua nia oa. 2Marai ngini ni ihenoka ma Jou Madutu, karana Ai hininga maoa, wohihidöakoka ngohino o manarama nënanga mangale nia oa. 3Ma Jou Madutu wohi demoka Ai datoro irorahasia deʼ wohingahuoka ngohino. (Imakorona o hali nënanga de madipoko ngohi tatulihoka däkena, 4#Kol. 1:26-27 deʼ nako ngini nia basa, ngini aha nimangarati o rahasia ima korona o Kristus hokä ngohi tomangarati.) 5Mahira o rahasia gënanga komaiwahi yahingahu o nyawaika, mä oraha nënanga ma Jou Madutu ai Womaha ihi matokoka o rasul-rasul deʼ Ai nabi-nabiika. 6O rahasia gënanga ganga nënanga: Itilakuru o Abari ma Oa gënanga, o Yahudi okaua manyawa imakinïki yamäo ma Jou Madutu ai barakati-barakati mahira wadiai duga-duga mangale o Yahudioka manyawa. O Yahudi okaua manyawa yodadioka o röehe moi mahidoku, deʼ imakinïki yatarima okia ma Jou Madutu wohi jäjajioka itilakuru o Kristus Yesus.
7Ma Jou Madutu wohihidöaka ngohino o ngongike – enagënanga o manarama – mangale tohigerewoto o Abari ma Oa gënanga. Ngohi tatarima o ngongike gënanga itilakuru ma Jou Madutu ai kuaha imanarama ahi diri magoronaka. 8Ma Jou Madutu ai umati yongodumu manga hidogoronaka ngohi duru topatutua. Mä ma Jou Madutu wohihidöaka ngohino o ngongike nënanga: o manarama mangale tohi abari o Abari ma Oa o Yahudi manyawa ikaua mangale o Kristus ai kaya koi mata-mataua; 9deʼ itilakuru ngohiö hupaya mata-mata o nyawa ihiöriki sarakia ma Jou Madutu wohi dadadi o dunia magilolitino nënanga, wadiaioka Ai datoro ka öraha mahirahi warahasiahi o duniaika. 10Ma Jou Madutu ai dungutu enagënanga hupaya öraha nënanga, itilakuru o jemaat, mata-mata yasosö o kuaha o gitawaka ihi öriki ma Jou Madutu ai barija hagala marupa magoronaka. 11Ma Jou Madutu wodiai gënanga imadäene de Ai datoro ikokakali, wadiaioka de madodagi o Kristus Yesus tongone nanga Jou. 12De nanga ngongaku o Kristusika de karana horimoi de Unanga, ngone inahigumal̄a mangale homahi tigi ma Jou Madutu de nanga ngongaku itototomo. 13Hababu gënanga, tongohi ahi gogahoko enagënanga: uha nihawatere mangale okia ngohi taohana o hangihara karana ngini, hababu mata-mata gënanga ganga mangale nia oa.
O Kristus ai dora
14Hababu gënanga ngohi tatilabuku o Ama ai himangoka. 15Unangino moi-moi o tau madol̄a o horogaka deʼ o duniaka yatarima manga rupa imomulia. 16Ngohi toma niata tanu ma Jou Madutu womomulia mangale woigo wohikuata nia hininga de ai Womaha. 17Tanu karana ngini ningaku o Kristusika, o Kristus wogogere nia hininga magoronaka, deʼ nia ngango nihihol̄e de yakuaha de o dora. 18Ngohi toma niata tanu nimakinïki de ma Jou Madutu ai umati mata-mata, ngini yakunu nio dumunu hoko kia ma amokika deʼ magurutu deʼ ma gurutil̄e deʼ malukuku o Kristus ai dora, 19de o nyawa ma akali hakunua homangarati hi ädono iloluku-lukuku. Tanu ngini nia näko o Kristus ai dora gënanga, hiädono ngini ini ömanga de ma Jou Madutu ai diri itototomo.
20De ma Jou Madutu ai kuaha imanarama magiria tongone nanga diri magoronaka, ma Jou Madutu wakunu wadiai iholoi ikurutika iwöe de okia ngone hakunu hogahoko ekola hatibanga. 21Kokiani niwihimulia ma Jou Madutu nia ngohaka de nia danonguku o jemaat magoronaka, i tilakuru o Kristus Yesus. Niwihigiriri ma Jou Madutu kahi ado-adonika! Amin.
Currently Selected:
O EFESUS 3: TLB
Highlight
Copy
Compare
Share
Want to have your highlights saved across all your devices? Sign up or sign in
